Hatutan.com, (21 Setembru 2023), Díli- Ministériu Asuntu Kombatente no  Libertasaun Nasionál (MACLN) hamutuk ho Konsellu Kombatente Libertasaun Nasional (CCLN) kontínua halo verifikasaun bá segunda etapa bá dadus veteranu sira ne’ebé rejista iha tinan 2009.

Lee Mós: Governu Foun Tenke Rezolve Dadus Veteranu Sira Rejistu iha 2009

Konférensia imprensa konjunta hosi MACLN ho CCLN iha Salaun Maubai, CCLN, Comoro, Díli, 21 Setembru 2023. Foto/Vito Salvadór

Tuir kalendáriu bá verifikasaun ne’ebé Hatuta.com asesu relata kartak verifikasaun bá dadus veteranu sira ne’ebé rejista iha 2009 bá segunda etapa nian sei han tempu loron 51, signifika sei hahú iha loron 28 fulan-Setembru no termina iha loron 30 fulan-Novembru tinan ne’e.

Dadus hosi MACLN hatudu katak veteranu sira ne’ebé rejista iha tinan 2009 hamutuk 124. 782, no antes ne’e iha mandatu VIII Governu Konstitusionál halo ona verifikasaun bá dadus hamutuk 93. 946 (75%) no iha segunda etapa iha mandatu IX Governu Konstitusionál sei halo tan verifikasaun bá dadus veteranu hamutuk 30.836 (25%) hodi kompleta.

Ministru MACLN, Gil da Costa Monteiro Oan Soru, liuhosi  konférensia imprensa konjunta, Kinta (21/09/2023), iha Salaun Maubai CCLN, Comoro, Díli, hateten verifikasaun dadus 2º etapa ne’ebé rejistu iha 2009 kontinua fali ona no sei hahú  iha loron 28 fulan-Setembru tinan 2023 iha munisípiu hotu-hotu, no se hala’o iha Postu Administrativu ida-idak, tuir kalendáriu ne’ebé determina ona.

Nia afirma kalendáriu no lista naran ne’ebé sei verifika, ida ne’e sei taka iha sede munisipál CCLN ida-idak, no lista ida ne’e ba de’it naran sira ne’ebé rejistu tiha ona no ema hirak ne’ebé sidauk hala’o ninia verifikasaun  bá ema ne’ebé verifika ka hetan ona validasaun sei laiha oportunidade iha períodu ikus ne’e.

Ba kombatente sira hotu-hotu ne’ebé sidauk valida tenke hakbesik an bá ekipa validasaun no aprezenta kartaun eleitorál iha momentu valida dadus. Karik la marka prezensa iha oportunidade ikus liu ida -e’e, MACLN sei konsidera hanesan eskluidu.

“Programa validasaun hahú iha tinan 2019 no valida tina ona iha territóriu tomak hamutuk 93.946 rejistu (75,3%), no iha previzaun atu validasaun bá segunda etapa ne’e sei remata iha fulan-Novembru tinan ida-ne’e. Durasaun validasaun bá munisípiu ida-idak la hanesan tamba depende númeru rejistu atu valida, tanba validasaun sei hala’o iha Postu Administrativu sira tuir ida-idak nia moris fatin,” MACLN Gil da Costa Monteiro Oan Soru hateten.

Nia informa iha validasaun ikus liu ida-ne’e ekipa verifikadór sei konsentra de’it iha Postu Administrativu husi moris fatin kombatete nian, no se la tun to’o suku, tamba oportunidade iha suku liu ona no kombatente mak la marka prezensa.

Ba Kombatente Libertasaun Nasionál ne’ebé rejista liu hus Komite 12 de Novembru no partisipa iha Manifestasau 12 Novembru, Komite rasik mak sei valida tuir kalendáriu ne’ebé mak sei determina liu husi Komite 12 Novembru em kolaborasaun ho MACLN.

Iha biban hanesan Prezidente CCLN, Vidal de Jesus Riak Leman hateten, bá Komisáriu CCLN no ekipa tékniku sira ne’ebé sei bá halo verifikasaun bá dadus veteranu sira iha munisípiu no postu administrativu sira atu kumpre misaun lolos tuir giaun ne’ebé iha no orientasaun sira ministériu nian.

“Buat ne’ebé ha’u atu hateten mak ida-ne’e,  kuandu imi tun bá halo verifikasaun tenke kumpre giaun ne’ebé MACLN halo, hodi evita falsifikasaun dadus veteranu,” Vidal de Jesus Riak Leman afirma.

Prezidente CCLN ne’e mos husu ba Komisáriu CCLN no ekipa tékniku sira atu aproveita tempu ho másimu hodi halo servisu iha terrenu nune’e bele aselera servisu verifikasaun ba dadus veteranu sira ne’ebé rejista ona nune’e bele hakat fali ba etapa tuir mai.

Dadus veteranu ne’ebé rejista iha 2009, munisípiu Aileu totál dadus veteranu  8.907, verifika ona 5.326 no tama ba segundu etapa sei verifika tan 3.581.

Munisípiu Ainaro totál dadus veteranu  10.199, verifika ona 6.721 no tama ba segundu etapa sei verifika tan 3.478.

Munisípiu Baucau totál dadus veteranu  15.252, verifika ona 12.163 no tama ba segundu etapa sei verifika tan 3.089.

Munisípiu Bobonaro totál dadus veteranu  12. 976, verifika ona 11.042  no tama ba segundu etapa sei verifika tan 1.934.

Munisípiu Covalima totál dadus veteranu    9.940, verifika ona 8.309  no tama ba segundu etapa sei verifika tan 1.631.

Munisípiu Díli totál dadus veteranu    7.467, verifika ona 3.979 no tama ba segundu etapa sei verifika tan 3.488.

Munisípiu Ermera totál dadus veteranu  12. 606 ,verifika ona 10.283  no tama ba segundu etapa sei verifika tan 2.323.

Munisípiu Lautém totál dadus veteranu    9.612, verifika ona 8.616 no tama ba segundu etapa sei verifika tan 996.

Munisípiu Liquiça totál dadus veteranu    11.015, verifika ona 7.308  no tama ba segundu etapa sei verifika tan 3.707.

Munisípiu Manatuto totál dadus veteranu    8.014, verifika ona 6.222 no tama ba segundu etapa sei verifika tan 1.792.

Munisípiu Manufahi totál dadus veteranu  hamutuk  6.827, verifika ona 5.054 no tama ba segundu etapa sei verifika tan 1.773.

Rejiaun Administrativu Espesiál Oé-Cusse (RAOA) totál dadus veteranu  3.957, verifika ona 3.513 no tama ba segundu etapa sei verifika tan 444.

Munisípiu Viqueque totál dadus veteranu   7.851, verifika ona 5.369 no tama ba segundu etapa sei verifika tan 2.482.

Dadus sira ne’ebé rejista la liuhosi munisípiu ka la rejista iha munisípiu hamutuk 42 no seidauk verifika. Fora de Timor  ka diaspora iha 117 ne’ebé verifika ona hamutuk 41 no seidauk verifika 76.

Jornalista: Vito Salvadór