Hatutan.com, (25 Outubru 2022), Díli—Prezidente Repúblika (PR), José Ramos-Horta simu ona dekretu lei númeru 37/2022 kona-bá subsídiu uma-ka’in fim do ano $200, maibé sei tetu molok foti desizaun no husu atu altera tiha hodi tau prioridade bá família vulnerável.

Prezidente Repúblika (PR), José Ramos-Horta. Foto/Elio dos Santos da Costa.

Ramos-Horta hateten, Dekretu Lei subsídiu uma-ka’in iha ona meza leten, maibé Xefe Estadu prefere liu utiliza lei anteriór ne’ebé implementa iha tempu pandemia Covid-19, tanba lei anteriór ne’ebé governu halo ne’e mak di’ak loos.

Lee Mós: KM Aprova Subsídiu $200 Universál, PM Taur Lakohi Simu

“Subsidiu ne’e fó de’it ba uma-ka’in sira ne’ebé ki’ak liu ka vulnerável loos, lalika fó ba hotu-hotu ida ne’e mak loos. Ha’u sei halo reflesaun didi’ak no sei ko’alia fila fali ho reprezentate povu iha uma fukun Parlamentu Nasionál atu haree hikas Dekretu Lei ne’e,” Ramos-Horta hateten iha Kuartél Jenerál F-FDTL Fatuhada, Tersa (25/10/2022).

Xefe Estadu ne’e afirma, situasaun difísil buka ajuda dala ida tán populasaun, tanba ne’e tenke buka ajuda duni populasaun lalika ba tán sira ne’ebé iha empregu no vensimentu di’ak hela.

Prezidente Repúblika seidauk iha desizaun finál ba Dekretu Lei ida-ne’e atu veta ka promulga, maibé nafatin husu atu subsídiu ne’e fó liu prioridade ba família sira vulnerável.

Antes ne’e, Konsellu Ministru (KM) aprova projetu Dekretu-Lei, ne’ebé aprezenta hosi Vise-Primeira-Ministra no Ministra Solidariedade Sosiál no Inkluzaun, Armanda Berta dos Santos, ba alterasaun dahuluk ba Dekretu-Lei nú. 37/2022, loron 25 fulan-maiu, kona-bá subsídiu fim do ano ba uma-ka’in sira.

Ho intervensaun lejizlativa ida-ne’e hala’o ajustamentu ba testu redasaun Dekretu-Lei ne’e, hodi evita dúvida ruma kona-bá se mak benefisiáriu sira hosi apoiu sosiál ne’e, nune’e reafirma fila-fali desizaun hodi atribui subsídiu ba uma-ka’in sira hotu, ne’ebé halo ona rejistu to’o loron 28 fulan-fevereiru tinan 2022, independentemente hosi sira iha situasaun vulnerável ka la’e ka independentemente hosi sira iha membru balun ne’ebé fó atividade profisionál iha ámbitu administrasaun públika nian ka la’e.

Lee Mós: Konsellu Ministru Mós “Kontra-Malu” Kona-bá Desizaun Subsídiu $200

Jornalista: Vito Salvadór