Hatutan.com (21 Setembru 2023), Díli—Prezidente Parlamentu Nasionál (PPN), Maria Fernanda Lay fó pose ba Konsilleira Conselho Imprensa (CI), Isabel Maria Fernandes de Jesus hosi substitui Expedito Dias Ximenes bá restante mandatu.

Prezidente Parlamentu Nasionál (PPN), Maria Fernanda Lay fó pose ba Konsilleira Conselho Imprensa (CI), Isabel Maria Fernandes de Jesus, iha sala konferénsia PN, Kinta (21/09). Foto: Elio dos Santos da Costa.

Isabel Maria Fernandes de Jesus prontu hodi kontinua servisu iha nia mandatu nu’udár Konsilleira bá Conselho Imprensa Timor Leste.

Lee Mós: Expedito Ximenes Substitui Virgílio Guterres Nu’udar Prezidente Interinu CI

“Ha’u prontu atu bele kontinua servisu ne’ebé mak atuál Sekretáriu Estadu Komunikasaun Sosiál husik hela. Maske ho restante mandate, maibé ha’u mai ho onrá ida katak, ha’u prontu atu kontinua. Ha’u sei koopera ho ha’u nia belun Konselleiru sira seluk,” Isabel Fernades hateten hafoin simu pose iha sala konferénsia PN, Kinta (21/09).

Nune’e mós Prezidente Parlamentu Nasionál (PPN), Maria Fernanda Lay espera katak ho membru foun CI nian bele kompleta kompozisaun orgaun reguladora meius komunikasaun sosiál nian hodi hala’o servisu di’ak liu tán.

Isabel Maria Fernandes de Jesus, Moris iha Suku Uailili Munisípiu Baucau iha loron 11 Novembru tinan 1987.

Ninia espesializasaun akadémika iha área Komunikasaun nian ne’ebé frekuenta iha Sekolah Tingi Ilmu Komunikasi Bandug Indonesia   (STIKOM) iha 2012.

Ativu hanesan jornalista hahú iha tinan 2014 to’o 2016 iha Radiu Televizaun Timor Leste. Iha tinan 2017-2019 hanesan koordenadora produsaun ba programasaum iha Grupu Mídia Nasionál (GMN-TV). Iha tinan 2019-2022 assume kna’ar nu’udár diretora  informasaun iha GMN-TV.

Jornalista Estajiária: Zita Menezes