Hatutan.com, (10 Juñu 2023), Díli—Prezidente Repúblika (PR), José Ramos-Horta husu Partidu Demokrátiku (PD) ne’ebé eziste tinan 22 ona tenke prepara an di’ak liu tán hodi servi povu iha futuru.

Prezidente Repúblika (PR), José Ramos-Horta konversa ho Prezidente Partidu Demokrátiku (PD), Mariano Asanami Sabino iha ámbitu serimónia aniversaériu PD bad ala 22 iha sede nasionál Colmera, Sábadu, (10/06/2023). Foto/Elio dos Santos da Costa.

Xefe Estadu hato’o mensajén ne’e ba kuadrus, militantes no simpatizantes PD nian iha âmbito selebrasaun aniversáriu PD bá dala-XXII, ne’ebé hala’o iha sede nasionál Colmera, Sábadu, (10/06/2023).

Lee Mós: Enkontru Semi-Formál Ho Xefe Estadu, CNRT-PD Aseita Kalendáriu Sesaun VI Lejislatura Iha 22 Juñu

Ramos-Horta husu PD prepara an di’ak liu tán, tanba bainhira la prepara an,  lakon tempu, loron la’o daudaun, loron ida ne’ebé mak liu ona la fila, semana ida liu, liu ona, ne’e duni prepara an.

Iha 2027-2028, sei tau iha jerasaun foun sira nia kabas. Jerasaun foun ne’ebé hahú ona iha 2002, desde primeiru governu jerasaun foun tama iha governu hanesan PD, ema balun Independente, balun ho FRETILIN no elementu indepedente lubuk ida.

“Ha’u nia mandatu falta tinan 4. Ha’u sei buka serbisu hamutuk ho jerasaun foun ho PD. Maibé, ho FRETILIN sira hotu-hotu atu bele haree 2027 ba oin no ho Avo Nana governu atuál. PD tenki halo buat ne’ebé di’ak liu. Nasaun ida ne’ebé unidade makás liu, Demokrasia nafatin no povu nia moris la’o di’ak, investimentu bo’ot mai iha Timor Leste,” Ramos-Horta hateten.

Ramos-Horta haksolok mai Sede PD, partidu ida prezente, partidu ida ne’ebé futuru, hanesan ema hotu hatene, nia ho maun bo’ot Xanana desde loron dahuluk harii partidu ne’e sempre apoia.

“PD konsege moris nafatin, aguenta, rekoopera, monu, kontinua manán tinan 20 esperiénsia. La’ós partidu foun ida. Lider PD la’ós líder foun ne’eb’e laiha esperiénsia Parlamentár, governasaun, akadémika, emprezariál, esperiénsia internasionál. Ne’e duni, prepara an didi’ak tinan lima mai ne’e prepara an liu tán,” nia enkoraza.

Iha fatin hanesan, Prezidente PD, Mariano Asanami Sabino hateten, aniversáriu ida-ne’e importante teb-tebes tanba PD tama ona bá idade 22.

Tanba ne’e, Assanami fó parabéns ba povu tomak, ba joven sira ne’ebé mak na’in ba PD, ba feto ho mane no ema hotu-hotu ne’ebé esforsu lori esperansa ba PD.

PD povu hotu nian, hotu-hotu hein katak PD ba Estadu no hotu-hotu hein katak PD sei buras, sei la’o di’ak nu’udár kontinuasaun hosi prinsípiu lutadór sira katak, nasaun ida ne’e sei sai nasaun Demokrátiku.

Jornalista: Vito Salvadór