Hatutan.com, (07 Fevereiru), Díli—Ema na’in 4.300 mate iha Turkia no Síria, hafoin rai nakdoko makas ho magnitude M7,7 iha Segunda (06/01/2023) dadersan oras lokál.

Vitima ne’ebé lakon vida hosi rai nakdoko iha Turkia-Síria ema nain 4.300. (Sezgin Pancar/Anadolu Agency via Getty Images).

Notísia ne’ebé publika hosi CNN Indonézia relata katak, iha ema atus ba atus mak mak sofre kanek grave no kanek kaman. Hosi númeru 4.300 ne’ebé mate, autoridade protesaun sivil hetan ema nain 476 iha Síria.

Lee Mós: Rai Nakdoko Iha Cianjur-Indonézia: Ema Na’in 162 Mate

Alende ne’e, iha ema na’in 326 mak hetan sira nia mate isin iha área Aleppo, Hama, Latakia no Tartus.
Ajénsia Notísia Síria nian mós relata katak, iha ema na’in 1.042 mak sofre kanek hosi akontesimentu ne’e.

Prezidente Turkia, Recep Tayyip Erdogan iha ninia intervensaun relata mós katak, ema nain  912 mak mate no na’in 5.385 mak kanek iha ninia área.

Oras-ne’e daudaun ekipa protesaun sivíl serbisu makaas hodi buka tuir ema hirak ne’ebé mate no salva sira ne’ebé kanek.

Governu TL Hato’o Solidariedade

Ohin, Governu Timor Leste hato’o ninia kondolénsia ba família no amigu vítima hosi rai-nakdoko makaas ho magnitude 7,8 iha eskala aberta Richter, ne’ebé akontese horiseik, loron 6 fulan-fevereiru tinan 2023, iha sudeste Turkia no kauza destruisaun ne’ebé boot iha país ne’e no iha nasaun viziña Síria.

Governu Timor-Leste manifesta mós ninia solidariedade ba Governu no Povu Turku no Síriu, ne’ebé enfrenta efeitu husi katástrofe ida-ne’e.

Tuir balansu ikus ne’e, konfirma ona ema na’in-3.800 resin lakon vida iha país rua ne’e, ho espesialista admite katak númeru totál bele aumenta liután. Ema rihun ba rihun hetan kanek no edifísiu rihun lima resin monu namtate.

Husikedas rai nakdoko prinsipál, ne’ebé akontese la kleur hafoin tuku 4 dadeer, kilómetru 33 husi kapitál provínsia Gaziantep, relata mós rai nakdoko atus ba atus tuituirmai, ne’ebé akontese iha sudeste Turkia nian.

Governu Timor-Leste, louva serbisu autoridade husi país afetadu sira nian iha sira-nia serbisu buka no salva, iha kondisaun ne’ebé susar tebetebes.

“Ami-nia sentimentu ba família ne’ebé lakon sira-nia ema ne’ebé sira hadomi no ami hakru’uk ba sira ne’ebé nafatin determinadu hodi buka vítima sira ne’ebé sei moris no hodi apoia populasaun sira ne’ebé afeta hosi katástrofe ida-ne’e,” Portavós Governu, Ministru Fidelis Magalhães, afirma liu hosi komunikadu.

Jornalista: Rogério Pereira Cárceres