Hatutan.com, (20 Dezembru 2023), Díli-Governu liuhosi sorumutuk Konsellu Ministru ordináriu,  Kuarta (20/12/2023), aprova  projetu Dekretu-Lei ida kona-bá rejime direitu titulár bá membru órgaun soberania sira, inklui titulár bá kargu polítiku sira.

Lee Mós: Konsellu Ministru Deside Saláriu Désimu-Terseiru Universál

Reuniaun Konsellu Ministru (KM), Kuarta (20/12/2023). Foto/Espesiál

“Konsellu Ministrus hala’o sorumutuk iha Palásiu Governu, Díli no  aprova projetu Dekretu-Lei, kona-ba Rejime direitus titulár no membru órgaun soberania no titulár kargu polítiku sira nian,” sita komunikadu hosi gabinete prezidénsia Konsellu Ministru ne’ebé Hatutan.com asesu.

Iha komunikadu ne’e mós esplika katak, diploma ida-ne’e ho objetivu atu komplementa rejime sira ne’ebé hatuur ona iha Lei númeru 7/2007, loron 25 fulan-Jullu, no iha Lei númeru 14/2009, loron 21 fulan-Outubru, relasiona ho direitu titulár no membru órgaun soberania no titulár kargu polítiku sira nian.

“Objetivu mak atu konsolida no halo norma sira ne’ebé daudaun ne’e vigora hela, sai komprensivel liután. Diploma ne’e abranje área oioin, inklui direitu ba rezidénsia ofisiál, subsídiu ba hela-fatin, komunikasaun movel, asisténsia médika, no seguransa pesoál,” sita komunikadu.

Projetu Dekretu-Lei ida-ne’e aprova ona hosi Governu Konstitusionál VIII iha Sorumutuk Konsellu Ministrus nian iha loron 15 fulan-marsu tinan 2023, maibé tanba diploma ne’e seidauk hetan promulgasaun, presiza submete fali projetu Dekretu-Lei ida-ne’e bá deliberasaun foun.

Jornalista: Rogério Pereira Cárceres