Hatutan.com, (18 Abríl 2024), Díli— To’o oras ne’e ekipa konjunta seidauk bele tun ba terrenu hodi rekolla ice cream ho marka CYC ne’ebé konsidera foer no sirkula iha loja sira iha Dili laran inklui munisipiu, tanba prodús relatóriu kleur no mós falta transporte ho rekursu umanu.

Traballadora sira servisu la ho atributu adekuadu tuir regulamentu ne’ebé estabelesidu. Foto/Leopoldina de Carvalho.

Diretóra Nasional Regulasaun Komérsiu (DNRK) Manuela da Silva Tilman hateten, razaun seidauk bele rekolla tanba sei prepara relatóriu hodi submete bá Vise-Primeiru Ministru no Ministru Koordenadór Assuntu Ekonomíku (MKAE) no Ministru Turízmu no Ambiente (MTA), Francisco Kalbuadi Lay hodi hetan orientasaun bá terrenu.

Lee Mós: Ekipa Konjunta Sei Rekolla Ice Cream ho Marka CYC Ne’ebé Espalla iha TL Tanba “Foer”

“Seidauk rekolla produtu ice cream ne’ebé la ijiene tanba relatóriu foin mak submete bá MKAE iha loron kuarta (17/04/2024) no mós ba Ministériu relevante ne’ebé koopera ho MKI,” nia hateten iha knaar fatin, Kinta (18/04/2024).

Relatóriu ne’ebé submete bá Vise PM ne’e esplika kona-bá prosesamentu ne’ebé ekipa konjunta identifika iha terrenu liga ho produsaun ice cream hosi kompañia CYC.

Manuela da Silva Tilman hatutan, nia parte informa ona bá  funsionáriu sira atu preparadu bainhira bá halo monitorizasaun iha terrenu atu identifika produtu ice cream ne’e bele informa bá loja na’in sira atu hapara negósiu bá ice cream ne’e, hodi retira hosi loja.

“Dau-daun ne’e problema ne’ebé ita enfrenta maka difikuldade transporte no mós rekursu limitadu,” nia informa.

SERVE Hein Desizaun

Diretór Ezekutívu  Servisu Rejistrasaun no Verifikasaun Emprezariál, Institutu Públiku (SERVE. IP) Florencio Sanches hateten, maske nia parte haruka ona karta bá iha MKI bá iha Diresaun Nasíonal Regulasaun Komérsiu (DNRK) kona-bá irregularidade ne’ebé identifika iha kompañia produtór ice cream  CYC, maibé seidauk iha desizaun bá inspesaun konjunta bá iha loja sira.

Florêncio Sanches esplika, desizaun kona-bá inspesaun ne’e la’ós SERVE I.P nian mesak, maibé tenki hosi Autoridade Inspesaun no Fiskalizasau Atividade Ekonómika no Alimentar, Institutu Públiku (AIFAESA,IP) ho MKI.

“Tanba ne’e desizaun importante liu tenki mai hosi parte rua ne’e. SERVE nia kompeténsia haree bá legalidade,” Florencio Sanches hateten.

Hafoin simu tiha karta deklarasaun hosi parte relevante hotu maka ekipa konjunta foin bele iha desizaun ida atu foti asaun iha terrenu.

“SERVE hein de’it parte AIFAESA no MKI kona-bá sá loron no oras sempre prontu. Atividade ne’e fila bá ministériu relevante, SERVE labele haree bá atividade maibé haree bá legalidade,” Florencio deklara.

SERVE mós husu bá kompañia CYC ne’ebé prodús ice cream ne’ebé diskunfia la ijiene atu taka nia kompañia no rekolla fali ice cream ne’ebé distribui ona ba loja sira.

Diretór ezekutivu ne’e informa ona bá SERVE.IP territóriu nasionál hodi preparadu hatán bá konvite urjente hosi ministériu ka instituisaun relevante seluk hodi halo inspesaun bá hahan ka produtu saida de’it.

Ekipa konjunta ne’ebé antes ne’e hala’o inspesaun hamutuk no halo ona konferénsia imprensa kompostu hosi MKI liu hosi Diresaun Nasionál Regulasaun Komérsiu (DNRK), Autoridade Inspesaun  Fiskalizasaun Atividade Ekonomíka, Sanitária no Alimemtar, Institutu Públiku (AIFAESA.IP), Ministériu Saúde (MS),  SERVE.IP no Polisía Nasionál Timor Leste ( PNTL).

Jornalista: Leopoldina de Carvalho