Hatutan.com, (03 Fevereiru 2026), Díli-Tribunál Rekursu deside no ezije Estadu Timor-Leste selu kompensasaun ho pagamentu tipu rua ba antigu Prezidente Konsellu Administrasaun Rádiu no Televizaun Timor-Leste, Empreza Públika (RTTL,E.P), Gil da Costa “Puto Naldo Rei”.

Lee Mós: Ofisiál Mídia SEKOMS Impede Jornalista Hatutan.com Halo Kobertura iha RTTL,E.P

Antigu Prezidente Konsellu Administrasaun RTTL,E.P, Gil da Costa “Puto Naldo Rei” akompaña husi nia advogadu sira Firma Da Silva Teixeira & Associados, Lda halo konférensia imprensa, Tersa (03/02/2026). Foto/Juvinal Cabral dos Santos

Liuhusi konferénsia imprensa iha Salaun Asosiasaun HAK, Tersa (03/02/2026), ne’ebé akompaña husi advogadu sira husi Firma Advogados Da Silva Teixeira & Associados, Lda, Gil da Costa “Puto Naldo Rei”, informa  iha loron 09 Outubru 2025, Tribunál Tribunál Rekursu hakotu prosesu ho akórdaun ida hasoru desizaun sala Governu nian hodi kondena Estadu Timor-Leste no ezije selu kompensasaun ho pagamentu tipu rua;  ida (1) selu nia saláriu korrespondente ba períodu entre loron 16 Janeiru 2019  to’o  loron 01 Fevereiru 2022  (durante tinan tolu) ho kada fulan ho montante totál US$68,094.00 no mós juru sira ho taxa legál 6%, hahú sura husi data sitasaun to’o loron pagamentu.

Rua (2) Estadu Timor-Leste selu mós ba Gil da Costa “Puto Naldo Rei” ho  montante US$2,000.00 ba prejuízu naun patrimoniál ho mós taxa legál jurus 6%, sura husi data sitasaun to’o loron pagamentu.

Nia afirma, ho laran haksolok tebes mak nia simu informasaun katak Tribunál Rekursu emite ona akórdaun. Katak foti desizaun ikus ona, kona-bá keixa ne’ebé submete husi Firma Advogados Da Silva Teixeira & Associados, Lda, ne’ebé reprezenta nia iha kazu ezonerasaun la ho  justa kauza, neʼebé Konsellu Ministrus (KM) determina, tuir rezolusaun aprova iha  loron 9 Janeiru 2019.

Gil da Costa “Puto Naldo Rei” simu posse husi Primeiru-Ministru Mari Alkatiri iha loron 01 Fevereiru 2018 nu’udár Prezidente Konsellu Administrasaun Rádiu Televizaun Timor-Leste (RTTL) ba priódu tinan-haat (2018-2022).

Kontratu ne’ebé Gil da Costa “Puto Naldo Rei”  asina iha loron 01 Fevereiru 2018 ho Sekretáriu Estadu Komunikasaun Sosiál (SEKOMS) iha VII Governu ba periódu mandatu tinan-haat (2018- 31 Janeiru 2022). Nune’e, bainhira Gil da Costa “Puto Naldo Rei hahú nia mandatu, orsamentu jerál estadu laiha no funsionáriu hotu-hotu RTTL,E.P nsimu saláriu husi transferénsia públika mai husi orsamentu duodésimu ne’ebé jere husi VII Governu.

Gil da Costa “Puto Naldo Rei esplika, molok VII Governu ramata ukun, transferénsia públika ba pagamentu saláriu sira ba fulan-Jullu 2018 tama tiha ona iha konta bankária RTTL, E.P.

Bainhira VIII Governu hahú ukun iha  loron 22 Juñu 2018 hafoin eleisaun antesipada, RTTL tutela SEKOMS Merício Juvinal dos Reis “Akara”. RTTL, E.P enfrenta difikuldade finanseira no presaun oioin husi membru Governu no mós husi Ministru Reforma Lejislativa no Asuntu Parlamentár,  Fidelis Manuel Leite Magalhães. Biar nune’e,  Gil da Costa “Puto Naldo Rei no funsionáriu permanente no kontratadu sira hotu RTTL,E.P kontinua hala’o programa sira no atividades RTTL, E.P. nian.

Husi fulan-Agostu 2018, SEKOMS Merício Juvinal dos Reis “Akara” no Ministru Reforma Lejislativa no Asuntus Parlamentares, Fidelis Manuel Leite Magalhães lakohi duni halo transferénsia públika ba RTTL, E.P.

