Hatutan.com, (12 Outubru 2021), Díli—Abitante iha aldeia 04 Setembru, suku Komoro, postu  administrativu Dom Aleixo, preokupa ho eletrisidade ne’ebé kontinua mate-lakan tanba estraga ona sasán eletróniku barak.

Angela Soares Sarmento. Foto/Hatutan.com

Alende estraga sasán eletróniku komunidade, eletrisidade mate-lakan ne’e mós afeita ba sira ne’ebé hala’o negósiu kiik, tanba iha fim de semana ahi mate loron tomak no laiha informasaun ruma hosi parte Eletrisidade Timor-Leste, Empreza Públika (EDTL, E.P).

Abitante, Angela Soares Sarmento (46), temi sasán eletróniku iha uma-laran ne’ebé hetan estragu hosi eletrisidade mate-lakan mak hanesan, jelera ne’ebé uza hodi halo zelu-fatuk hodi faan, televizaun, inklui bola lampu tenke troka hela de’it.

“Ami faan zelu-fatuk, no tunu sate, nune’e naan manu iha jelera estragu totál.  Ami hola hela de’it pulsa eletrisidade maibé la uza,” Angela Soares Sarmento, hato’o preokupasaun ne’e ba Hatutan.com iha rezidénsia, aldeia 04 Setembru, Komoro, Tersa (12/10/2021).

Nune’e mós, Yofen Soares (31) enfreta situasaun hanesan, tanba eletrisidade mate-lakan estraga hotu sasan uma-laran no labele halo zelu-fatuk, atu faan tutan ba negosiante ambulante-sira.

“Ami nia moris 20% dependénte ba sasan eletrónika. Bainhira ahi mate, ami atu halo zelu-fatuk oinsá,” Yofen Soares, hateten ba Hatutan.com, iha rezidénsia aldeia Ramelau Delta, Komoro.

Hatán ba preokupasaun ne’e, parte EDTL,E.P liu hosi ninia pájina ofisiál iha média sosiál halo klarifikasaun katak, eletrisidade sei kontinua mate-lakan tanba durasaun Aging liña distribuisaun ho nia asesoris maioria tuan ona, liu ona tinan 10 nune’e fásil atu aat.

Atu hadi’a liña distribuisaun no asesories, EDTL,E.P oras-ne’e halo hela prosesu tenderizasaun no iha ona manán-na’in ne’ebé iha tempu badak sei asina kontratu no kompañia sei hatama ka fornese spare parts acesories, atu uza hodi halo manutensaun ba liña distribuisaun-sira iha Díli.

Parte EDTL,E.P rekoñese koan-bá eletrisidade iha sidade Díli ne’ebé sempre mate-lakan no dalaruma sempre hetan insultu hosi komunidade iha pájina ofisiál EDTL,E.P, nune’e ho haraik an pasiénsia nafatin hodi kontinua hala’o serbisu tuir kondisaun ne’ebé iha.

Parte seluk ne’ebé kontribui ba eletrisidade mate maka fatór natureza, liu-liu bainhira udan no anin boot.

“Ezemplu, iha ai-sanak, nú-tahan, bainhira anin hú, tohar, ka baku kona fiu, entaun tenke avaria. Alende ne’e, mota tun, rai halai hodi sobu poste ka ai-rin eletrisidade,” klarifikasaun iha pájina ofisiál EDTL,E.P.

Iha fulan hirak nia laran, ekipa Task Force halo limpeza ba feeder hotu-hotu, atu evita labele avaria tanba ai-horis sira.

Ba poste sira ne’ebé ameasadu, EDTL,E.P halo esforsu hodi identifika atu haree oinsá bele halo ajustamentu no re-alokasaun, tanba infraestrutura sira ne’ebé eziste, kuaze iha risku boot ba estragu bainhira akontese udan, anin no rai-halai tanba, poste ka torre iha rai-lolon, mota ninin, foho leten inklui ai-okos.

EDTL,E.P halo hela inspesaun no sukat transformadór iha feeder hotu-hotu iha Díli laran, hodi halo re ajustamentu ba liña, troka trafo-sira no halo planu antesipasaun tanba durante ne’e, laiha atividade ida ne’e, no hein trafo rebenta mak ba troka.

Durante ne’e laiha Single line diagram ne’ebé difikulta tebes tékniku-sira atu halo serbisu manutensaun, tanba ne’e, bainhira EDTL sai ona hanesan empreza, ekuipa Task Force balun foku hodi dezenvolve single line diagram ne’e ba feeder hotu-hotu, nune’e bele fásil no ajuda serbisu operasaun ho manutensaun ba liña distribuisaun, liu liu iha sidade Díli.

Nune’e, EDTL,E.P halo esforsu hotu-hotu, apezar difikuldade ne’ebé iha, sei serbisu makás atu garante estabilidade ba públiku ho di’ak.(bit)