Hatutan.com, (26 Jullu 2023), Díli-Policia Ciêntíficia e de Investigação Criminal (PCIC) kaptura ona sidadaun mane ida ho nisial JdC alias Maulay, hanesan autór bá kazu abuzu seksuál hasoru minoridade iha área Behedan, Aldeia Ilimano, Suku Uma-Caduak, Postu Administrativu Lacló, Munisípiu Manatuto.

Lee Mós : Halai Hosi Baucau Kaer Iha Díli, Autór Abuzu Seksuál bá Minoridade Kumpre Prizaun Tinan Hitu

Hafoin komete tiha kazu abuzu seksuál hasoru maioridade iha tinan 2004, kondenadu Maulay   ne’ebé hala’o knar nu’udár profesór iha eskola ida iha área Behedan nian halai subar de’it hosi justisa.

Maulay ho nia belun ne’ebé subar nia durante tinan-19 iha Beduku. Foto/Rogério Pereira Cárceres

Vítima ho inisiál A nu’udár autór ka kondenadu  nia aluna iha ne’ebé nia halo tiha abuzu seksuál minoridade la kolabora ho justisa hodi halai subar de’it  to’o autoridade polísia sira buka tuir foin iha loron, 26 fulan-Jullu ne’e, hale’u tuku 08.10 dadeer, kaptura fali iha área Beduku, Suku Tibar, Postu Administrativu Bazartete, Munisípiu Liquiça.

Parte PCIC halo kapturasaun bá Maulay ho baze mandadu hosi Tribunál Judisiál Primeira Instánsia Baucau nian (TJPIB), ho númeru úniku kriminál  (NUC) 0293/2014 PDBAU, katak, atu buka tuir kondenadu ne’ebé Tribunal kondena antes ona ho desizaun prizaun efetivu tinan-sia (9).

Ho baze bá mandadu detensaun hosi Tribunál Baucau ne’e, parte PCIC halo kedan prosesu ezekusaun, buka tuir no lokaliza autór ninia paradeiru ka hela-fatin (subar fatin). PCIC mós deskonfia ona katak, durante ne’e sidadaun ne’e haksumik an hela iha nia maluk balun nia uma iha Beduku.

Hafoin kaptura tiha Maulay, PCIC halo identifikasaun, hasai fotógrafia, foti nia imprensaun dijitál (sidik jari), no transporta kedan bá Prizaun Becora, hodi kumpri pena durante tinan-sia (9).

Iha Kódigu Penál Timor-Leste nian Artigu 177 kona-bá krime Abuzu Seksuál, númeru 2 hateten katak, sé mak prátika aktu seksuál relevante ho labarik ne’ebé idade seidauk to’o tinan 14, sei hetan pena prizaun tinan 5 to’o 15. 

Bá Maulay nia belun ne’ebé durante ne’e subar nia iha Beduku, PCIC mós prosesa ho Krime Kontra Obstrusaun, iha artigu 284, tuir Lei Kódigu Penal Timor-Leste.

Jornalista: Rogério Pereira Cárceres