Hatutan.com, (11 Marsu 2023), Díli- Klube Primeira divizaun Karketu Díli FC haksoit sai hosi zona degradasaun hafoin iha terseiru jogu iha Estádiu Munisipál Díli, Sábadu (11/3/2023), halakon nia adversáriu As Ponta Leste ho skor 2-1.

Lee Mós : Aitana FC Rekolla Pontu Ida Hafoin Impata Ho Assalam FC 2-2

Karketu Díli FC ne’ebé ho naran estimadu Matak Malirin ne’e nu’udár klube primeira divizaun ne’ebé reprezenta sidade Díli prinsipálmente lisan Karketu Mota Ain. Iha terseiru jogu kontra ekipa As Ponta Leste ekipa estimadu komunidade Munisípiu Díli ne’e halo kedas jogu ida atrativu no kapas hodi anima adeptu sira ne’ebé asiste direita jogu iha estádiu munisipál Díli.

AS Ponta Leste vs Karketu Díli FC, Sábadu (11/3/2023). Foto/Elio dos Santos da Costa

Ekipa As Ponta Leste halo uluk atake ba ekipa adversáriu liu husi pasajen bola badak ne’ebé Jogadór sira halo husi liña bá liña. Karketu Díli FC sempre halo falla iha liña defeza direita no As Ponta Leste aproveita oportunidade ne’e hodi lansa kontra atake ne’ebé lais no efetivu liu hosi Jogadór avansadu Expedito da Conceição (10) iha parte eskerda.

Jogadór Karketu Díli FC, Provirio Vicente (4) simu kartaun kinur iha minutu 12 hafoin halo falta hasoru Jogadór adversáriu. Maske nune’e, ekipa Karketu Díli FC ne’ebé reforsa hikas hosi kapitaun ekipa Olegario Boavida (6) konsege organiza liña klaran hodi asegura atake ne’ebé adversáriu halo.

Tama ba minutu 24, Jogadór As Ponta Leste Expedito da Conceição (10) marka uluk golu ida hodi lori nia ekipa lidera provizóriu jogu ne’e ho skor 1-0.

Ekipa Karketu Díli FC hahú halo mudansa bá jogu hodi hosi jogadór estrela Paulo Gally Freitas (21) joga barak liu iha klaran hodi hamate adversáriu sira nia jogu no lansa bola as bá iha liña avansadu hodi halo kontra atake.

Haree katak adversáriu sempre halo atake barak liu hosi defeza liña direita, Karketu Díli FC hola inisiativa hodi halo substituisaun ba defeza direita hodi hasai António Martins (2) no hatama defende sentra Domingos Ramos (5) no muda fali defeza José Silva (24) ne’ebé joga iha defeza sentral mai iha parte direita.

Mudansa táktika ne’ebé iha lori dunik rezultadu di’ak ba ekipa Karketu Díli FC tamba tama bá minutu 34, Jogadór estranjeiru Maurício González (11) marka golu ida hodi halo empata bá jogu 1-1. Liu tiha golu ne’e, Jogadór ekipa Karketu Díli FC iha liután vontade hodi halo kontra atake.

As Ponta Leste lahakmatek no nafatin halo kontra atake ba adversáriu hodi buka atu lidera hikas jogu ne’e. Tama ba minutu 44, Jogadór Karketu Díli FC Augusto da Costa (80) hatama tan golu ida hodi muda skor ba 2-1 hafoin simu asisténsia hosi nia maluk Jogadór Paulo Gally Freitas (21). Karketu Díli FC mantein lidera jogu ne’e too primeira parte termina.

AS Ponta Leste vs Karketu Díli FC, Sábadu (11/3/2023). Foto/Elio dos Santos da Costa

Tama ba segunda parte ekipa rua mantein ho ritmu jogu ne’ebé iha maibé As Ponta Leste halo jogu ida agresivu liu no sempre halo atake ba Karketu Díli FC bainhira hetan bola.

Avansadu Karketu Díli FC, Augusto da Costa (80) obrigadu tenke simu kartaun kinur iha minutu 51 hafoin komete erru iha kampu laran. Ekipa rua mantein halo jogu tuir orientasaun táktika ne’ebé iha. Jogadór avansadu As Ponta Leste Marito dos Santos (9) hetan oportunidade osan mean atu hatama golu maibé falla ezekuta bola oportunidade ne’e.

