Jornalista: Maria Angelita Sandi Belo

 Hatutan.com, (20 Outubru 2026) Díli– Timor-Leste no Austrália kontinua haforsa kooperasaun bilaterál hodi hamutuk kombate servisu ilegál, krime transnasionál no ameasa seguransa marítima, inklui peska ilegál.

Komandante Komandu Fronteira Marítima Austrália, Kontra-Almirante Brett Stoner hasoru malu ho PM Xanana Gusmão iha Palásiu Governo, Tersa (20/10/2026). Foto/Maria Angelita Sandi Belo

“Timor-Leste hanesan parseiru forte Austrália nian ne’ebé servisu hamutuk hodi kombate ba servisu ilegál no krime transnasionál,” Komandante Komandu Fronteira Marítima Austrália, Kontra-Almirante Brett Stoner  informa ba jornalista sira hafoin sorumutuk ho Primeiru-Ministru  Xanana Gusmão iha Palásiu Governu, Tersa (20/10/2026)

Kontra-Almirante Brett Stoner, hatete  Timor-Leste sai parseiru importante ba Austrália iha esforsu hamutuk atu enfrenta ameasa sira ne’ebé afeta seguransa no interese ekonómiku nasaun rua nian.

Iha enkontru ne’e foka ba rezultadu husi kooperasaun bilateral no área sira ne’ebé nasaun rua sei kontinua servisu hamutuk iha futuru.

“Iha sorumutuk ida-ne’e, ita ko’alia kona-ba rezultadu balu, inklui parseria ne’ebé asina ona akordu iha tinan 2024, no área kooperasaun sira ne’ebé ita sei kontinua dezenvolve hamutuk hanesan parseiru,” Kontra Almirante Brett informa.

Nia hatete, Timor-Leste no Austrália hanesan nasaun marítima ne’ebé fahe fronteira marítima, nune’e kooperasaun no parseria entre nasaun rua ne’e importante atu garante jestaun fronteira no seguransa marítima.

Tuir Stoner, akordu ne’ebé asina iha 2024 la limita de’it ba jestaun fronteira marítima, maibé mós loke dalan ba kooperasaun iha área fronteira terrestre, inklui Aeroportu, Imigrasaun no área relevante seluk.

Aleinde seguransa fronteira, sorumutuk ne’e mós aborda ameasa sira seluk, inklui seguransa sibernétika (cybersecurity), ne’ebé presiza kolaborasaun entre nasaun rua.

Nia salienta, peska ilegál hanesan ameasa ne’ebé bele afeta interese ekonómiku nasaun nian. Tanba ne’e, Austrália no Timor-Leste kontinua servisu hamutuk atu prevene no kombate atividade peska ilegál iha área marítima.

“Ohin loron, ita diskute mós kona-bá oinsá Austrália no Timor-Leste bele servisu hamutuk hodi kombate ameasa ida-ne’e. Hanesan ita hatene, nasaun rua ne’e nia fronteira to’o iha área marítima, no peska ilegal mós bele afeta atividade ekonómika nasaun nian,” hakotu Stoner.

Nia enfatiza katak Austrália sei kontinua servisu hamutuk ho parseiru sira, inklui Timor-Leste, atu kombate ameasa sira ne’ebé bele prejudika seguransa no interese ekonómiku.

Sorumutuk ne’e reflete kompromisu husi nasaun rua atu kontinua hametin parseria no kooperasaun iha área seguransa fronteira, marítima no luta hasoru krime transnasional. (*)