Hatutan.com, (15 Fevereiru 2024), Díli—IX Governu Konstitusionál kontinua aloka millaun $15 hosi Orsamentu Jerál Estadu (OJE) tinan 2024 bá Igreja Katólika Timor-Leste, hodi dezenvolve área tolu importante.

IX Governu reprezenta hosi Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino ho Conferência Episcopal Timorense (CET) ne’ebé reprezenta hosi Arsebispu Arkedioseze Metropolitana Díli, Dom Virgílio Kardeál do Carmo da Silva, SDB asina akordu subsídiu millaun $15 bá Igreja Katólika Timorense, iha Palásiu Governu, Kinta (15/02/24). Foto: Tomé da Silva.

Alokasaun ne’e formaliza liu hosi serimónia akordu entre Governu ne’ebé reprezenta hosi Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Habitasaun Komunitária, Mariano Assanami Sabino ho Conferência Episcopal Timorense (CET) ne’ebé reprezenta hosi Arsebispu Arkedioseze Metropolitana Díli, Dom Virgílio Kardeál do Carmo da Silva, SDB, iha Palásiu Governu, Kinta (15/02/24).

Lee Mós: Estadu Atribui Sertidaun Rekoñesimetu Personalidade Jurídika Públika bá Igreja Katólika

Hafoin serimónia asina akordu, Dom Virgílio Kardeál do Carmo da Silva esplika, Uma Kreda Timor selebra akordu anuál bá implementasaun akordu kuadru ne’ebé asina iha tinan rua liu bá, atu hahú implementa orsamentu IX Governu ne’ebé aloka bá Igreja Katólika ho millaun $15.

Reprezentante CET ne’e dehan, osan ne’e hanesan subsídiu ne’ebé tinan-tinan Governu fó bá Uma Kreda ne’ebé hatuur iha akordu internasionál ida ho naran konkordata ne’ebé asina entre Estadu Vatikanu ho Estadu Timorense, depois atu implementa ida-ne’e maka iha akordu kuadru ne’ebé halo kada tinan lima (5).

Konkordata ne’e CET ho Estadu Vaticano iha prinsipiu jerais, tinan-tinan ho Governu ne’ebé de’it CET renova iha espíritu konkordata ninian.

“Orsamentu ne’e CET aloka bá iha kategoria tolu mak hanesan, primeiru área edukasaun, segundu servisu sosiál no terseira kategoria ajuda servisu Uma Kreda ninian,” Dom Virgílio esplika.

Nia esplika tan, área tolu ne’e maka osan ne’e sei fahe bá iha Dioseze tolu ne’e liu hosi área tolu ne’e no kona-bá dezemvolvimentu liuliu konstrusaun fíziku nian sei aloka millaun $6-resin atu konstrui kapela, Igreja Parókia, edifísiu no eskola.

Alende ne’e, konstrusaun seluk bá iha administrasaun no mós bá iha formasaun grupu kategoriál nian,  normalmente osan ne’e CET hatama tuir lala’ok Governu nian, CET mós prepara budget antes liu hosi proposta hodi aprezenta bá Governu molok lori bá iha Parlamentu Nasionál (PN).

“Kona-bá relatóriu sira, durante ne’e Igreja liuhosi komisaun rua mak hanesan komisaun tékniku bá Dioseze no komisaun téknika superiór ne’ebé kontinua halo relatóriu no la’ós de’it mai simu osan de’it maibé atu aprezenta mós relatoriu tuir lala’ok ne’ebé iha,” Arsebispu hateten.

Iha fatin hanesan Vise-Primeiru Ministru, Mariano Assanami Sabino haktuir, IX Governu kontinua fó apoiu ida-ne’e bá Igreja Katólika Timorense hodi tau prioridade mós bá edukasaun.

Nia dehan, asina akordu  ne’e hanesan fó kontinuidade bá akordu ne’ebé asina antes ona, IX Governu nafatin aloka millaun $15 ne’ebé deskreve ona bá atividade ne’ebé importante, IX Governu nafatin fó importánsia bá edukasaun katak edukasaun ne’e prioridade.

“Tanba ne’e maka ami fó apoiu totál bá servisu ne’ebé Igreja Katólika halo,” nia hateten.

Jornalista Estajiária: Zita Menezes