Hatutan.com, (29 Dezembru 2023), Díli—Prezidente Conferência Episcopal Timorense (CET) no Bispu Dioseze Maliana, Dom Norberto do Amaral konsidera krime sira ne’ebé akontese iha Timor-Leste (TL) ikus ikus ne’e komplikadu tebes, tanba ne’e apela ba Timoroan sira au idaidak kuidadu an, lori an ho didi’ak, nune’e labele estraga fali ema seluk.

Prezidente Conferência Episcopal Timorense (CET) no Bispu Dioseze Maliana, Dom Norberto do Amaral. Foto: Rogerio Pereira Carceres.

Prezidente CET husu ne’e, hafoin prezide misa agradesimentu ne’ebé organiza hosi Komandu Polísia Nasionál Timor-Leste (PNLT), iha Centro de Formação Policia (CFP), Comoro, Sesta (29/12/2023).

Lee Mós: Durante Natál, PNTL Detein Ema Na’in-11

“Boas festas do Santo Natal no Feliz Ano Novo bá imi hotu ne’ebé iha ne’e liu-liu bá joven sira atu hakmatek no tuur iha fatin hodi hadomi saida mak na’i Maromak fó mai ita. Ita nia an ida-ne’e Maromak fó atu ita kuidadu didi’ak, atu ita tau-matan didi’ak, atu lori didi’ak. La’ós halo arbiru de’it hodi estraga ema hotu-hotu,” Dom Norberto Amaral hateten.

Kona-bá situasaun krime sira ne’ebé ohin loron mosu no maioria involve hosi minoriade sira, Dom Norberto dehan, kazu sira ne’e buat ne’ebé komplikadu tebes tanba kontribui mós hosi ema sira uza sala média.

“Kazu sira ne’e mosu, nia kauza ida maka mai hosi média. Informasaun sira ne’e sai mai, kuandu laiha kontrolu didi’ak kona-bá média bele halo diskrepánsia, halo buat sira ne’e mosu. Ne’e mak labarik sira uza sala buat sira ne’e hotu halo krime,” Dom Norberto esplika.

Bispu Dioseze Maliana ne’e husu didi’ak bá joven sira atu uza didi’ak média  tuir dalan loos no kria iha sira nia an ida-ne’e atu sira bele halo buat ne’ebé pozitivu bá sira nian an, bele dezenvolve sira nian ne’e ho di’ak bá sira nia moris.

Jornalista: Rogério Pereira Cárceres