Hatutan.com, (25 Setembru 2024), Díli-Primeiru-Ministru (PM), Kay Rala Xanana Gusmão, Kuarta (25/09/2024), iha Nova Iorke, hala’o reuniaun bilaterál  ho Prezidente Konsellu Lideransa Prezidensiál Iêmen, Rashad Mohammed Al Alimi.

Lee Mós: Xanana Atribui Sertidaun RDTL Bá SekJer ONU António Guterres

PM Xanana Gusmão, hala’o reuniaun bilaterál ho Prezidente Konsellu Lideransa Prezidensiál Iêmen, Rashad Mohammed Al Alimi iha Nova Iorke, Kuarta (25/09/2024). Foto/Mídia GPM

Iha sorumutu ne’e, PM Xanana aprezenta mós propósta ida bá Rashad Mohammed Al Alimi, atu bele karik, Timor-Leste (TL) bele sai uma-na’in bá futuru konversasaun pás nian ida ne’ebé neutru.

“Ha’u aprezenta mós proposta ida kona-bá Timor-Leste bele sai hanesan uma-na’in ne’ebé neutru bá futura konversasaun pás nian, bá únika dezafiu ne’ebé Iémen hasoru,” Hatutan.com sita iha komunikadu imprensa.

Primeiru-Ministru konsidera hanesan prazer ida bele koñese Rashad Mohammed Al Alimi no maski relasaun diplomátika sei foun loos, maibé Xanana haree hetan poténsia boot bá kolaborasaun iha área barak, espesialmente iha âmbitu g7+.

Iha komunikadu ne’e mós informa katak, durante enkontru bilaterál ne’e, Xanana mós aprezenta kona-bá Timor-Leste nia komemorasaun  aniversáriu referendu bá dala-25 nian, no ho istória markadu ne’e hanesan períudu reflesaun ida forte kona-bá progressu no konkista konstrusaun país ida ne’ebé pasífiku, sustentável no demokrátiku.

“Ha’u sei hanoin hela iha memória kona-bá ami-nia enkontru entre ha’u ho Vise-Prezidente Gen Al-Zubaidi iha inísiu tinan ne’e iha Davos, ami diskute no partilla ami-nia esperiénsia sira kona-bá diálogu nasionál no mós rekonsiliasaun atu promove unidade iha Iémen,” Xanana hateten tán.

Pessoa eminente ne’e mós kompriende katak, g7+ ho ekipa Vise-Prezidente partilla ona proposta ida kona-bá missaun ida ne’ebé liderada hosi delegasaun Konsellu Tranzisaun Súl, liderada hosi Vise-Prezidente rasik.

“Prezidente, ha’u hakarak atu reafirma apoiu Timor-Leste nian iha g7+ kona-bá unidade no koezaun iha Iémen. Ha’u rekoñese difikuldade sira iha prosesu rekoperasaun no alkansa akordu polítiku sira bá longu prazu no ha’u propoein medida sira extra bá kriasaun konfiansa. Ha’u hakarak mós atu enkoraza ita boot atu partisipa iha simeira g7+, neebe sei realiza iha aban iha sede ONU nian,” Xefe Governu ne’e husu.

Ikus liu, Primeiru-Ministru agradese tanba bele hetan oportunidade hodi hasoru-malu ho Rashad Mohammed Al Alimi no fiar katak reuniaun ida-ne’e sei sai inspirasaun atu estabelese kooperasaun boot no amizade entre país rua. Timor-Leste espera sei esplora área sira bá kooperasaun iha futuru.

Jornalista: Rogério Pereira Cárceres