Hatutan.com, (08 Janeiru 2026), Díli–Dirijénte sira iha Institusaun Eletrisidade Timor-Leste, Empreza Públiku (EDTL, E.P) kontínua nonook hodi dezvia husi média ba kazu  projetu fornesimentu karreta bucket truck  ne’ebé deskonfia hamosu korrupsaun no abuzu podér.

Lee Mós: Deskonfia, Korrupsaun iha Fornesimentu Karreta Bucket Truck EDTL, E.P

Karreta bucket truck ne’ebé empreza Haksolok Group fornese ba EDTL,E.P la tuir espesifikasaun tanba iha BoQ kontempla karreta nia marka Isuzu maibé hatama fali Triton. Foto/Espesiál

Projetu fornesimentu karreta bucket truck unidade tolu (3) ho kustu US$216,000.00 neʼebé manan husi empreza fornesidór Haksolok Group la konsege kumpre rekizu balun iha BoQ tanba karreta bucket truck ne’ebé kontempla iha kontratu ne’e karreta ho marka Isuzu, maibé Haksolok Group fonese fali karreta ho marka Triton.

La’ós ne’e deit, tuir avaliasaun tékniku sira-nian katak bucket truck ne’ebé hatuur ka rakit iha karreta triton ne’e la seguru bainhira funsionáriu ka pesoál traballadór sira utiliza ba servisu fatin aas ba manutensaun ai-riin eletrisidade nian, tesi ai-horis, inklui halo manutensaun ba liña distribuisaun eletrisidade nian iha área sira ne’ebé difisil.

Iha Segunda, 05 Janeiru 2026, Hatutaun.com tenta komfirma kestaun ne’e ho   Prezidente Konsellu Administrasaun EDTL, E.P, Paulo da Silva, ho  nia Komisáriu Ezekutivu Korporativu (KEK), Júlio de Jesus Gonçalves, maibé husi ofisiál media husi EDTL. E.P informa katak, dirjente na’in-rua seidauk tama servisu.

Iha loron tuir mai, Tersa (06/01/2026), hale’u tuku 08:30 dadeer, Hatutan.com nafatin hakat bá edifísiu EDTL.E.P hodi halo  konfirmasaun, maibé  razaun seluk tan husi ofisiál media  katak,  Prezidente Konsellu Administrasaun EDTL,E.P, Paulo da Silva, lisensa hela no sei tama servisu iha  loron,  08 fulan-Janeiru tinan 2026, tanba ne’e Komisáriu Ezekutivu Korporativu, Júlio de Jesus Gonçalves, la bele fó kometáriu, ho razaun katak  ténke hetan autórizasaun husi  Prezidente Konsellu Administrasaun EDTL,E.P.

Hatutan.com kontaktu Prezidente Konsellu Administrasaun  EDTL, E.P, Paulo da Silva liu-husi telefonika no manda mensajen  ba WatsApp 7850xxx, maibé númeiru ne’e la ativu.

 Iha Kuarta (07/01/2026), Hatutan.com kontínua halo komunika liu husi telefoni no mesajen, ba  Komisáriu Ezekutivu Korporativu (KEK) Eletrisidade Timor Leste Empreza Públika (EDTL, E.P), Júlio de Jesus Gonçalves, informa fali  katak okupadu ho hela ekontru.

“Ami enkontru hela, presiza karik mesajen mai,” Júlio de Jesus Gonçalves infroma liu husi mensajen.

Iha Kinta, (08/01/2026), Hatutan.com hasoru malu ho Prezidente Konsellu Administrasaun EDTL,E.P, Paulo da Silva ho nia  Komisáriu Ezekutivu Korporativu, Júlio de Jesus Gonçalves, hafoin enkontru ho Ministru Obras Públika (MOP), Samuel Marçal, maibé  parte rua seidauk bele ko’ali tanba iha enkontru  urjente ida fali iha EDTL,E.P.

Nune’e Hatutan.com kontinua tuir mai to’o iha Edifisíu EDTL,E.P hodi halo aprosimasaun atu bele iha dispnibilidade tempu entrevista konfirmasaun ho   Prezidente Konsellu Administrasaun EDTL,E.P, Paulo da Silva no nia  Komisáriu Ezekutivu Korporativu, Júlio de Jesus Gonçalves, maibé kontínua hateten la iha tempu tanba okupadu ho servisu.

Iha soirn seluk mós Hatutan.com  mós tenta halo komfirmasaun dala rua bá  Diretóra Ezekutiva Empreza Haksolok Group, Domingas Maria Fátima Ximenes, maibé funsionáriu balun neʼebé servisu iha empreza Haksolok Group informa katak Diretóra Ezekutiva seidauk fila husi rai li’ur.

“Ami nia Diretora seidauk fila husi rai li’ur, karik fila maka ami kontaktu ita-boot (Jornalita), hodi mai entrevista ho nia,” infroma husi traballadór sira iha  Empreza Haksolok Group.

Aliende ne’e,  Komisáriu Adjuntu Komisaun Anti Korrupsaun (CAC-sigla portugés) bá asuntu Investigasaun Kriminal, Alvaro Maria Freitas hateten, kazu fornesimentu karreta bucket truck CAC rejista ona iha sistema laran no tempu badak sei hato’o xamada bá parte rua, hanesan EDTL,E.P ho Empreza Haksolok Group.

“Kazu ne’e iha ona prosesu investigasaun, parese aban hanesan ne’e, 08 fulan-Janeiru 2026,  ami sei hato’o ona karta xamada  bá sira,  tanba rejitadu hotu ona, sei fahe bá ekipa investigadór sira hodi hala’o sira nia prosesu investigasaun,” Komisáriu Adjuntu Komisaun Anti Korrupsaun (CAC-sigla portugés) bá asuntu Investigasaun Kriminal, Alvaro Maria Freitas  hateten  bá Hatutan.com, liu husi telefonika, Kuarta (07/01/2026).

 Jornalista: Marcelino Tomae