Hatutan.com, (22 Janeiru 2023), Díli—Prezidente Repúblika (PR), José Ramos-Horta sei rona uluk esplikasaun hosi Primeiru Ministru (PM) Taur Matan Ruak liu hosi reuniaun regulár, hafoin bele halo deklarasaun ofisiál.

Ramos-Horta hateten asuntu ne’e iha Aeroportu Internasionál Nicolau Lobato Comoro, Domingu (22/01/2023) bainhira fila hosi Forum Ekonómiku Mundiál ne’ebé hala’o iha Sidade Davos, Suísa.

Lee Mós: Autoridade Seguransa Rekolla Kilat Tolu Iha Rezidénsia Longuinhos Monteiro

“Ha’u foin mak to’o mai hosi Forum Ekonómiku Mundiál. Ha’u sei la komenta ba ida-ne’e, aban ka Tersa Feira depois lee buat hotu-hotu, rona ha’u nia asesór ne’e, ko’alia ho Primeiru Ministru Taur Matan Ruak entaun ha’u sei halo deklarasaun ofisiál,” Prezidente Repúblika hateten.

Xefe Estadu mós sei buka hatene kona-bá kazu rai kilat iha uma liuliu sei rona direta hosi asesór Longuinhos Monteiro.

Jurista Timoroan, Sérgio Paulo Dias Quintas konsidera Policia Ciêntífica e de Investigação Criminal (PCIC), viola norma prossesuál tanba halo Buska bá rezidénsia eis Ministru Interiór Longuinhos Monteiro inklui halo apreensaun bá objetu sira krime nian iha Segunda (16/01/2023), maibé laiha autorizasaun no koñesimentu hosi órgaun judisiál.

Maske TDD liuhosi nia despaixu ofisiál hodi liberta ona Longuingos Monteiro maibé Sérgio Quintas dehan tenke responsabiliza nafatin bá aktu krime ne’ebé mak nia halo, tanba iha kazu ida-ne’e, fallansu de’it iha kestaun prosesuál.

Lee Mós: PCIC Viola Norma Prossesuál Maibé Longuinhos Monteiro Responsabiliza Nafatin Aktu Kriminál

Jornalista: Vito Salvadór