Hatutan.com, (16 Maiu 2023), Díli—Partidu Congresso Nasionál Reconstrução Timorense (CNRT), promete atu muda estatutu munisípiu Ataúro bá Zona Espesiál tanba Ataúro iha potensialidade bo’ot ba turizmu ne’ebé bele lori reseita barak ba Estadu Timor-Leste (TL).

Prezidente Partidu Congresso Nasionál Reconstrução Timorense (CNRT), Kay Rala Xanana Gusmão iha hela viajen bá Ataúro ho roo, hodi realiza mini kampaña iha kampu futeból Vila-Maumeta, Tersa (16/05/2023). Foto/CNRT.

Promessa ne’e hato’o hosi Partidu CNRT, Kay Rala Xanana Gusmão liu hosi mini kampañaa ne’ebé realiza iha kampu futeból Vila-Maumeta, Tersa (16/05/2023).

Lee Mós: Xanana Promete bá Povu Oé-Cusse: CNRT Sei Haree Fali Lei ho Lejizlasaun RAEOA Nian

“Ataúro la merese sai munisípiu. Iha tinan kotuk ha’u mai iha ne’e estudante sira husi universidade lubuk ida ba haree Baleia iha tasi laran no iha tinan kotuk mós ha’u bá to’o Lisboa hodi tuir konferénsia boot ida ONU nian kona-bá tasi azul. Iha ne’ebá rai barak temi kona-bá sira nia biodiversidade barak, maibé ha’u dehan ba sira iha Timor-Leste iha illa Ataúro biodiversidade riku liu iha mundu,” Xanana Gusmão hateten.

Tanba ne’e, bainhira CNRT ba kaer hikas ukun, sei muda estatutu munisipiu Ataúro ba Zona Espesiál, tanba illa ne’e iha nia biodiversidade ne’ebé riku liu iha mundu no sei sai hanesan destinasaun turizmu ba mundu.

Antes ne’e governu halo Lei ida atu Ataúro tama hamutuk ho Oecusse iha prosesu implementasaun Zona espesiál, maibé iha VIII Governu tau fali Ataúro ba munisipiu, maibé hafoin sai munisípiu governu rasik laiha planu atu halo saída ba Ataúro.

Ataúro la presiza sai munisipiu atu dezenvolve aan, tanba ho tara-bandu ne’ebé mak agora funsiona hela iha Atauro, labarik, ferik no katuas sira respeita hela natureza no nia biodiversidade ne’ebé iha.

Ho kustume tarabandu halo Atauro nia riku soin ba biodiversidade ne’e barak liu tán, ida-ne’e mak tenki mantein, tanba biodiversidade úniku iha mundu, ne’e duni husu ba Atauro oan sira labele estraga ahu ruin iha tasi laran, tanba ahu ruin ne’e mak sei lori osan barak mai iha Ataúro.

Mini kampaña CNRT iha munisípiu Atauro ne’e hetan seguransa másimu hosi Polísia Nasionál Timor-Leste (PNTL) no observa direta hosi órgaun eleitorál Comissão Nasionál das Eleições (CNE) no Provedoria dos Direitos Humanos e Justiça (PDHJ).

Jornalista: Vito Salvadór