Hatutan.com, (18 Jullu 2024), Díli- Diretór Ezekutivu Enhanced Integrated Framework (EIF) Ratnakar Adhikari hateten Timor-Leste nia adezaun ba Organizasaun Mundiál Komérsiu (OMK) nu’udár pasu pozitivu ba dezenvolvimentu ekonómiku iha país ne’e.

Lee Mós: Konsellu Ministru Fó Podér Tomak bá Vise-PM Francisco Kalbuadi Lay Asina Akordu Marrakexe

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay hasoru malu ho Diretór Ezekutivu Enhanced Integrated Framework (EIF) Ratnakar Adhikari, Kinta (18/07/2024). Foto/Elio dos Santos da Costa

Diretór Ezekutivu Enhanced Integrated Framework (EIF) Ratnakar Adhikari kontente tebes halo enkontru ho Vise-Primeiru-Ministru no Ministru Koordenador ba Assuntu Ekonómiku no Ministru Turizmu no Ambiente Francisco Kalbuadi Lay no ida-ne’e hanesan oportunidade di’ak ida atu ko’alia ho nia hafoin hasoru nia iha Abu Dhabi durante Konferénsia Ministerial OMK nian.

Nia afirma bainhira Timor-Leste adere ba iha  OMK, ohin, mai atu kontratuál Vise-Primeiru-Ministru ba nia lideransa hodi hetan ratifikasaun la’ós de’it husi pakote OMK, maibé mós subsídiu peska ne’ebé fó ona no ami kontente tebes ho ida ne’e.

“Ajenda iha futuru la’ós de’it iha área asesu ba merkadu, la’ós de’it iha área hasa’e esportasaun no hasa’e investimentu. Maibé mós iha área ne’e, koko atu aproveita oportunidade ne’e no oinsá bele fasilita setór privadu no autór sira seluk atu aproveita oportunidade ne’ebé oferese husi membru OMK,” Ratnakar Adhikari  hateten ba jornalista sira, Kinta (18/07/2024).

Nia mos haktuir katak Vise-Primeiru-Ministru sei halo viajen ba Jenebra no sei ko’alia kona-bá sorumutuk Konsellu Jerál nian iha loron 22 fulan-Jullu, tinan ne’e, iha ne’ebé nia sei hela iha ne’ebá durante loron balun hodi fó vizaun kona-bá postu OMK ba ajenda adezaun no tipu apoiu ne’ebé presiza, atu bele responde ba postu asesu sira. 

Timor-Leste nia adezaun ba OMK ne’e sei oferese oportunidade signifikativu no kria oportunidade barak liu tan ba dezenvolvimentu ekonómiku iha país ne’e.

“Ita-boot sira-nia adezaun oferese oportunidade signifikativu ba nasaun hotu no ami orgullu atu simu nasaun ne’e ba membru OMK, ba família OMK no ami hein atu servisu hamutuk no kolabora hamutuk hodi kria situasaun ida-ne’ebé manán ona ba OMK no ba Timor-Leste,” Nia subliña.

Nia mós akresenta katak ba futuru EIF nafatin iha kompromisu atu hametin no apoiu Timor-Leste hodi lori prosperidade no hasae kreximentu ekonómiku povu nian.

Vise-Primeiru-Ministru no Ministru Koordenadór ba Asuntu Ekonómiku no Ministru Turizmu no Ambiente Francisco Kalbuadi Lay hato’o agradese ba apoiu sira ne’ebé EIF oferese no sei buka atu hametin kooperasaun hodi bele hasae kapasidade no atendimentu servisu públiku Timor-Leste nian iha OMK.

Jornalista: Vito Salvadór