Gil da Costa “Puto Naldo Rei” simu posse husi Primeiru-Ministru Mari Alkatiri iha loron 01 Fevereiru 2018 nu’udár Prezidente Konsellu Administrasaun Rádiu Televizaun Timor-Leste (RTTL) ba priódu tinan-haat (2018-2022). Foto/dok.Tatoli

“Ha’u halo pedidu dalabarak liuhusi karta ne’ebé ha’u diriji ba sira. Sira nunka hatán, ho ida-ne’e ha’u konvoka reuniaun ho membru vogál sira RTTL, E.P. nian no ami aprova selu saláriu ba funsionáriu sira ho osan publisidade ne’ebé tama ba konta RTTL E.P. nian. Halo ida- ne’e, tanba funsionáriu sira hala’o ona sira-nia knaar no sira tenke simu osan tuir kontratu ne’ebé asina ona ho Prezidente sesante RTTL, EP, Milena Abrantes iha VI Governu konstitusionál nia okos,” nia esplika.

Ho kedas intensaun atu hasai Gil da Costa “Puto Naldo Rei husi kargu prezidente Konsellu Administrasaun RTTL,E.P, VIII Governu nomeia Francisco da Silva Gari, iha altura ne’ebá, asesor ba SEKOMS hodi halo auditória ba RTTL, E.P.

“Biar la aprezenta rezultadu auditória ho faktu ka fundamentu jurídiku ne’ebé de’it, Konsellu Ministrus deside ezonera ha’u iha  loron 09 Janeiru 2019 no nomeia kedas Francisco da Silva Gari mak sai fali Prezidente RTTL, E.P. hodi troka ha’u,” Gil da Costa “Puto Naldo Rei” lembra.

Gil da Costa “Puto Naldo Rei”hatutan, atu hateten fila-fali katak desde VIII governu hahú ukun, husi Agostu 2018 to’o Janeiru 2019, nunka halo transferénsia públika ba RTTL, E.P, to’o ezonera  nia iha loron 9 Janeiru 2019.

“Konsellu Ministrus (KM) lakohi konsidera ha’u-nia direitu ba defende-an hasoru alegasaun falsa sira no ha’u-nia direitu atu kontinua servisu nu’udar sidadaun Timoroan ida ho kualifikasaun komprovada iha área média, iha esperiensia nu’udar diretór no jestór no komprova ona iha prátika katak ha’u iha kompeténsia profisionál atu halo jestaun di’ak, tuir lei RDTL no estatutus RTTL, E.P,” nia afirma.

Naldo Rei informa, tanba nia konsidera desizaun hatún husi Konsellu Ministrus ne’e la’ós justa, nia husu ajuda husi Firma Advogadus Da Silva Teixeira & Associados, Lda, hodi submete keixa hasoru VIII Governu Konstitusionál iha Tribunál Díli iha Fevereiru 2019.

“Tribunál Dili no Tribunál Rekursu lori tempu kleur hodi hakotu kazu ne’e maibé ha’u agradese tebes tanba foti desizaun ho imparsialidade tomak,” nia hateten.

Puto Naldo Rei hateten, prosesu alegasaun no julgamentu hodi koleta no análize evidénsia no depoimentu sira husi sásin kredível sira, ne’e duni haan tempu kleur.

“Tan desizaun Konsellu Ministrus hodi ezonera ha’u husi kargu Prezidente RTTL E.P., ha’u hasoru susar no sente prejudikadu tebes iha ha’u-nia vida profisionál durante tinan hitu, maibé, justisa hatuur ona,” Naldo Rei hateten ho agradese.

Nu’udar sidadaun, nia sente kontenti tanba desizaun Tribunál bele fanu ukun- nain sira atu labele halo dezisaun tuir sira-nia hakarak de’it. Katak ukun-nain sira, bainhira sira hala’o sira-nia servisu, sira mós tenke iha responsabilidade hodi konsidera no garante ema seluk nia direitu bazeia ba lei no regulamentu ne’ebé vigora iha  rai doben Timor-Leste.

Naldo Rei hateten, nia kontenti tanba tribunál halo justisa tuir duni faktus provadus kona-bá violasaun ba nia direitu nu’udar sidadaun no ema profisionál média nian. Ezonerasaun dezumana ne’e halo ho manobra oioin ho objetivu polítiku atu hasees ema ho kór polítika oinseluk.

“Ha’u hakarak deklara ba públiku katak justisa mak dalan loos liu atu hetan lia- loos. Maski prosesu la’o neineik, maibé lia-loos sempre manán, Timor-Leste hamriik tuir duni regras Estadu Direitu nian, ne’ebé define iha Konstituisaun RDTL,” Puto Naldo Rei afirma.

Ikus mai nia hakarak agradese ba nia advogadu sira husi Firma Da Silva Teixeira & Associados, Lda no nia sasin sira hotu. Ho sira-nia apoiu tomak sempre fó korájen mai ba nia no fiar metin katak lia-loos sempre manán maski dalaruma justisa iha moras todan nia laran.

Vitória ida-ne’e Puto Naldo Reis oferese ba povu ain-tanan sira, povu kbiit-la’ek sira, povu ne’ebé hamrook ba justisa no ba povu Timor-Leste ne’ebé luta ba lia-loos.

“Imi mak ha’u-nia aspirasaun no vitória ne’e ba ha’u no ba ita tomak,” antigu Prezidente RTTL Puto Naldo Rei agradese.

Jornalista: Juvinal Cabral dos Santos