Hatutan.com, (25 Jullu 2024), Díli— Forum Organizasaun Naun Governamentál Timor-Leste (FONGTIL) husu bá Governu liu hosi Ministériu Interiór (MI) atu haforsa seguransa iha fronteira sira rai-maran nian hodi evita sasan illegál sira hanesan sigaru inklui sasan sira seluk ne’ebe kontinua tama mai iha territóriu nasionál.

Diretór Ezekutivu FONGTIL, Valentim da Costa Ximenes.

Diretór Ezekutivu FONGTIL, Valentim da Costa Ximenes husu ne’e relasiona ho preokupasaun públiku durante ne’e katak, sigaru illegál kontinua sirkula iha rai laran.

Lee Mós: UPM Kaptura Suspeitu Na’in-ualu Hatama Sasán Ilegál iha Atabae

“Ha’u husu Ministériu Interiór ne’ebé mak halo jestaun bá PNTL no parte relevante seluk mak koloka ninia funsionáriu sira iha fronteira, inklui sasan sira iha fronteira Timor-Leste tenki fó duni tarifa servisu ne’ebé mak extra hodi sira tau-matan didi’ak atu evita movimentu illegál sira,” Valentim da Costa Ximenes hateten bá Hatutan.com iha edifisiu Caicoli, kinta (25/07/2024).

FONGTIL husu parte relevante tenki halo fiskalizasaun bá ekipamentu sira iha fronteira hanesan ray-x no ekipamentu sira seluk ne’ebé utiliza hodi halo pasa revista bá sasan sira tama-sai atu labele avaria hodi bele kontrola ho di’ak ba sasan sira ne’e, tenke tuir duni lei ne’ebé permite atu labele fó implika bá iha merkadu rai laran.

Sasan illegal sira hanesan sigaru inklui sasan sira seluk ne’ebé tama mai iha territóriu nasionál ne’e la’ós probelema foun ida ne’ebé iha tinan hirak liu bá kotuk to’o ohin loron kontinua akontese.

Tanba ne’e, husu bá parte relevante sira atu labele fó sala bá fa’an na’in ki’ikoan sira ne’ebé mak fa’an iha kioské sira iha dalan ibun sira ne’e, maibé tenki haforsa seguransa iha fronteira.

“Sigaru ne’ebé tama mai ho volume boot no la tuir nia dalan, signifika ita iha problema kona-bá jestaun fronteira. Tanba sasan illegál sira kontinua akontese ne’e tanba ofisiál sira ne’ebé mak iha fronteira ladun iha kontrolu ho di’ak kona-bá movimentu illegál,” Valentim da Costa hateten tán.

Sasan illegal akontese tama ne’e mos deskonfia regras ne’ebe mak ejiste iha Timor-Leste ne’e mos la dun di’ak tanba sasan sira tama mai la tuir dalan legal, se pratika illegal ne’e mak kontinua lao mak Timor Leste se lakon oportunidade ba reseitas atu hatama ba kofre Estadu.

FONGTIL husu bá populasaun iha fronteira tenki kordena-malu bainhira pratikante illegál sira akontese no hetan tenki informa lalais bá iha autoridade sira atu halo intervensaun.

FONGTIL husu bá autoridade sira iha fronteira hanesan UPF, Polisia Imigrasaun, Alfándega no sira seluk tan presiza atu servisu makas hodi kontrola sasan illegal sira labele tama mai bebeik.

Jornalista Estajiáriu:  Lázaro Pereira Quefi