Hatutan.com, (04 Outubru 2022), Díli-Eis Konsul Jerál Timor-Leste bá  Estadu Nova Gales do Súl, Sidney-Australia, Luciano Valentim da Conceição “Timor Maubere”, akompaña hosi Defensór Públiku Sergio Quintas, Tersa (04/10/2022), haleu tuku 09:00 dadeer Otl, hatama keixa bá Tribunál Distritál Díli (TDD) kontra Ministra Negósiu Estranjeiru no Kooperasaun (MNEK), Adazija dos Reis Magno, tanba iha tinan 2021 la transfere osan iha konta bankária Estadu nian bá TL nia konsul jerál iha Austrália.

Eis Konsul Jerál Timor-Leste bá  Estadu Nova Gales do Súl, Sidney-Australia, Luciano Valentim da Conceição “Timor Maubere” ho Defensór Publiku, Sergio Quintas, hatama keixa ba TDD kontra MNEK Adaljiza Magno, Tersa (04/10/2022). Foto/Elio dos Santos da Costa

Timor Maubere hateten, razaun nia hatama keixa ne’e, relasiona ho akontesimentu ne’ebé ligadu no deklarasaun halo hosi Ministra Adaljiza dos Reis Magno, iha fulan-Marsu 2021 uainhira osan operasionalidade ne’ebé durante fulan-lima la halo transferénsia hosi Dili bá iha Sidney-Austrália.

“Deklarasaun  ne’ebé señora Ministra Adaljiza Magno, halo, hatete katak, osan hosi Dili Timor-Leste, manda, labele to’o iha Austrália, tanba konsul jerál timor-leste, altera ka muda ka troka ona konta bankária refere. Deklarasaun laloos no la tuir ninia dalan loloos,” Luciano Timor Maubere hateten bá jornalista sira, hafoin hatama keixa iha TDD.

Luciano Timor Maubere, dehan tuir regra jerál no universál ne’ebé aplika iha eEtadu ka nasaun hotu-hotu, iha ninia konta bankária ofisiál iha rai-liur, laiha diplomata ida mak iha direitu ka kompeténsia atu bele muda.

“Ha’u repete tán, en-regras jerais, universál, nasaun hothotu, estadu hothotu iha mundu ne’e, inklui Estadu timor-Leste, diplomata hothotu, tantu embaixadór ka konsul jerál ida, nia laiha direitu no kompeténsia ruma, atu bele muda ka altera, ka troka konta bankária Estadu nian. Asuntu refere, liga ho konta bankária iha timor, ita iha lei própriu, só ministériu das finansas mak iha direitu bá loke, ka halo alterasaun, ka muda, ka troka,” Luciano Timor Maubere  hateten.

Tuir Luciano, deklarasaun ne’ebé ministra negósiu estranjeiru no kooperasaun, Adaljiza dos Reis hatete iha públiku, ne’ebé sai iha televizaun no média timor-leste, deklarasaun laloos no  prejudika tebtebes ka estraga tebtebes imájen Timor-Leste nian iha Austrália.

“Ha’u nu’udár pesoál Luciano Valentim da Conceição, no ha’u nu’udár xefe misaun iha Austrália iha tempu ne’ebá, ka konsul jerál Timor-Leste iha Sidney, ha’u iha direitu hodi bele halo defeza bá ha’u nia aan, tanba señora ministra ne’e nia deklarasaun la’os de’it estraga ha’u nia integridade pesoál, nu’udár xefe misaun, maibé, hamoe mós naran Timor-Leste iha rai-liur, partikularmente iha  Austrália,” nia hateten.

Iha fatin hanesan, Defensór públiku, Sergio Paulo Dias Quintas, informa, nia kliente Luciano Maubere nu’udár sidadaun ida, bá husu asisténsia tékniku gratuita bá iha defensória públika. Ema hotu hatene katak, defensória públika ne’e instituisaun estatál ida, no nia papél mak atu fó asisténsia tékniku gratuitta bá kualker sidadaun ne’ebé maka karentes.

“Entaun, ohin dadeer ne’e, nu’udár defensór públiku, rejista tiha ona prosesu sívil ida, kontra ministra negósiu estranjeira, sobre tudu, liu-liu estadu, kona-bá asaun deklarativa de indemnização por facto ilisitos,” Defensór públiku, Sergio Paulo Dias Quintas, hateten.

Iha Lei Kódigu Sívil, artigu 417, hateten katak, ema ne’ebé ho dolo, ka intensaun, tanba prátika faktu sira ilisitu ruma ne’ebé mak fó prejuizu bá ema seluk, nia iha obrigasaun, para atu tenke selu indemnizasaun bá ema ne’ebé mak sofre indemnizasaun.

To’o notísia ne’e publika seidauk hetan konfirmasaun hosi MNEK Adalzija Magno tanba sei okupadu ho servisu Estadu nian.

Jornalista :  Rogério Cárceres