Hatutan.com, (10 Janeiru 2023), Díli– Prezidente Komisaun B Parlamentu Nasionál, José Agostinho Sequeira “Somotxo”, husu no dezafia ekipa sira iha servisu informasaun polísia no militár, atu buka tuir autór prinsipál ne’ebé ho kro’at hakotu matebian Isaac Hornai Baptista nia vida, iha área Delta-Elemloi, Díli, foin lalais ne’e.

Lee Mós : Xefe Estadu Husu Autoridade Defeza-Seguransa Kombate Krime Organizadu Ho Sériu

Prezidente Komisaun B Parlamentu Nasionál, José Agostinho Sequeira “Somotxo”. Foto/Elio dos Santos da Costa

Prezidente Komisaun B ne’ebé trata asuntu negósiu estranjeiru, defeza no seguransa ne’e konsidera Timor-Leste rai ki’ik no fasil tebes atu deskobre paradeiru autór prinsipál sira ne’ebé oho tiha vítima hodi hala’i subar to’o ohin loron.

Kazu  omisídiu Delta-Elemlio ne’e akontese iha Sesta (06/01/2023), hale’u tuku 02:00 madrugada Otl, iha área Delta-Elemloi, Aldeia São José Ai-meti Laran, Suku Comoroa, Postu Administrativu Dom Aleixo, Munisípiu Dili.

“Ida ne’e bele lokaliza lalais, hanesan investigasaun sira bele tuir, tanba Timor-Leste ne’e ki’ik,” Deputadu José Agostinho Sequeira “Somotxo” hateten bá Hatutan.com iha kna’ar fatin PN, Tersa (10/01/2023).

Deputadu Somotxo dehan, situasaun atuál la’ós foin akontese iha 06 fulan-Janeiru 2023 mai to’o horikalan, maibé, ida ne’e, akompaña dezde pasajen tinan-tuan bá tinan foun, mosu kedan vítima mate. Tán ida ne’e mak tinan foun ida ne’e hanesan triste tebes, tanba envezde simu tinan foun ne’e ho haksolok, dame, pás, maibé simu fali ho triste.

“Ha’u fiar katak, responsavel sira bá seguransa ho defeza, ho órgaun sira hanesan polísia investigasaun kriminál, informasaun sira, ho ita nia SNI, bele hanesan toma ona medida balu. Maibé, komisaun B ninia preokupasaun ne’e, la tarde ida, tanba iha bainrua ka bain-tolu, ami konvoka ona reuniaun ida para hanesan halo analiza bá situasaun ida dezde loron  01 fulan-Janeiru mai to’o agora,” Deputadu Somotxo hateten.

Situasaun kriminál ida ne’ebé mak oras ne’e akontese iha Díli laran ho Timor-Leste tomak, deputadu Somotxo sempre hatete katak, dala-barak polítiku sira kondena membru arte marsiál. Maibé, TL seidauk to’o iha kondenasaun ida -ne’e, ka to’o membru arte-marsiál atu hanesan sai autór bá krime sira ne’ebé iha Dili laran, ho iha fatin seluk.

“Ne’ebé, ha’u nia haree ne’e bá buat seluk fali. Tán ida ne’e mak konvoka ministériu defeza, seguransa ho Xefe estadu maiór jenerál, Komandante jerál, ho serbisu sira investigasaun kriminál nian, sira hotu, para ami haree analiza hamutuk situasaun ne’e, sé mak loloos autór bá akontesimentu sira ne’e. iha rai laran ka mai hosi rai li’ur,” Deputadu Somotxo hateten.

Deputadu Somotxo hatutan, krime sira ne’ebé oras ne’e mosu, iha indísiu bá krime organizadu. Tanba ema sira ne’ebé vítima ka mate ne’e, la haree katak ema ne’e iha relasionamentu ho ema ne’ebé bá oho ne’e ninia problema ruma. Maibé, haree movimentu sira iha gravasaun CCTV ne’e, hanesan buka kualkér ema ida.

Lee Mós : Kazu Omisídiu iha Delta-Elemloi, PNTL Identifika Ona Paradeiru Autór Prinsipál

PNTL Halo hela Serbisu

Portavós komandu jerál PNTL, Superintendente Xefe Polísia, Arnaldo de Araújo.

Iha sorin seluk, portavós Komandu Jerál PNTL, Superintendente Xefe Polísia, Arnaldo de Araújo dehan, oras ne’e, PNTL hala’o hela nia serbisu iha terrenu, hodi buka tuir autór sira ne’ebé envolve iha kazu sira iha Díli, liu-liu kazu omisídiu iha Elemloi.

Purintendente Xefe Polísia Arnaldo de Araújo dehan, PNTL nia vizibilidade iha terrenu sempre iha. Ema barak haree prezensa polísia nian iha ne’ebé de’it, maibé, buat ida akontesimentu sira hanesan ne’e, la espera atu mosu. Krime sira ne’e hotu derrepente mosu.

Portavós Komandu jerál PNTL ne’e dehan, polisia la’ós anju, atu bele hatene dehan, aban ka oras ida, ema atu halo problema iha ne’ebá. Maibé, ida ne’e espontáneu, mosu ne’e ema la hatene.

“PNTL iha sempre iha ne’ebé de’it. Postu sira, iha fatin-fatin, ita boot sira haree PNTL iha ne’ebá. Ha’u atu hatete katak, PNTL serbisu maka’as tebetebes, ita boot sira mós haree iha oras 24 nia laran, sira hala’o serbisu. Kazu sira mosu ne’e, ha’u bele dehan katak, ne’e balu iha planu, balu laiha planu. Dala-ruma imi dehan katak, polísia ne’e la serbisu. Maibé polísia ne’e espalla iha ne’ebé-ne’ebé de’it, fila-fali bá ema indivíduu nia hahalok ne’e de’it. Sé nia hahalok di’ak, buat ne’e labele akontese hanesan ne’e,” Arnaldo de Araújo hateten.

Jornalista: Rogério Pereira Cárceres