Hatutan.com, ( 01 Abríl 2024), Díli—IX Governu Konstitusionál ne’ebé lidera hosi Primeiru-Ministru (PM), Kay Rala Xanana Gusmão liu husi Ministériu Transporte no Komunikasaun (MTK) halo hela avaliasaun bá prosesu sosa asaun empreza telekomunikasaun Oi iha Timor Telecom (TT).
Lee Mós: Kliente Halerik ho Problema Internet, PN Husu Responsabilidade TT-Telemor-Telkomcel
Ministru Transporte no Komunikasaun (MTK), Miguel Marques Manetelu. Foto/Tome da Silva
Iha loron 03 fulan-Maiu 2023, VIII Governu Konstitusionál liuhosi Ministru Finansa, Rui Augusto Gomes ne’ebé reprezenta Estadu Timor-Leste asina kontratu sosa asaun (saham) operadór telekomunikasaun Oi nian iha Timor Telecom.
Iha serimónia asina akordu sosa asaun ne’e, parte empreza telekomunikasaun Oi nian reprezenta hosi Luís Rosa hosi Brazil. Nune’e, Estadu Timor-Leste nia partisipasaun ka asaun/saham iha Timor Telecom dezde inísiu 20,59% no sosa tan Oi nia asaun 57,09% nune’e sa’e ka aumenta bá 77,65% ho montante orsamentu millaun $21,1.
Ministru Transporte no Komunikasaun (MTK), Miguel Marques Manetelu, Segunda (01/04/2024), konfirma bá Hatutan.com katak, mézmu kontratu ne’e halo ona entre empreza Oi ho Estadu Timor-Leste iha mandatu Governu anteriór, maibe daudaun ne’e IX Govenru halo hela avaliasaun hodi haree kontratu ne’e lao oinsá atu kontínua ho ida ne’eba ka ho dalan seluk.
“Governu halo avaliasaun atu kontínua kontratu sosa ne’e ka lae, la’ós atu sosa asaun TT maibe sosa asaun hosi empreza Oi hosi Brazil nian ne’ebé iha Timor Telecom, tanba sosiu boot liu iha Timor Telecom ne’e Oi hamutuk 54%,” Ministru Miguel Marques Manitelu hateten iha nia servisu fatin, Díli.
Membru Governu ne’e esplika tanba empreza Oi mak iha asaun ne’ebé boot liu iha Timor Telecom tanba ne’e desizaun hotu Oi mak foti.
“Mas, ha’u lahatene tanba saida mak nia fa’an, entaun iha prosesu ida ne’e mak Governu ka Estadu asina kontratu sosa, mais tanba Governu foun ami haree hotu fali kontratu hirak ne’ebé asina ona hosi Governu anteriór hodi nune’e bele prosesa bá oin,” ministru Miguel Manitelu hateten.
Antes ne’e Timor Telecom maioria kontrola hosi Telekomunikasaun Publika Timor (TPT) SA ne’ebé empreza telekomunikasaun Oi Brazil iha kapitál 76%, partisipasaun SGPS 3,05%, Fundasaun Harii-Sosiedade bá Dezenvolvimentu Timor-Leste (Dioseze Baucau 18% no Fundasaun Oriente 6%.
Asionista iha Timor Telecom antes ne’e kompostu hosi TPT SA iha 54,01%, Estadu Timor-Leste (20,59%), VDT Holding Limitada (17,86%), emprezáriu Timoroan Julio Alfaro (4,49%) ho PT Partisipasaun SGPS SA (3,05%).
Jornalista: Leopoldina de Carvalho