Hatutan.com, (28 Dezembru 2023) Díli—Governu liuhosi Ministériu Asuntu Kombatente no Libertasaun Nasionál (MACLN, sigla portugés) fó ona ultimatu bá empreza kontraktor Bobolait, Lda, atu finaliza projetu konstrusaun Monumentu Memoriál Santa Krús, 12 Novembru 1991, iha fulan-Dezembru 2023. Maibé, to’o ona tinan 2023 nia rohan, projetu ne’e seidauk hatudu progresu atu finaliza.
Lee Mós: Projetu Monumentu Memoriál Masakre Santa Krús, MACLN Fó Tempu To’o Dezembru 2023
Ministru Asuntu Kombatente no Libertasaun Nasionál, Gil da Costa Monteiro ‘Oan Soru” . Foto/Leopoldina de Carvalho
Liuhosi konfirmasaun Hatutan.com nian ho Ministru Asuntu Kombatente no Libertasaun Nasionál, Gil da Costa Monteiro ‘Oan Soru” iha Díli, Kuarta (27/12/2023), hateten, Governu nia parte liuhosi MACLN nu’udár na’in ka owner bá projetu ne’e konsidera tebes difikuldade empreza kontraktor Bobolait, Lda nian iha ezekusaun obra ne’e no fó tempu nafatin bá Bobolait, Lda, atu halo esforsu hodi finaliza obra ne’e ho kualidade.
Ministru Gil da Costa Monteiro ‘Oan Soru” klarifika katak kompañia kontraktor Bobolait, Lda, hato’o ona justifikasaun razoavel bá MACLN kona-bá difikuldade sira ne’ebé enfrenta no MACLN konfirma katak justifikasaun hirak-ne’e fundamentu tebetebes.
Tuir avaliasaun tékniku hosi MACLN nia parte katak kontrusaun monumentu Memoriál Santa Krús ne’e paradu ka atrazu la’ós tanba kompañia labele halo kompleta, maibe iha buat balun ne’ebe kompañia persija halo justifikasaun no nia problema, hanesan primeiru iha kestaun kona-bá marmer tanba atu prodús marmer ne’ebé ho kuantidade boot ho medida 70×70 mm no nia mahar sentímetru 4, ida ne’e fabrika iha Timor laiha.
Seluk fali, tuir Ministru Gil da Costa Monteiro “Oan Soru” katak atu prodús estátua tuir ejijensia Komite 12 Novembru nian, hanesan iha fotografia 12 Novembru 1991, bele prodús de’it iha Portugál.
“Iha buat lubuk ida ne’ebe kompañia justifika no iha duni razaun, no ita tetu razaun sira ne’e oinsa bele lao nafatin,” Gil Oan Soru hateten.
Kona-bá durasaun tempu ne’ebé mak Governu atribui bá kompañia Bobolait, Lda atu bele finaliza konstrusaun refere, Gil Oan Soru hateten, sira-nia parte kontinua halo akompañamentu iha 2024 no konfirma nafatin ho justifikasaun sira ne’ebé mak Bobolait, Lda submete ona.
Projetu monumentu Memoriál Santa Krús, 12 Novembru 1991 ho nia kustu millaun $1,385, ne’ebé empreza nasionál Bobolait, Lda hahú ezekuta iha tinan 2021 ho primeiru kontratu ho durasaun tinan ida, hosi loron 22 fulan-Setembru 2021 to’o loron 22 fulan-Setembru 2022 no períodu kontratu ne’e rasik termina ona. Maibé, projetu fíziku seidauk termina to’o ohin loron.
Lee Mós: Monumentu Memoriál Santa Krús, Bobolait Laiha Kbiit Fó Fali bá Empreza Seluk
Jornalista : Leopoldina de Carvalho