Hatutan.com, (16 Jullu 2024), Díli—Vise-Ministru bá Fortalesimentu Institusionál Saúde (VMFIS),  José dos Reis Magno rejeita ho preokupasaun husi Asosiasaun Sientista  Laboratóriu Medika Timor-Leste ( ACLAM-TL ) ne’ebé la satisfaz ho nomesaun kargu diretór bá iha Institutu Nasionál Saúde  Públika Timor-Leste  (INSPTL ) tanba konsidera iha tendénsia favoritizmu no grupizmu, la tuir meritu no laiha esperiensia servisu.

Lee Mós: Deskonfia, Nomeasaun Kargu Diretór sira INSPTL iha Tendénsia Favoritizmu

Vise-Ministru bá Fortalesimentu Institusionál Saúde (VMFIS), José dos Reis Magno. Foto/ Tome da Silva

Vise-Ministru José dos Reis Magno esplika nomeasaun kargu diretór sira ne’e la’ós ba halao servisu tekniku, maibe bá hanesan jerente hodi apoiu iha admistrasaun tanba maioria iha esperiensia servisu iha área refere.

“Laboratóriu iha nomeasaun bá diretór jerál, iha nomeasaun ba diretór nasionál toksikolojia, no iha kargu diretór jerál laboratóriu ne’e mediku ida ho naran Nuno Votal Soares, nia esperiensia iha ona, diretór nasional toksikolojia, okupante ne’e ohin nia la mai hetan posse, ne’e persija iha klarifikasaun prontu halao knar servisu ka lae. Iha mós diretor jeral ida bá sientifiku INSPTL, maibe ne’e ses  husi laboratóriu nasionál,  no mos xefe departementu ida maibe ne’e haree área jestaun, haree ba oinsa mak ema bele jere unidade, instituisaun ne’e la’o ho diak, enkuantu ba iha unidade espesializada sira  mak presiza ema tekniku hodi bele halo servisu,” Vise-Ministru ba Fortalesimentu Institusionál saúde, José dos Reis Magno hateten ba jornalista sira hafoin fó tomada posse ba kargu diretór sira iha salaun Ministériu Saúde, Palásiu da Cinzas,  Caicoli, Tersa (16 /07/2024).

José dos Reis Magno hatetentan katak  nu’udár Timoroan, ema hotu bele hato’o nia espresaun, maibé desijaun ne’ebe deside ona husi Komisaun Funsaun Públiku (CFP) ho Ministériu Saúde  tenke simu hodi halao.

Nia relata katak ba kargu diretór sira ne’e  sei iha faze  provatóriu  to’o fulan-ne’en (6), hahú ohin to’o loron 31 fulan-Dezembru 2024, hafoin fulan-6 sei iha avaliasaun mak la priense rekizitu sei troka. Maibé, dau-daun ne’e  iha hela  preparasaun  planu no orsamentu ba 2025 nian, tanba ne’e emposadu sira tenke prepara hodi apoiu ba implementasaun orsamentu iha 2025.

Iha biban ne’e Diretór jerál Laboratóriu Nasional,  Nuno Vital Soares konsidera preokupasaun ne’ebé ACLAM- TL sira hato’o hanesan motivasaun ida bá nia atu bele halao servisu ho diak liu.

“Hau hanoin ne’e diak tebes, ne’e motivasaun ida  ba hau ne’e mós bolu atensaun hodi hadiak liu tan servisu sira ne’ebe mak presiza hadia, entaun  hau hanoin prontu servisu hamutuk ho ACLAM TL  hodi hadiak buat ne’ebe presiza hadia,” Nuno Vital Soares afirma.

Liga ba deklarasaun husi ACLAM TL ne’ebe heteten laiha esperiesia no méritu, Nuno Vital Soares haktuir katak nia parte simu nomeasaun hanesan   jerente  bazeia bá esperiensia ne’ebe iha ona kuaze tinan-15, la’ós hanesan tekniku, tanba ne’e nia parte sei servisu hamutuk no prontu atu rona tekniku sira no servisu hamutuk iha sira iha  nia área laboratóriu nune’e bele hato’o ba parte relevante no superiór sira.

Jornalista : Leopoldina de Carvalho