Hatutan.com, (22 Abríl 2024), Díli– Forum ONG Timor-Leste (FONGTIL) preokupa ho prosesu transparénsia hosi Ministériu Públiku (MP) kona-bá kazu Ró Tranship II ho Expo Dubai ne’ebé FONGTIL submete to’o agora la iha follow-up no MP nonook tiha de’it.

Lee Mós: Kazu Ró Tranship II, CAC Halo Ona Submisaun bá Ministériu Públiku

“To’o agora ami seidauk hetan resposta hosi ita-nia autoridade sira, maibé ami nafatin kontinua tau matan bá ida-ne’e, katak ne’e tenke la’o to’o nia rohan,” Diretór Ezekutivu FONGTIL, Valentim da Costa hateten bá Hatutan.com iha Parlamentu Nasionál, Segunda (22/4/2024).

Ró Tranship II. Foto/Dok.Hatutan.com

Problema ka kazu ne’e tenke iha serteza bá lala’ok sira ho ró Tranship II nia  funsionamentu, kontratu, ho osan sira ne’e tenke nakloke atu iha loron ruma públiku sira mós hatene kona-bá ida-ne’e.

Investigasaun bá kazu ró Tranship II nian ne’ebé hala’o hosi Komisaun Anti-Korrupsaun (CAC, sigla portugés) finaliza ona no tuir mandatu Lei, CAC submete auto notísia dala-rua ona bá Ministériu Públiku hanesan na’in bá asaun penal.

Iha loron 24 fulan-Juñu 2021, CAC hato’o ona auto partisipasaun rezultadu análize kona-bá inspesaun ba ró Tranship II Gresik Indonézia, bá Ministériu Públiku, no iha loron 18 fulan-Agostu 2021, CAC submete tan bá daruak auto partisipasaun rezultadu análize kona-bá inspesaun ba ró Tranship II Gresik Indonézia, bá iha MP maibé to’o agora seidauk iha rezultadu.

Rezultadu investigasaun ka analiza ne’ebé CAC halo ona ba ró Tranship II Gresik Indonézia, hatudu katak deskonfia iha indísiu áa krime partisipasaun ekonomia iha negósiu, tanba inkomprimentu ba prosedimentu aprovizionamentu.

KMP Tranship II, hosi  Surabaya, Indonézia hahú substitui ró-ahi Berlin Nakroma no Success, iha loron  25 fulan-Maiu 2021.

MTK halo kontratu ho ró-ahi KMP Tranship II hosi kompañia estranjeiru Atralata Estrategi hosi Indonézia, ho kada fulan selu $220.000, ne’ebé iha kapasidade tula pasajeiru hamutuk na’in-300, inklui sasán ho tonelada 1.000-resin.

Iha loron 11 fulan-Juñu 2021, Ró ne’e transporta Primeiru-Ministru (PM) atuál ne’ebá, Taur Matan Ruak  ho komitiva (Membru Governu lubuk ida), inklui Konselleiru másimu Partidu KHUNTO, José dos Santos Naimori Bucar ba Postu Administrativu  Ataúro, maibé susar atu atraka iha portu, ikus-mai tenke fila-fali mai Díli ho ró-ahi seluk.

Ho situasaun ne’e, iha loron 12 fulan-Juñu 2021, Ministru Transporte no Komunikasaun José Agostinho da Silva (tempu ne’ebá), ezije fila-fali ba tékniku ró-ahi KMP Tranship II atu submete relatóriu ofisiál ho loloos ba parte investigadór-sira tanba deskonfia mákina ró nian mak avaria.

