Hatutan.com (27 Setembru 2023), Díli-Prezidente Parlamentu Nasionál (PPN), Maria Fernanda Lay no Embaixadór Uniaun Europeia iha Timor-Leste, Mac Fiedrich, Kuarta (27/09/2023), halo kortezia hodi ko’alia kona-bá oinsá Timor-Leste bele halo Jestaun finansas públika ho di’ak.
Lee Mós: APC Simu Doasaun Euro 550,000 hosi Uniaun Europeia
Embaixadór Uniaun Europeia iha Timor-Leste Marc Fiedrich. Foto/Zita Menezes
Embaixadór Uniaun Europeia iha Timor-Leste, Marc Fiedrich hateten iha enkontru kortezia ne’e sira ko’alia liu kona-bá oinsá bele servisu hamutuk ho Parlamentu Nasionál (PN) liuliu iha transfaránsia finanseira no mós oinsá Uniaun Europeia nia haree bá esforsu ne’ebé mak Parlamentu Nasionál hala’o liuliu iha jestaun finansas públika .
“Ita haree mós bá asuntu importante kona-bá feto no mós kona-bá ASEAN karik mai ita atu aloká orsamentu sira halo nusa? no oinsá ita jere orsamentu ho di’ak liután,” Embaixadór Uniaun Europeia iha Timor-Leste Marc Fiedrich, hateten bá jornalista sira hafoin enkontru ho PPN Maria Fernanda Lay.
Embaixadór Uniaun Europeia iha Timor-Leste Marc Fiedrich hateten, susesu lubuk ne’ebé sira atinji hosi servisu hamutuk entre Governu Timor-Leste no Uniaun Europeia mak liuliu iha formasaun juis no bá prokuradória sira no mós haree bá parte jeneru, merenda eskolar no mós kona-bá alojamentu orsamentu no oinsá bele aloká orsamentu ho di’ak bá setór hirak ne’e.
Uniaun Europeia iha Timor-Leste hakarak kontinua servisuho Governu hodi suporta jestaun públika no halo kompetisaun bá joven sira iha aguá no floresta.
“Ami hosi Uniaun Europeia nia parte mak hakarak kontinua servisu liuliu iha setór jestaun públika mak oinsá atu suporta di’ak liután kona-bá iha servisu públika sira nian. Ida tán mak ami foka liubá aguá no floresta hanesan dadaun ami loke kompetisaun oinsá atu dezemvolve ideia sira liuhosi setór privadu sira, nune’e sira mai ho ideia inovativu hodi bele kria impreza kona-bá negosíu ne’ebé relasiona ho aguá no floresta no atividade ida-ne’e foka liubá joventude, no sentru vokasionál sira,” Marc Fiedrich hateten.
Jornalista Estajiária : Zita Menezes