Hatutan.com, (31 Maiu 2024), Díli– Membru Parlamentu Nasionál (PN) husi Bankada CNRT Natalino dos Santos, husu Governu kriá kondisaun ka sentru reabilitasaun hodi bele akumula minoridade sira ne’ebé komete krime iha fatin to’o halo ema seluk lakon vida.

Lee Mós: Kazu Hadau Telefone To’o Nituchia Lakon Vida, Tribunál Liberta Arguidu Minoridade, Na’in-ida bá Prizaun Preventiva no Na’in-lima Aprezentasaun Periódika

Deputadu Natalino dos Santos hateten tanba futuru nasaun nian ne’e iha joven sira nian liman, maibé haree kazu barak ne’ebé akontese ne’e labarik  mak involve iha krime, tanba lamenta tebe-tebes tanbasá sai hanesan ne’e.

Arguidu ho minoridade ne’ebé hadau telefóne hosi Juliana ho oan feto Nituchia iha motór leten, to’o rezulta monu iha área Praia dos Coqueiros, submete ona bá primeiru interogatóriu iha Tribunál Judisial Primeira Instánsia Dili (TJPID), Domingu (26/05/2024). Foto/Rogério Pereira Cárceres.

“Husu atensaun bá Governu liuhosi Ministériu Solidariedade Sosiál no Inkluzaun (MSSI) atu haree oinsá kriá kondisaun ruma, sentru reabilitasaun para labarak  sira lahetan kastigu maibé bele tau iha sentru reabilitasaun para depois ita bele konsolida fila-fali sira nia mentál,” Deputadu Natalino dos Santos bá jornalista sira iha PN, Sesta (31/05/2024).

Nia espliká tuir lei katák minoridade ne’ebé halo krime, nia labele responsavél krime ne’ebé mak iha, karik bá tribunál mós sei absolve tanba haree bá direitu internasionál labarik sira-nian, katák labarik minoridade laiha responsabilidade bá nian aktu krime. Maibé ,oinsá agora nian sei ki’ik hela maibé nia halo krime ,nia la responsabiliza nia aktu ne’e mós ema hotu sai preokupa.

“Governu sentrál posibilidade bele kriá kondisaun iha Ministériu Justisa (MJ) ka MSSI  para bele akumula minoridade sira halo krime labele haruka bá tribunál maibé tau fatin ne’e para bele halo reabilitasaun bá sira-nia hahalok no komportamentu sira,” Nia hateten.

Jornalista Estajiária: Zita Menezes