Hatutan.com, (22 Novembru 2021), Díli—Restaurante Nurhalim ne’ebé durante ne’e hala’o atividade negósiu hanesan fornesimentu hahán matabixu, han meiudia no kalan, bakso inklui bebidas hanesan kafé, juice no susubeen ho menu oi-oin hanesan lalapan ayam kampung, ayam potong, rendang, gado-gado, sate kambing no seluk-seluktan, kada fulan hetan $15.000 no kada tinan $180.000.

Rendimentu boot hanesan ne’e mai hosi kada loron hetan $500 ne’ebé kobre hosi ema han iha fatin, hemu no halo akordu ho individu balun hodi fornese hahan loron-loron.

Iha situasaun emerjénsia no implementasaun serka sanitaria, rendimentu restaurante ne’e kada loron tun ba $250 kompara ho situasaun normál ne’ebé hetan to’o $500.

“Durante serka sanitária restaurante tenki taka provizóriu no la prepara meza inklui kadeira bazeia ba desizaun Governu, maibé ema barak mak hameno hahan hosi liur no restaurante prontu lori to’o fatin,” Na’in ba Nurhalim Restaurante, Aminnudin Syahru ba Haatutan.com, iha ninia restaurante, Kampung-Alor.

Restaurante Nurhalim ne’ebé loke iha tinan 2019 ne’e, loke iha oras tuku 08:00 dader to’o 20:00 kalan, iha loron segunda to’o Sábdu, maibé depende ba ema ne’ebé mai han.

Hosi rendimentu ne’ebé hetan kada fulan utiliza hodi sustenta fali restaurante nia funsionamentu, selu funsionáriu sira hamutuk ema na’in neen (6) ho saláriu kada fulan $150 to’o $200 ne’ebe loron-loron tein no sai servente.

Hosi lukru ne’ebé hetan, kada fulan Aminnudin Syahru transfere osan ho montante $200 ba família ne’ebé hela iha Indonézia hodi ajuda responde nesesidade moris iha Indonézia.

Maski iha difikuldade oi-oin ne’ebé restaurante ne’e enfrenta, tanba impaktu hosi Estadu Emerjénsia, maibé nafatin kumpre dever hodi kontinua selu taxa ba Governu.

“Ha’u nafatin selu taxa maske restaurante taka iha situasaun EE tanba kada fulan ha’u selu ba Governu ho montante $30,” nia subliña.

Oras ne’e daudaun, restaurante ne’e kontinua hala’o negósiu hanesan baibain, hodi atende Timoroan sira ne’ebé presija.

Jornalista: Carmelita Isaac