Kazu Expo Dubai

Delegasaun Timor-Leste ho Uniaun Emiradu Árabe iha foto hamutuk pavillaun Expo Dubai 2020 iha selebrasaun loron nasionál Timor-Leste nian iha loron 18 Outubru 2021. Foto/Espesiál

“Uluk kedas ami iha hanoin ita iha defisiénsia lubuk ida ne’ebé mak la’o liuliu Expo Dubai ninian no tinan ida-ne’e tan Governu iha planu atu asegura Timor-Leste nia prezensa iha Italia iha tan expo ruma. Expo sira ne’ebé mak ita hakarak promove liuliu kona-bá iha ita nia produtu sira ita presiza asegura iha ita-nia atividade eventu sira iha nivel nasionál ne’e tenke la’o atu Timoroan hotu-hotu koñese no orgullu ho produtu sira ne’e mak atu lori ba iha Expo sira nivel internasionál hodi bele motiva ita-nia grupu joven sira ne’ebé mak iha inisiativa halo produsaun ne’e bele kontinua eziste no bele hetan protesaun di’ak mai hosi Ministériu sira,” Valentim da Costa dehan.

Lee Mós: Delegasaun Expo Dubai Prontu Koopera ho CAC kona-bá Keixa FONGTIL

FONGTIL prefere liu halo eventu boot sira iha nivel nasionál atu permite ema hotu-hotu bele esplora nia liman badaen sira bá produtu sira hodi bele haree sá produtu mak tenke bá promove iha expo sira ne’ebé mak sei mai liuliu iha Expo Dubai ho Eropa ne’ebé mak iha planu tinan ida ne’e atu halo tan.

“Karik mak kazu ne’e prosesu pendente nafatin maka  FONGTIL kontinua husu hodi bele hetan informasaun ida ho loloos ba problema ka dezafiu sira ne’ebé ami kestiona” Valentim da Costa afirma.

Kazu sira ne’e FONGTIL se kontinua observa no halo advokasia atu iha loron ruma tenke  hetan nia serteza ba rezultadu.

Iha Kinta, 21 fulan-Outubru 2021,  Diretór Ezekutivu FONGTIL  (tempu ne’ebá), Daniel Santos do Carmo, hato’o keixa bá CAC iha Edifísiu, Faról-Díli, husu atu halo detensaun bá membru Governu na’in-hitu (7) ne’ebé bá partisipa iha expo Dubai durante semana ida tanba hamosu prejuizu boot bá Estadu Timor-Leste.

Konteúdu hosi keixa ne’ebé FOGNTIL submete bá CAC husu atu halo detensaun no kapturasaun bá memru Governu na’in-hitu (7) ho delegasaun na’in-120, la signifika atu lori kedan sira ba tribunál ka bá kadeia, maibé atu prosesa sira tuir padraun legál ne’ebé CAC iha no karik evidénsia sira ne’ebé FONGTIL hato’o mak prienxe duni rekezitu katak sira komete duni irregularidade ruma, kabe ba kompeténsia CAC nian.

Membru Governu na’in-hitu (7) altura ne’ebá  mak hanesan Ministru Koordenadór Asuntu Ekonómiku (MKAE), Joaquim Amaral, Ministru Transporte no Komunikasaun (MTK),  José Agostinho da Silva, Ministru Turizmu, Komérsiu no Indústria  (MTCI), José Lucas do Carmo da Silva, Ministru Petróleu no Minerais, Victor da Conceição Soares, Ministru Agrikultura no Peska, Pedro dos Reis, Vise-Ministru Turizmu, Komérsiu no Indústria, Domingos Lopes Antunes ho Vise-Ministru Negósiu Estranjeiru no Kooperasaun (MNEK), Julião da Silva.

Iha loron 21 fulan-Outubru 2021, Ministru Koordenadór Asuntu Ekonómiku (MAKE), Joaquim Amaral, ne’ebé xefia delegasaun membru Governu na’in-hitu (7) ho ema 120 ba Expo Dubai, deklara  katak,   Estadu no  kualkér membru Estadu prontu ba kualkér situasaun.

Lee Mós: Partisipasaun TL iha Expo Dubai Ba Fase-Matan

Jornalista Estajiáriu :  Lazaro Pereira Quefi