Hatutan.com, (26 Juñu 2024), Díli— Tinan 2025, Malázia mak sei simu responsabilidade atu lidera prezidénsia Association of Southeast Asian Nations (ASEAN) nian, no iha kompromissu atu fó apoiu totál bá prosessu adezaun Timor-Leste nian nu’udár membru plenu organizasaun rejionál ne’e.

Ministru Negósiu Estranjeiru no Kooperasaun Timor-Leste (MNEK), Bendito dos Santos Freitas hala’o enkontru ho Ministru Negósiu Estranjeiru Malázia, Dató Seri Utama Haji Mohamad Bin Haji Hasan, iha Sangrila Otel, tersa (25/06/2024). Foto: MNEK.

Kompromissu ne’e hato’o direta hosi Ministru Negósius Estranjeirus Malázia, Dató Seri Utama Haji Mohamad Bin Haji Hasan, bainhira simu vizita ofisiál Ministru Negósius Estranjeirus no Kooperasaun (MNEK) TL, Bendito dos Santos Freitas iha Sangrila Otel, tersa (25/06/2024) ho aborda kooperasaun bilateral ho konteúdu adezaun TL bá ASEAN.

Lee Mós: Timor-Leste ho Malázia Ofisiálmente Formaliza Akordu Servisu Aero

“Tinan 2025, Malázia mak sei simu responsabilidade atu lidera Prezidénsia ASEAN nian. Tanba ne’e sei fó apoiu tomak bá Timor-Leste nia prosesu preparative sira atu sai membru permanente bá ASEAN,” Hatutan.com sita komunikadu.

Bendito Freitas esplika, Malázia kontinua reitera kooperasaun bilaterál ho Timor-Leste ne’ebé abranze seitór sira hanesan, saúde, defeza no seguransa, edukasaun inklui sei oferese bolsu estudu bá Timoroan sira hodi bá hasai kursu lisensiatura no mestradu.

Kooperasaun sira-ne’e hotu, liu-liu área sira abranzentes iha seitór edukasaun, saúde, kooperasaun iha área defeza, iha mós kona-bá kooperasaun ba estudante sira atu bele hetan bolsa estudu ne’ebé Governu Malázia sei fó, liu-liu kontinuasaun ba lisensiatura mais kuátru kandidatus no mós Governu Malázia prontifika atu fó apoiu 5 bolsus estudu ba mestradus.

Alende ne’e, Timor-Leste ho Malázia, kontinua reforsa liután kooperasaun bilaterál iha área investimentu, turízmu, tanba turízmu reflete bá potensialidade alternativa bá dezenvolvimentu alende mina no gás.

Ministru Bendito Freitas ho nia omólogu Dató Seri Utama Haji Mohamad Bin Haji Hasan, troka nota entendimentu hodi oferese espasu rai atu harii Embaixada Malázia nian iha Timor-Leste no Timor-Leste nian iha Malázia tuir prinsípiu resiprosidade.

Sorumutu ne’ebé hala’o iha Otel Sangrila ne’e, akompañadu hosi Embaixadór Timor-Leste dezignadu ba Malázia, Lisualdo Gaspar, Diretór Nasional ba Sudeste Aziátiku, Vanio Florival Ximenes, no seluk tán, hodi hatán bá konvite hosi Ministru Negósius Estranjeirus Malázia Dató Seri Utama Haji Mohamad Bin Haji Hasan.

Jornalista: Vito Salvadór