Hatutan.com (27 Setembru 2023), Díli—Komisaun A Parlamentu Nasionál (PN) ne’ebé trata Asuntu Lejizlasaun no Justisa, ninia tetu fiskál iha Orsamentu Jerál Estadu (OJE) tinan 2024 ne’ebé alokadu ho montante $100.000 sei la sufisiente hodi responde atividade komisaun nian.

Prezidente Komisaun A, Patrocíno Fernandes. Foto/dok Patrocíno Fernandes.

“Kada Komisaun ninia tetu ne’e PN fó tiha ona bá OJE tinan 2024. Komisaun A hetan tetu ne’e ho montante $100.000, haree bá Komisaun A hanesan komisaun ida ne’ebé nia área kobertura boot tebe-tebes, servisu mós boot. Se tinan ida $100.000 atu bele orsamenta atividade Komisaun nian, ne’e la to’o,” Prezidente Komisaun A, Patricíno Fernandes hateten iha PN, Kuarta (27/09).

Lee Mós: Senáriu OJE 2024, Entre Billaun $1.6–Billaun $1.9

Deputadu Bankada CNRT ne’e hateten, komisaun sira kada tinan halo sira nia planu asaun bá Orsamentu  depois submete bá PN depois mak PN bele haree no tetu hodi bele aloka tuir OJE.

Maibé, tanba iha tinan ida-ne’e laiha enkontru ruma hosi meza ho meza komisaun sira atu submete planu atividade Orsamentu hosi Komisaun A nian, maka maski tetu ne’e PN fó tiha ona, maibé obrigasaun komisaun nian nafatin kontinua hatama ninia planu atividade tinan ida tomak nia nia orsamentu rasik.

Tanba ne’e, Tuir Patrocinio katak, orsamentu loloos bá komisaun tuir ninia planu atividade tinan 2024 ne’e por volta $240.000 no ida ne’e depende ba desizaun Konsellu Ministru (KM).

Alokasaun orsamentu ne’e atu responde bá papél tolu mak hanesan papél halo desizaun politika nian, papél fiskalizasaun no  papél halo Lei.

Tanba ne’e, orsamentu $240.000 ne’e aloka bá atividade fiskalizasaun barak liu ne’e atividade halo Lei, diskuzaun iha espesialidade, audiénsiu públiku no iha tinan ida-ne’e Komisaun A laiha planu viajen bá estranjeiru.

Jornalista Estajiária: Zita Menezes