Hatutan.com, (10 Marsu 2023), Díli—Jogadór Aitana FC, Miguel Araújo lori nia ekipa rekolla pontu ida hafoin iha jogu kontra Assalam FC impata ho skore 2-2.

Jogadór Aitana FC, Miguel Araújo lori nia ekipa rekolla pontu ida hafoin iha jogu kontra Assalam FC impata ho skore 2-2. Foto/Elio dos Santos da Costa.

Jogu ne’ebé atrativu entre klubu Assalam FC no Aitana FC halo adeptu sira haksolok atu akompaña tanba ekipa rua iha hotu ambisaun atu rekolla vitóriaa hodi asegura pozisaun iha tabela klasifikasaun primeira divizaun époka 2022-2023.

Lee Mós: Lica-Lica Lemorai FC “Kebra” Santa Cruz FC 2-1

Assalam FC ne’ebé iha jogu rua antes sempre rekolla vitória ho esperansa halo jogu ida atakante desde minutu uluk hodi halo presaun ba adversáriu Aitana FC.

Maski nune’e, Aitana FC kontinua halo jogu ida disiplina no halo mudansa ba liña íntimu Jogadór no hahu halo tranzisaun ba pozisaun Jogadór no tátika hodi bele halo jogu aas liu hosi pasajen direita entre liña defeza no médiu  ba iha avansadu hodi halo atake.

Aitana FC kontinua halo jogu ho intensidade aas liu hosi pasajen direita ho bola as hodi bele halo presaun ba adversáriu.

Tama ba minutu 11, Aitana FC liu hosi Jogadór Hermínio Moníz (31) lansa uluk golu ida ba rede Assalam FC nia hodi muda skore ba 1-0 hafoin simu asistensia hosi nia maluk Angelo (4).

Ho golu ne’e halo ekipa rua hasae intensidade jogu. Assalam FC hetan oportunidade barak atu marka golu liu hosi Jogadór estranjeiru Amir Hamzah (23) maibé falla atu aproveita oportunidade ne’ebé iha.

Tama ba minutus 13 Jogadór Aitana FC Hélder Valente (46) simu kartaun kinur hafoin halo erru.

Ekipa Aitana FC nafatin halo atake liu hosi pasajen bola as hodi halo presaun ba iha ekipa adversáriu maibé bola ne’ebé iha falla ezekuta ho diak.

Assalam FC nafatin halo kontra atake liu hosi jogu lais ne’ebé halo hosi avansadu Elias Mesquita (10) maibé adversáriu sei bele asegura ho di’ak.

Assalam FC hetan prémiu penalidade ida hafoin Jogadór Aitana FC Danilo Alves (2) halo falta hasoru avansadu Assalam FC Amir Hamzah (23) iha area grandeal laran.

Jogadór Assalam FC Jovanio Braz (8) ne’ebé ezekuta penalidade ne’e susesu hatama golu hodi muda skore ba 1-1.

Hafoin golu ne’e ekipa rua hasae liutan tensi jogu no tama ba minutu 24 mosu isidrnte kiik ida entre Avansadu Assalam FC Elias Mesquita (10) no meiu kampu Aitana FC Rigerbert Lay (7) nune’e arbitu deside fo kartaun kinur ba Jogadór nain rua ne’e.

Ekipa rua mantein halo jogu no buka oportunidade atu halo golu liu hosi bola oportunidade ne’ebé iha maibé laiha ekipa ida mak superior liu nune’e primeira parte termina ho skore 1-1.

Molok tun ba deskansa, ekipa Aitana FC halo protestu hasoru arbitu ne’ebé lidera jogu tamba konsidera lakonsistensia ho nia desizaun hodi la fó penalidade ba Aitana FC maske Jogadór Assalam FC halo hands ball iha area grandeal laran.

Situasaun ne’e halo Prezidente Aitana FC Abel Ximenes “Niki” tun ba kampu no halo asaun protestu hodi husu atu árbitu tenke lidera jogu ho konsistensia no kredivel nune’e labele prejudika ekipa sira ne’ebé partisipa iha liga Timorense époka 2022-2023.

Hafoin insidente protestu ne’ebé iha, Komisáriu do jogu no orgaun liga inklui FFTL hamutuk ho arbitu sira deside hapara lai jogu segunda parte hodi halo lai konkordansia ho klubu sira, liu-liu Prezidente klubu sira atu iha fali konkordansia hodi kontinua jogu.

Diskusaun ne’ebé la’o durante minutu 40 nia laran ne’e ikus mai lori konsensu ida atu kontinua jogu ba segunda parte to’o termina.

Molok tama ba jogu segunda parte, Prezidente Aitana FC Abel Ximenes “Niki” hateten jogu laiha problema no asaun ne’ebé ohin halo liu ona hamutuk hadi’a futeból ba oin.

Molok jogu segunda parte hahu, iha minutu 45+2 Jogadór Aitana FC Francelino Belo (22) tenke simu kartaun mean tamba asaun protestu ne’ebé nia halo no Jogadór Gabriel da Costa (14) simu kartaun kinur maske sira na’in-rua trur de’it iha bench ka banku cadangan.

Iha segunda parte, Jogadór ekipa Aitana FC no Assalam FC kontinua hatudu maturidade hodi kontinua jogu maske antes ne’e iha dezintendimentu tanba la kontente ho desizaun arbitu nian. Ekipa rua kontinua halo jogu no kada ekipa sempre halo esforsu atu hetan vitória.

Tama ba minutu 51, Jogadór Assalam FC Elis Mesquita (10) marka golu ida hodi muda skore ba 2-1. Golu ne’e halo ekipa Assalam FC kontente no iha liutan motivasaun atu manan jogu ne’e.

Tama ba minutu 53, Aitana FC halo substituisaun hodi hasai Angelo (4) no hatama Jilson dos Reis (10).

Liu de’it minutu 2, tama ba minutu 55 Aitana FC kontinua halo substituisaun iha liña defeza hodi hasai Emiliano Parada (5) no hatama Rivaldo Martins (13).

Ekipa Assalam FC mos halo substituisaun iha liña avansadu hodi hasai Lourenço Freitas (19) no hatama Martinho Belo (33).

Ekipa Aitana FC kontinua lansa atake liu hosi bola as no tama ba minutu 58 Jogadór Miguel Araújo (9) marka golu ida hodi muda skore ba 2-2 no halo impata ba jogu ne’e hafoin simu asistensia hosi nia maluk Jogadór Rivaldo Martins (13).

Ho golu ne’e ekipa Aitana FC iha liutan motivasaun atu halo jogu maibé ekipa rua nafatin mantein ho skor ne’ebé iha.

Assalam FC halo substituisaun hodi hasai Bonarudin Amin (17) no hatama Hasan Costa (7) iha minutu 70 no Aitana FC mos halo substituisaun hodi hasai Miguel Araújo (9) no hatama Benjamin Amaral (25).

To’o jogu termina ekipa rua mantein ho skore 2-2 no obrigadu tenke fahe pontu hanesan.

Jornalista: Vito Salvadór