Hatutan.com, (21 Maiu 2023), Díli—Prezidente Partidu Congresso Nacional Reconstrucção de Timorense (CNRT), Kay Rala Xanana Gusmão kestiona tinta indelével bá vota nian laiha kualidade tanba ne’e husu bá órgaun eleitorál hanesan Comissão Nacional de Eleições (CNE) ho Sekretariadu Tékniku Administrasaun Eleitorál (STAE) atu kontrola ho sériu.

Tinta indelével bá vota nian ne’ebé utiliza iha Eleisaun Parlamentár 21 Maiu 2023. Foto/Elio dos Santos da Costa.

Preokupasaun ne’e Xanana hato’o bainhira ho oan mane Kay Olo Gusmão bá ezerse direitu votu iha sentru votasaun sede Suku Balibar, Postu Administrativu Laulara, Munisipiu Aileu.

Lee Mós: Timor-Leste Vota, Xanana: CNRT Mak Manan no Lú Olo Mós Garante FRETILIN Manan

“Eleisaun loron ida ne’e tinta laiha kualidade. Ida ne’e Comissão Nacional de Eleições favór ida ita presiza hadi’a,” Xanana Gusmão hateten.

Ho situasaun ne’e Xanana konsidera órgaun eleitorál sira laiha responsábilidade bá povu no rai Timor-Leste.

“Ne’e falta de responsábilidade bá povu no bá rai ida-ne’e. Tenke deskonfia. Ne’e mak bolu atensaun bá CNE, atu haree buat sira ne’e hotu,” Xanana hateten.

Hatán bá ida-ne’e, Brigadista STAE ne’ebé destaka iha Sentru Votasaun Sede Suku Balibar, Postu Administrativu Laulara, Eulália da Silva Soares rekoñese katak, tinta indelével ne’ebé tau marka iha liman fuan hafoin eleisaun, ‘loos duni’ kualidade laiha.

Prezidente Sentru Votasaun Balibar ne’e dehan, nia rasik la hatene katak problema ne’e atu mosu tanba konsidera buat ne’e sensitivu tebes no bainhira transporta hosi STAE nasionál, buat hotu taka metin, maibé, dadeer ne’e foin loke atu uza bá vota, maka haree katak iha duni problema kona-bá tinta laiha kualidade.

“Ohin, ita-boot sira haree rasik iha ne’e, problema boot tebes ho tinta. La’ós iha sentru ne’e mesak de’it mak ho problema tinta, la’e. Foin telefone bá Diretóra atu foti desizaun, maibé ida-ne’e kuaze dehan Timor laran tomak problema tán de’it tinta,” Eulália esplika.

Brigadista STAE ne’e hatutan, modelu tinta indelével ne’ebé uza bá votasaun iha Eleisaun Parlamentár 2023 ne’e diferente tebes ho tinta ida antes ne’ebé uza iha Eleisaun Prezidensiál 2022.

“Tinta ne’e diferensia tebes ho eleisaun Prezidensiál, ita hothotu hatene ida ne’e fásil tebes atu sai. Ne’ebé, ha’u nu’udár Prezidente sentru de votasaun ha’u husu haraik aan de’it, tanba ita mak komprende de’it ona bá, agora ne’e hothotu problema kona-bá tinta ne’e, ita atu halo nusá,” nia husu.

Hatán kona-bá oinsá mak bele kontrola atu ema ida labele vota dala-rua, Eulália dehan, meiu ne’ebé sira sei uza maka sidadaun sé mak vota ona, bainhira atu tau tinta bá liman fuan, ekipa polling staff sei hatama eleitór sira-nia liman, karrega to’o dala-rua tolu.

“Sim, ida ne’e mak agora ha’u telefone ona bá ami nia diretór STAE, hein diretór mak foti desizaun. Maibé, agora tanba ita haree bá kestaun tempu tuku 15:00 loktaik Otl tenke taka ona. Tanba ne’e maka ha’u fó ona tempu bá ha’u nia  ofisiál tinta nian ne’e, koko atu karrega liman nafatin, atu labele sai, tanba tinta mak mai hanesan ne’e ona ita atu halo nusá tán. Ami esforsu nafatin,” Eulália hateten.

Jornalista: Rogério Pereira Cárceres