Hatutan.com, (13 Janeiru 2026), Díli-Polísia Nasionál Timor-Leste liuhusi Diresaun Servisu Investigasaun Kriminál Nasionál (DSIKN), Tersa (13/01/2026),  hale’u tuku 09:00 dadeer Otl, ezekuta mandadu Tribunál Judisiál Primeira Instánsia Díli (TJPID) ho NUC: 086/25-PNSIK detein Reitór Universidade Nasionál Timor Lorosa’e (UNTL) ho inisial JM,  Vise-Reitór inklui kargu xefia na’in-haat seluk tan.

Lee Mós: Polísia Halo Buska no Apreensaun iha Gabinete Reitór no Pro-Reitór Sira UNTL

PNTL halo buska no apreensaun ba reitór, vise-reitór ho dirijente na’in-haat seluk tan husi UNTL, Tersa (13/01/2026). Foto/Juvinal Cabral dos Santos

Diresaun Servisu Investigasaun Kriminál  Nasionál (DSIKN)  ba iha edifisiu UNTL hodi ezekuta mandadu TJPID hodi halo buska, apreensaun no detensaun ba Reitór UNTL  ho insiál JM no Vise-Reitór ba Asuntu Administrasaun Finansa no Administradór Jerál, inklui kargu xefia na’in-haat seluk tanba iha indisiu ba krime falsifikasaun dokumentu no anotasaun téknika.

Dirijente sira UNTL nian ne’ebé suspeitudu ba kazu krime falsifikasaun dokumentu no anotasaun téknika ne’e kolabora di’ak tebes ho autoridade seguransa hodi entrega aan no submete ba detensaun.

Vise-Reitór ba Asuntu Administrasaun Finansa no Administradór Jerál inklui kargu xefia na’in- haat seluk polísia ba foti  iha sira-nia servisu Universidade Nasionál Timor Lorosa’e  bazeia ba mandadu husi Tribunál Judisiál Primeira Instánsia Dili ho NUC: 086/25-PNSIK nune’e halo detensaun ba sira.

Durante Polísia  ezekuta mandadu hodi  halo  buska no apreensaun  ba gabinete  Reitór no Vise-Reitór UNTL no mós  ba dirijente nain haat seluk nia fatin   hodi rekolla evidénsia balun tan iha gabinete reitor, no iha Dirsaun Jerál Administrasaun Finansas UNTL hodi nesesita ba investigasaun.

Polísia mós kontinua kedan ba halo buska no apreensaun ba iha Reitór UNTL ho inisiál JM no Vise-Reitór nia rezidénsia inklui kargu Xefia  na’in-haat ne’e nia rezidénsia, nune’e rekolla tan evidénsia balun hodi nesesita ba prosesu investigasaun.

Hafoin remata buska no apreensaun ba Reitór UNTL no Vise Reitór inklui kargu Xefia na’in haat nia uma polísia lori kedan suspeitu nain-lima, kompostu husi Vise-Reitór no kargu Xefia na’in-haat ba edifisiu Servisu Investigasaun Kriminál Nasionál Komandu Jerál PNTL hodi submete ba prosesu identifika hafoin ne’e detein sira durante oras 72 molok aprezenta ba Ministeriu Públiku (MP)  .

 PNTL ezekuta mandadu Judisiál hodi halo buska, apreensaun no detensaun iha UNTL ne’e tanba  iha krime falsifikasaun dokumentu ka notasaun téknika, ne’ebé akontese iha tinan 2024.

 Violasaun ne’e previstu iha artigu 303 husi kódigu penál Timor-Leste nian mak hanesan;

Artigu 303 (Falsifikasaun ba Dokumentu ka Notasaun Téknika) alínea 1) hateten, ema ne’ebé, ho intensaun atu halo aat ba ema seluk ka Estadu, ka atu hetan ba sira-nia an rasik ka ba ema seluk, benefísiu ilejítimu:  

1. Fabrika dokumentu falsu ka notasaun téknika, falsifika ka altera dokumentu-ida, ka abuza asinatura hosi ema seluk hodi kria dokumentu falsu;
2. Hateten ho falsu faktu legalmente relevante iha dokumentu ida ka notasaun téknika;
3. Falsu atestadu, bazeia ba koñesimentu profisionál, tékniku, ka sientífiku, kona-ba kondisaun fíziku ka mentál ka kualidade ema ida nian, animál, ka sasán;
4. Uza dokumentu ruma ka notasaun téknika sira ne’ebé refere iha parágrafu anteriór sira, fabrikadu ka falsifika ka hasai hosi ema seluk; sei hetan pena prizaun to’o tinan-tolu ka multa.

Alínea 2). Kualkér asaun disruptiva iha dispozitivu tékniku ka automátiku ne’ebé maka hetan influénsia ba rezultadu notasaun nian hanesan ho falsifikasaun notasaun téknika nian.

Alínea 3). Kualkér tentativa bele hetan kastigu.

Jornalista: Juvinal Cabral dos Santos