Hatutan.com (11 Novembru 2021), Díli—Ekipa konjunta ba boa Governasaun kompostu hosi Komisaun Anti Korrupsaun (KAK), Diresaun Nasionál Transporte Terrestre (DNTT), Diresaun Jerál Patrimóniu Estadu no Polísia Nasionál Timor-Leste (PNTL), liu hosi rezultadu fiskalizasaun ne’ebé hala’o iha loron finadu, konsege rejista no detekta ema na’in-10, ne’ebé utiliza karreta Estadu.

Ekipa konjunta ba boa Governasaun kompostu hosi KAK, DNTT, Diresaun Jerál Patrimóniu Estadu no PNTL, aprezenta rezultadu fiskalizasaun ne’ebé hala’o iha loron finadu, Kinta (11/11/21). Foto/KAK.

Utilizadór na’in-10 ne’e maioria mai hosi kargu xefia iha Instituisaun Estadu sira, kompostu hosi Ministériu Finansa (MF), Ministériu Agrikultura no Peska, Ministériu Edukasaun Juventude no Desportu, Ministériu Interiór no Sekretáriu Estadu Igualidade no Inkluzasaun (SEII).

Notísia iha Relasaun:Komunidade Tenke ‘Kesar’ Funsionáriu Utiliza Karreta Estadu iha Finadu

Iha loron 11 fulan Novembru tinan ne’e, KAK aprezenta no entrega ona relatóriu ba Komisaun Funsaun Públika (KFP), hodi prosesa tuir lei.

“Hosi viatura 10 ne’e, ami detekta iha lima mak depois de halo prosesu identifikasaun detekta iha autorizasaun hodi halo movimentu husi superior hirarkia no iha lima laiha autorizasaun. Tanba ne’e, hirak ne’ebé laiha autorizasaun tuir kompeténsia ne’ebé iha ami tenki halo prosesu kriminál no funsionáriu públiku ne’ebé la kumpre, KFP mak iha kompeténsia atu haree kona-bá kestaun disiplinár,” Pontu Vokál KAK, Euclides Madeira, hateten ba jornalista-sira, hafoin entrega relatóriu fiskalizasaun utilizasaun karreta Estadu iha Edifísiu KFP, Kinta (11/11/2021).

KAK seidauk bele mensiona naran inisiál hosi ema hirak ne’e, tanba sei iha prosesu investigasaun.

Maski nune’e, maioria komete hosi sira ne’ebé ho kargu xefia, hanesan Diretór no Xefe Departementu hosi instituisaun Estadu.

Relasiona ho relatóriu fiskalizasaun ne’e, KFP sei halo investigasaun hodi foti medida disiplinár ba funsionáriu ne’ebé komete erru ida-ne’e.

“Ha’u sei haree relatóriu hosi KAK depois sei entrega fali ba parte investigasaun liu hosi dalan primeiru tenki halo xamada ba ema ne’e, segundu sei husu pergunta balun bazeia ba relatóriu ne’e, terseiru prosesu investigasaun no halo nota de akuzasaun no ikus liu mak halo relatóriu mak foin bele deside pena saida mak atu fó,” Komisáriu KFP ba Asuntu Disiplinár Fausto Freitas da Silva, hateten.

Tuir lei, iha kazu ida-ne’e, sansaun disiplinár bele fó liu hosi medida suspensaun, multa no demisaun, maibé depende ba volume infrasaun.

Bazeia ba dekretu lei nú 8/2003, defini kona-bá utilizasaun viatura Estadu, hodi mensiona katak Viatura Estadu uza ba finalidade servisu iha oras servisu.

Jornalista: Carmelita Isaac