As Ponta Leste hahú halo substituisaun hodi hasai Avansadu Marito dos Santos (9) no hatama Anizo Correia (14) iha minutu 60. Liu de’it minutu rua Karketu Díli FC mós halo substituisaun hodi hasai Janneth Kamare (25) no hatama Januário Fonseca (17).

Ekipa As Ponta Leste kontinua halo tranzisaun bá táktika hodi halo mudansa iha liña klaran hodi hasai Jacinto Soares (24) no hatama Ejivanio da Costa (11) atu bele hasae ritmu jogu iha liña avansadu. Jogadór As Ponta Leste, Expedito da Conceição (10) simu kartaun kinur iha minutu 65 hafoin halo protestu ba desizaun árbitru nian.

Karketu Díli FC kontinua halo presaun ba adversáriu maibé As Ponta Leste mantein halo jogu ida rápidu no sempre fó ameasa ba Karketu Díli FC liu husi jogu ne’ebé iha. Jogadór Anizo Correia (14) hetan oportunidade atu marka golu hafoin mesak ho baliza adversáriu maibé falla.

Karketu Díli FC kontinua halo substituisaun hodi hasai Maurício González (11) no hatama Celso Escurial (16) iha minutu 68. Ekipa Karketu Díli FC hahú halo jogu defensivu hodi asegura vitória ne’ebé iha.

As Ponta Leste mantein halo esforsu atu bele hetan vitória iha jogu ne’e maibé sei falla. Karketu Díli FC kontinua halo tan substituisaun ba Jogadór iha liña avansadu hodi hasai Gelvanio Alberto (10) no hatama Gaudencio Monteiro (7).

As Ponta Leste nafatin buka oportunidade atu halo empata ba jogu ne’e maibé falla tamba ekipa adversáriu mantein disiplina. As Ponta Leste halo tan substituisaun ba Jogadór iha liña klaran hodi hatama Jaimito Soares (4) no hasai Isaac Toni (19) iha minutu 81. Tama ba minutu 84 Jogadór As Ponta Leste Olagar Xavier (18) simu kartaun kinur, hafoin simu kartaun kinur halo kedas substituisaun hodi hasai Jogadór refere no hatama Samuel da Cruz (17). As Ponta Leste maske halo substituisaun ba Jogadór iha liña médiu no avansadu hodi hasae ritmu jogu maibé nafatin falla iha finalizasaun nune’e adversáriu mantein lidera jogu ne’e. Tama ba minutu 90+2 ekipa Karketu Díli FC halo substituisaun ikus hodi hasai Jogadór Agusto da Costa (80) no hatama Silvestre Gama(29). Too jogu termina Karketu Díli FC mantein lídera ho skor 2-1 ho nune’e ekipa estimadu komunidade munisípiu Díli ne’e hetan pontu tolu no sai husi zona degradasaun, enkuantu As Ponta Leste mantein iha zona mean ho pontus ida husi jogu tolu ne’e ekipa As Ponta Leste liu tiha ona.

Hafoin jogu, Maneger ekipa Karketu Díli FC, Eliseu Isaac hateten, jogu hasoru As Ponta Leste la’o di’ak. Karketu Díli FC kontinua hatudu nia mentalidade kampiaun no hanesan klube ne’ebé reprezenta Munisípiu Díli  lori estrutura nia naran fó parabéns bá Jogadór sira no treinadór hotu ne’ebé ho esforsu makas atu Karketu Díli FC bele hetan pontu tolu importante.

Nia subliña desizaun árbitru sira nian sei nafatin sai preokupasaun bá klube tamba haree katak árbitru sira nafatin la disiplina no la hatudu sira-nia vontade no profisionálidade durante lidera jogu tamba ne’e husu atu árbitru sira hadi’a sira nia servisu tamba klube ne’e ema investe no Liga Timorense atu la’o di’ak ba oin árbitru sira nia kontribuisaun mós importante.

Treinadór As Ponta Leste, Lourenço da Costa hato’o parabéns ba ekipa Karketu Díli FC no deskulpa ba adeptu sira ekipa As Ponta Leste nian tamba iha jogu ohin ekipa seidauk bele oferese vitóri.

“Ami rekoñese katak derrota As Ponta Leste nian mai hosi fallansu iha ami hanesan treinadór no jogadór sira tamba iha kampu laran falla ezekuta táktika ho di’ak,” Lourenço da Costa hateten.

Derrota ida-ne’e sai lisaun bá As Ponta Leste atu halo preparasaun di’ak bá jogu sira tuir mai no promete sei oferese vitória ba ekipa no adeptu sira.

Jornalista: Vito Salvadór