Hatutan.com, (11 Janeiru 2024), Díli– Prezidente Repúblika (PR), José Ramos-Horta, submete pedidu hosi jornalista António Sampaio nian bá Parlamentu Nasionál (PN) atu husu sai sidadaun Timor (Timorense).   

Lee Mós: Kazu Violasaun Segredu Justisa, Publikasaun LUSA ho TT Halo De’it Rezumu Husi Relatóriu KJP

Jornalista António Sampaio. Foto/Espesiál

“Relatóriu hosi komisaun A nian liga-bá pedidu ida hosi Prezidente Repúblika José Ramos-Horta atu fó sidadania bá António Sampaio. Nia husu atu hetan naturalizasaun bá sidadaun Timor-Leste nian,” Sekretária Meza  PN, Virgínia Ana Belo, informa bá jornalista sira iha PN, hafoin reniaun ho Prezidente Parlamentu Nasionâl,   Maria Fernanda Lay ho lidér bankada sira iha sala konferénsia PN, Kinta (11/01/2024)

Virgínia Ana Belo haktuir pedidu hosi Prezidente Repúblika  daudaun ne’e iha ona Komisaun A maka sei haree hodi halo audiénsia ho António Sampaio

“Ne’e komisaun A maka trata hela, maibé  loos ne’e pedidu ne’e labele mai hosi Prezidente Repúblika maibé tenei mai hosi na’in rasik depois hato’o pedidu, Parlamentu Nasionál lori audiénsia hodi bolu ida na’in ne’e depois nia bele mai esklarese iha ne’e kona-bá  motivu saida maka halo nia hakarak sai sidadaun Timor-Leste,” Virgínia Ana Belo hateten.

António Sampaio nu’udár jornalista ho orijen hosi Portugal no hala’o nia knaar Jornalístiku kona-bá situasaun Timor-Leste dezde tinan 1990 no nia hakerek artigu barak kona-bá luta rezisténsia Timor-Leste nian.  

Sita hosi pájina Asia Media Centre, katak António Sampaio iha esperiénsia servisu iha televizaun, rádiu no jornál, inklui ajénsia notisioza no  tinan barak ezerse funsaun hanesan xefe biro ajénsia notisioza portugés-Lusa iha Díli-Timor Leste.

António Sampaio iha esperiénsia servisu bá mídia iha Austrália, Portugál no nasaun sira balun tan. Iha tinan 1994/1995, António Sampaio hetan prémiu  jornalizmu rua iha Portugál; Gazeta Prize ho Journalists Club Award bá kategoria  film dokumenter RTP kona-bá operasaun iha Indonézia. Nia to’o iha Timor-Leste iha fulan-Marsu 1999 hanesan jornalista estranjeiru  bá dahuluk ne’ebé hala’o knar permanente iha Timor-Leste nu’udár Xefe Biro ajénsia notisioza Lusa ho nia knaar hanesan xefe biru iha Jenebra no Madrid.

António Sampaio hetan Medalla Orden Timor-Leste  hosi Prezidente Repúblika Timor-Leste  kona-bá nia kontribuisaun bá umanidade no povu Timor-Leste nia prosesu luta bá ukun rasik aan.

Jornalista Estajiária : Zita Menezes