Jornalista: Felix Fernandes

Hatutan.com, (24 Outubru 2026), Díli – Diresaun Nasionál Meteorolojia no Jeofízika (DNMG, sigla portugés) fó sai alerta ida katak kualidade anin iha Díli “la saudavel” hafoin loron balun komesa di’ak oituan.

Iha komunikadu ofisiál  ne’ebé Hatutan.com asesu iha pajina offisiál DNMG, Domingu (24/10/2026),  fó sai avizu katak kualidade anin  iha teritóriu nasionál, liuliu iha Díli aat  no to’o nível “la saudavel”.

DNMG fó alerta ba populasaun kona-bá ahi-uar foun ne’ebé mai husi ahi-han iha rejiaun Papua Osidental-Indonézia ne’ebé  fó impaktu ba  Timor-Leste iha loron hirak mai oin.

Alerta DNMG nian ne’e válidu to’o loron 30 Outubru-ne’e,  hodi relata mós katak nível ahi-suar nian, nu’udar rezultadu husi ahi-han (inséndiu) iha rejiaun Papua Osidental, Indonézia, sei komesa tama iha illa Timor hahú husi Domingu-lokraik, 25 Outubru 2026.

Tuir análize DNMG nian, situasaun ne’e sei to’o Kuarta, 28 Outubru, no bele fó impaktu negativu ba kualidade anin nian no redus vizaun (visibilidade) iha territóriu Timor-Leste.

Kondisaun atmosfera sei komesa di’ak fali hahú husi Kinta-lokraik ka kalan-boot, 29 Outubru 2026.

Ba medida prevensaun nian, DNMG rekomenda  ba populasaun atu evita atividade fízika iha li’ur bainhira konsentrasaun suar nian aas; mantein odamatan no janela sira taka netik atu redus ahi-suar tama iha uma laran; kuidadu ba grupu vulneravel sira: labarik, katuas/ferik, inan isin-rua no ema ne’ebé moras respiratóriu ka fuan; uza máskara ne’ebé loos, hanesan N95, bainhira presiza sai ba li’ur; se labele dada iis  ho di’ak ka moras kakorok, ba buka kedas asisténsia médika bainhira presiza.

DNMG sei kontinua monitoriza evolusaun kondisaun meteorolójika nian oras 24 laran no sei fó sai informasaun foun, karik iha alterasaun signifikativa. (*)