Hatutan.com, (16 Jullu 2024), Díli- Prokuradór Jerál Republika (PGR, sigla portugés), Alfonso  Lopes, konfirma kazu instalasaun Set-Top Box Rádiu Televizaun Timor-Leste, Empreza Públika (RTTL,E.P) nia prosesu kontínua iha prokuradór titulár nia liman.

Lee Mós: Projetu Set-Top Box RTTL,E.P Falla Total no Aparellu Sira Sobu Hotu Ona

PGR Alfonso Lopes. Foto/Elio dos Santos da Costa

PGR  Alfonso Lopes, Tersa (16/07/2024), iha edifísiu Conselho Imprensa, Díli, haktuir bá jornalista sira katak, kazu Set-Top Box RTTL,E.P hanesan mós kazu sira seluk kuandu tama nia prosesu la’o kedas hanesan iha kódigu prosesu penál, no la’o tuir tramitas legál ne’ebé iha no kuandu termina ona iha Ministériu Públiku mak bele lori ba Tribunál akuza ka arkiva no iha prosesu ida-ne’e loke ba públiku para bele akompaña.

“Tamba ne’e  kazu instalasaun Set-Top Box RTTL,E.P tama ona iha Ministériu Públiku no ita rejista hotu ona no prosesu la’o hela, no prokuradór titulár ne’ebé kaer kazu ne’e mak sei asume nia papél ho di’ak tamba prosesu ne’e hotu-hotu iha prazu tuir tabela kódigu penál para deskreve no neineik to’o prazu mate entaun sei loke prosesu hasoru prokuradór ne’e,” PGR Alfonso Lopes hateten.

Prokuradór ne’e hatutan kuandu kazu tama ona iha Ministériu Públiku, prokuradór sira labele rai iha gaveta no tenke book an, iha indísiu ka lae, importante mak tuir prosedimentu no kódigu prosesu penál ne’ebé iha.

Kazu Set-Top Box RTTL,E.P ne’e dezde fulan-Janeiru 2023, Komisaun Anti-Korrupsaun (CAC, sigla portugés) konstitui Ministru Asuntu Parlamentár no Komunikasaun Sosiál (MAPKOM) tempu ne’ebá Francisco da Costa Pereira Jerónimo  hanesan arguido, inklui  konstitui na’in bá sósiu kompañia DILI ENTERNAL INNOVATION INFORMATION, Lda no mós konstitui arguido bá asesór prinsipál balun iha Gabinete MAPKOMS nian, tempu ne’ebá.

CAC konstitui parte sira   nu’udár arguido refleta iha baze legal ka Kódigu Prosesu Penal (KPP) artigu Artigu 91 (Notifikasaun), alínea 3  ne’ebé hateten, funsionáriu judisiál, ajente polisiál  ka autoridade seluk ne’ebé lei fó kompeténsia maka halo notifikasaun tuir despaxu ka ho oden ofisioza hosi sekretaria judisiál. 

Ministru Asuntu Parlamentár no Komunikasaun Sosiál (MAPKOMS) nu’udar mós Prezidente Federasaun Futeból Timor Leste (FFTL) tempu ne’ebá, Francisco da CostaPereira Jerónimo, deskonfia komete pratika “abuzu podér” hodi estabelese kontratu projetu instalasaun Set-top Box/dexodificador RTTL,E.P bá empreza DILI ENTERNAL INNOVATION INFORMATION, Lda, ne’ebé nu’udar sósiu husi Fan Yuanxiang ho arguida ho inisiál MSC.

Dokumentu komprovativu (Certidão do Registo Comercial) hosi SERVE,I.P  ne’ebé Hatutan.com asesu hatudu katak empreza DILI ENTERNAL INNOVATION INFORMATION, Lda, nu’udar sósiu ka shares (acões) husi Fan Yuanxiang, natural Hunan-Xina ho nasionalidade Xina no arguida MSC, timor-oan ne’ebé hala’o mós serbisu loron-loron nian hanesan  Sekretaria Prezidente Federasaun Futeból Timor Leste (FFTL).

Iha Certidão do Registo Comercial hosi SERVE,I.P  hatudu shares ka kuota ba empreza DILI ENTERNAL INNOVATION INFORMATION, Lda, nia kompozisaun, hanesan Fan Yuanxiang iha sósiu ka kuota 60% no arguida MSC  iha 40% husi total Kapitál Sósiu $10,000.00. 

Iha Orsamentu Jerál Estadu tinan fiskál  2021, MAPKOMS hetan rubrika transferénsia publika ho montante $3,093,528.00 no husi orsamentu ne’e inklui ona osan $900,000.00 hodi finansia ba projetu  instalasaun Set-top Box/dexodificador RTTL,E.P  hamutuk 30.000 (rihun tolu nulu) ba komunidade iha Munisípiu Dili, Liquiça, Ermera ho Manatuto.

Iha loron 17 fulan-Outubru 2022, Comissão Anti Corrupção (CAC), liuhosi ekipa Medida Prevensaun no Kombate Korrupsaun halo  buska no apreensaun bá dokumentu iha gabinete Ministru Assuntu Parlamentár no Komunikasaun Sosiál (MAPKOMS), Francisco Pereira da Costa Jerónimo, hodi hakle’an investigasaun ba kazu instalasaun Set-top Box RTTL,E.P.

Ekipa CAC ne’ebé akompaña hosi Polísia Servisu Investigasaun Kriminál Nasionál halo mós identifikasaun ba Ministru Francisco Jerónimo, hodi halo apreensaun ba dokumentu box rua inklui komputadór ida ho marka Imec.

Hafoin halo aprensaun iha gabinete MAPKOMS, CAC tula mós Ministru ne’e ba iha nia servisu fatin ka gabinete Federasaun Futeból Timor Leste (FFTL), hodi halo mós apreensaun ba dokumentu importante balun.

Remata hosi FFTL, ekipa CAC kontinua ho Ministru ne’e bá iha nia rezidénsia iha Likisá hodi kontinua halo apreensaun ba dokumentu sira ne’ebé iha relasaun ho kazu instalasaun Set-Top Box RTTL,E.P.

Bazeia ba mandadu buska no apreensaun ho detensaun hosi Tribunál, CAC liu hosi ekipa medida prevensaun no kombate korrupsaun, Kuarta 12 fulan-Outubru 2022,  detein no alzema (borgol) Asesór MAPKOMS ho inisiál GDS inklui na’in ba kompañia DILI ETERNAL INNOVATION INFORMATIO Lda ho inisiál MCS relasiona ho kazu instalasaun Set-Top Box RTTL,E.P.

Iha prosesu primeiru interrogatóriu iha Tribunál Distritál Díli,  Ministeriu Publiku iha nia alegasaun,  husu Tribunál atu aplika medida prizaun preventiva ba Asesór MAPKOMS ho inisiál GDS no na’in empreza ho inisiál MCS.

Lee Mós: Kazu Projetu Instalasaun Set-top Box RTTL,E.P Seidauk To’o Tribunál

Jornalista: Vito Salvadór