Hatutan.com (10 Outubru 2023), Díli—Tane Komsumidor kontinua fahe informasaun di’ak bá konsumidór sira iha rai laran kona-bá presu sasan sira ne’ebé baratu liu no karun liu bazeia bá peskiza.

Prezidente Tane Komsumidór, António Ramos da Silva Naikoli.

Peskiza ne’ebe Tane Komsumidór halo kada fulan tolu dala ida, kona-bá presu sasan nian iha rai laran no deskobre katak, kada folin sasan sempre diferente bazeia bá komparasaun hosi loja sira ne’ebé mak fa’an iha rai laran.

Lee Mós: Tane Konsumidór Apresia Governu Hatún Taxa Importasaun

Objetivu ida-ne’e tulun tebes konsumidór sira assesu bá informasaun no objetivu seluk maka tulun konsumidór sira kona-bá jestaun liuliu bá iha literasia finanseiru katak bele iha osan natón de’it, maibé bele hola foos, ikan, mina, na’an no sasan sira seluk ne’ebé baratu liu.

Peskiza ne’e Tane Komsumidór hahú iha loron 04 fulan Outubru no finaliza analiza iha loron 09 fulan Outubru 2023.

Iha peskiza ne’e deskobre mós katak, foos folin komesa hosi fulan jullu sa’e to’o inisiu Outubru no folin kontinua tendénsia sa’e no laiha mudansa ho subsídiu ne’ebé iha.

“Ita estabelese mós iha fulan Agustu, Guvernu elimina ka hatun ona taxa importasaun hosi 5% tun bá 2,5. Ne’ebé mak sai polémika desde aprova Orsamentu Jerál Estadu aplika ida-ne’e,” Prezidente Tane Komsumidór, António Ramos da Silva Naikoli heteten iha edifisiu Vila-Verde Díli, Tersa (10/10/2023).

Edifísiu Assosiasaun Tane Konsumidór iha Vila Verde. Foto: Tome da Silva.

Ba kustu seletivu iha item bá masin-midar ho han-hemu sira ne’ebé mak midar hanesan koka-kola, sangkist ho fanta, ida ne’e nia impaktu mós folin.

“$48 ho 15% bá produtu sira ne’e iha loja Grasia Shops folin baratu liu kompara ho loja sira seluk. Nune’e loja ne’ebé mak fa’an ho folin karun liu maka Family First. Ita nia objetivu ne’e atu halo komparasaun bá folin sasan sira ne’ebé mak baratu liu no karun liu hodi tulun konsumidór sira,” Prezidente Tane Komsumidór dehan.

Tane Komsumidor mós haree katak iha semana ne’e Governu fa’an ona foos bá komunidade ho $12 kada saka bá 25 kilograma nian.

Loos duni, ida-ne’e tulun tebes hodi atende nesesidade nian, maibé ho kuantidade ne’ebé seidauk sufisiente ezemplu iha Munisipiu Viqueque ho Ermera sira fo 2.000 sakas ne’e la to’o presiza amenta tán.

Jornalista Estajiáriu: Lazaro Pereira Quefi