Hatutan.com, (24 Maiu 2023), Díli—VIII Governu Konstitusionál prepara ona relatóriu atu antrega (hand over) ba Governu foun, Prezidente Repúblika (PR), José Ramos-Horta agradese ba Primeiru Ministru (PM) Taur Matan Ruak ne’ebé hala’o ona misaun kompletu.

Prezidente Repúblika (PR), José Ramos-Horta hala’o enkontru ho Primeiru Ministru (PM) Taur Matan Ruak iha Palásiu Prezidensiál Nicolau Lobato Bairru-Pité, Kuarta (24/05/2023). Foto/Elio dos Santos da Costa.

Agradesimentu ne’e Ramos-Horta hato’o durante enkontru ho Primeiru Ministru iha Palásiu Prezidensiál Nicolau Lobato Bairru-Pité, Kuarta (24/05/2023).

Lee Mós: Rezultadu Final STAE: CNRT Hetan Kadeira 31 no FRETILIN Kadeira 19

“Hanesan ha’u hateten ona iha diskursu seimónia 20 Maiu, felisita no agradese Primeiru Ministru ne’ebé simu todan iha 2020 durante krize polítika, depois mai inundasaun dala rua kedas, Covid-19,” Ramos-Horta hafoin enkontru.

Advertisement

Alende ne’e ko’alia kona-bá buat barak, liu-liu kona-bá asuntu importante governu nian balun ne’ebé pendente inklui projetu Aeroportu Internasionál Nicolau Lobato, tenke ba oin, ba nesésidade adezaun TL ba ASEAN ne’ebé importante no urjente labele demora tán.

“Governu mós prepara daudaun, tranzisaun hand over,  ko’alia ida ne’e ha’u sempre disponivel bele ko’alia ho Xefe Governu, sempre odamatan loke hanesan uluk ha’u eis Prezidente Repúblika, Primeiru Ministru sempre fó atensaun no sempre hasoru-malu apoia buat hotu-hotu. Ha’u nu’udár eis Prezidente Repúblika hakarak ko’alia no hakarak halo, ha’u laiha buat barak,” Xefe Estadu esplika.

Iha fatin hanesan, Primeiru Ministru Taur Matan Ruak hateten, nia informa ba Xefe Estadu katak Governu ida-ne’e preparadu ona, última enkontru Konsellu Ministru nian sei akontese iha 17 Juñu loron ne’ebé Tribunál Rekursu sei fó-sai konfirma ninia rezultadu no sai iha Jornál Repúblika.

Depois loron tuir mai, Governue ne’e hein de’it ona membru governu da-sia nian atu bele mai simu no entrega tranzisaun.

“Ha’u bele hateten, ha’u termina ha’u nia mandatu, hanesan mós sira ne’ebé uluk assume hanesan Prezidente Repúblika, Jenerál, Komandante Guerilla ne’e misaun kompletu. Ha’u nia kontribuisaun kiik-oan, oitoan ha’u termina ha’u nia misaun ho nasaun ida katak, ha’u bele kontribui ba ita nasaun ninia dezenvolvimentu, buat ida ne’ebé ha’u sente realiza ona,” Taur Matan Ruak subliña.

Advertisement

Jornalista: Vito Salvadór