Hatutan.com, (30 Dezembru 2025), Díli—Projetu fornesimentu karreta bucket truck unidade tolu (3) ba Eletrisidade Timor-Leste, Empreza Públika (EDTL,E.P) la tuir nia espesifikasaun ne’ebé kontempla iha fatura kuantidade nian ka BoQ (Bill of Quantity).

Lee Mós: FONGTIL Nota Projetu Adjudikasaun Direita iha EDTL,E.P Laiha Transparénsia

Karreta bucket truck ne’ebé empreza Haksolok Group fornese ba EDTL,E.P la tuir espesifikasaun tanba iha BoQ kontempla karreta nia marka Isuzu maibé hatama fali Triton. Foto/Espesiál

Projetu fornesimentu karreta bucket truck   unidade tolu (3) ho kustu US$216,000.00 ne’ebé manan husi empreza fornesidór Haksolok Group la konsege kumpre rekizu balun iha BoQ tanba karreta  bucket truck   ne’ebé sitada iha kontratu ne’e karreta ho marka Isuzu, maibé  Haksolok Group fonese fali karreta ho marka Triton.

La’ós ne’e deit, tuir avaliasaun tékniku sira-nian katak bucket ne’ebé hatuur iha karreta triton ne’e la seguru bainhira funsionáriu ka pesoál traballadór sira utiliza ba servisu fatin aas ba manutensaun ai-riin eletrisidade nian, tesi ai-horis, inklui halo manutensaun ba liña distribuisaun eletrisidade nian iha área sira ne’ebé difisil.

Tuir fontes balun iha EDTL,E.P ne’ebé husu atu la bele públika nia identidade hateten, karreta bucket truck    ne’e la tuir ona espsifikasaun, maibé tékniku sira ne’ebé envolve iha projetu ne’e asina tiha ona P.O, maske nune’e, Prezidente Konsellu Administrasaun EDTL,E.P, Paulo da Silva, husu parte sira atu haruka fila karreta ne’e ba empreza fornesidór.

Mézmu nune’e, fontes ne’e hateten, Komisáriu Ezekutivu Korporativu (KEK) EDTL,E.P, Júlio de Jesus Gonçalves, ezije ba parte sira administrasaun no finansas atu prosesa lalais ona pagamentu tanba EDTL,E.P simu ona karreta refere no rajaun seluk ne’ebé nu’udár fundamentu Komisáriu Ezekutivu Korporativu, Júlio de Jesus Gonçalves nian katak karreta bucket truck marka Isuzu ne’e difisil tebes atu hetan iha merkadu ho tempu ne’ebé limitadu.  

Pagamentu ba projetu fornesimentu karreta bucket truck unidade tolu ne’e to’o agora sei pendente hela tanba Prezidente Konsellu Administrasaun EDTL,E.P, Paulo da Silva,  husu atu haruka fila karreta ne’e no halo justifikasaun katak karreta ne’e la tuir nia espesifikasaun.

“Agora ne’e parte sira hanesan superior iha órgaun ezekutivu  EDTL,E.P nian deskonfia malu loos, tanba parte balun la konkorda atu halo pagamentu no balun reclama no ezize tenke halo pagamentu ona. Iha ne’e mak deskonfia parte balun simu porsentu husi empreza karik,” fontes ne’e hateten.

Bá kestaun ne’e, Segunda (29/12/2025),  iha tuku 12:45 otel,  Hatutan.com   hakat bá  Edifísiu EDTL.E.P iha Caicoli, hodi halo konfirmasaun  bá iha Prezidente Konsellu Administrasaun EDTL,E.P, Paulo da Silva ho mós  Komisáriu Ezekutivu Korporativu (EDTL,E.P, Júlio de Jesus Gonçalves, hodi fó klarifikasaun,  maibé husi pesoal resepsionista gabinete konsellu administrativu EDTL.E.P nian informa katak  Prezidente ho Komisariu  okupadu hela.

Iha loron tuir mai, Tersa (30/12/2025), haleu tuku 09:00 dadeer,  Hatutan.com,  tenta  atu konfirma tan asuntu sira-ne’e ho Prezidente EDTL,E.P, Paulo da Silva  ho Komisáriu Ezekutivu Korporativu, Júlio de Jesus Gonçalves, maibé  husi parte ofisiál média, informa katak, Prezidente ho Komisáriu okupadu hela, tanba atu halo ekontru ho Ministru Obrás Públiku Samuel Marçal.

Husi sorin seluk mós  Hatutan.com  halo konfirmasaun Diretóra Ezekutiva Empreza Haksolok Group,   Domingas  Maria Fátima Ximenes,  maibé   funsionáriu balun ne’ebé  servisu iha empreza Haksolok Group   informa  katak Diretóra Ezekutiva  halo hela viajen bá estranjeiru  no sei fila hikas mai Timor-Leste iha fulan-Janeriu 2026.

Komisáriu Adjuntu Komisaun Anti Korrupsaun  (CAC-sigla portugés) bá asuntu Investigasaun Kriminal, Alvaro Maria Freitas bá Hatutan.com, via telefonika informa katak  sé kazu   fornesimentu karreta becket truck unidade tolu (3) husi Empreza Haksolok Goup  ne’e rejista ona iha Komisaun Anti-Korrupsaun, nune’e sei  halo distribuisaun servisu ba inspetór no investigadór sira.

“Ita-boot (jornalista-red) bele kontaktu fali iha ha’u depois  ita tama ona tinan foun 2026, tanba ne’e sei  disktribui no fahe bá inspetór  no investigadór sira  hodi halo estudu bá prosesu ne’e,  atu nune’e, halo ajenda bá servisu nian,” Komisáriu Adjuntu CAC, Alvaro Maria Freitas hateten.

Nia konsidera aktu ne’e, hanesan   komete korrupsaun no abuzu podér, no kazu sira indikasaun hanesan ne’e, iha krime rua ka tolu  hanesan abuzu podér, partisipasaun ekonómia, no  krime administrasaun da noza.

“Ha’u la bele halo  komentáriu liu tanba ha’u konfirma ona Diretór Investigasaun kriminál  José Verdiál katak kazu ne’e  seidauk distribui bá iha  investigadór sira,” nia informa.

Jornalista: Marcelino Tomae