Hatutan.com, (09 Outubru 2024), Díli- Fundador Federasaun Futeból Timor-Leste (FFTL) ho antigu jogador selesaun nasionál hamutuk ho asosiasaun Futeból Munisipál sira ezije atu ezekutivu FFTL tenke responsabiliza aktu falsifikasaun idade bá jogador ekipa selesaun nasionál, Jaimito António da Costa Soares tamba ne’e krime no Asian Football Confederation (AFC) hola ona medida legal tuir lei no regulamentu sira AFC nian.

Lee Mós: Jogador Selesaun Nasionál Na’in-rua Falsifika Idade no Hetan Penalidade hosi AFC

Fundadór FFTL no antigu jogadór selesaun nasionál Timor-Leste halo konférensia imprensa liga ho penalidade ne’ebé AFC hamonu bá jogadór selesaun nasionál Jaimito António da Costa Soares tanba falsifika idade. Foto/Elio dos Santos da Costa

Portavós no fundador FFTL, Francisco Amaro de Carvalho, Kuarta (09/10/2024),  liuhosi konferénsia imprensa iha Ótel Luz Clarita, Díli, afirma iha tinan ida liubá AFC buka tuir dokumentu ba alin ka oan jogadór lubun nia estatutu hodi identifika kona-bá deskonfiansa ba jogadór ho naran Jaimito Antonio da Costa Soares, ne’ebe deskonfia falsifika identidade ba nia tinan moris nian ne’ebe ikus mai AFC konsege deskobre duni katak jogadór refere falsifika dokumentu relasiona ho “muda tinan” (tinan boot liu) iha jogu Kualifikasaun AFC U19 Championship 2020 no ba jogu AFC U23 Asian Cup 2022 (jogu kualifikasaun) iha tinan 2021.

Liuhosi reuniaun Komite Disiplinár  no Komite Etika AFC nian iha loron  25 fulan-Setembru  2024, fó ka hamonu sansaun “tinan ida” ba jogadór refere hodi labele tuir jogu internasional sira iha nivel AFC no seluk-seluk tan, no fó mos multa osan ho montante $10,000.00.

Nia afirma  bazeia ba sansaun hosi AFC ne’ebe fó pena multa no kastigu ba jogadór ho naran Jaimito António da Costa Soares, ho nune’e  nu’udár membru fundadór ida ba FFTL  no balun antigu  jogadór, afirma sira-nia triste ho notísia sira hanesan ne’e, akontese beibeik iha tinan barak nia laran ne’ebe ikus mai hafo’er no hamoe Timor-Leste iha mundu internasional nia oin, liu-liu afeta ba estadu no Governu Timor-Leste nia naran.

“Ami kondena maka’as aktu hosi membru no fundadór sira iha Sentru futeból Juvenil ne’ebe sempre falsifika dokumentu labarik jogadór sira-nia idade hodi labarik sira ba tuir jogu iha nivel regional no internasionál sira mak hanesan jogu AFF no AFC nian no mós jogu amijavel sira iha Korea do Sul no Japaun.

Fundadór FFTL no antigu jogadór sira mós husu atu entidade relevante sira, hanesan Ministériu Juventude, Desportu, Arte no Kultura atu imidiatamente hola pozisaun sériu hodi hapara temporarimente atividade Sentru Futeból Juvenil, atu nune’e, bele hadi’a lai jestaun no servisu administrasaun liu-liu relasiona ho trata dokumentu ba jogadór nasionál sira.

Aktu hosi pesoál sira iha Sentru Futebol Juvenil prejudika jogador timoroan sira-nia futuru tamba kada jogadór sira ne’ebe mak iha Sentru Futeból  Juvenil, tuir informasaun kredibel hosi ema iha katak; kada jogadór hirak hosi Sentru Futeból Juvenil  kada ema bele iha pasaporte rua ka tolu.

“Ezemplu mak ami nia kolega ida ne’ebe túur iha ne’e dadauk ne’e mos sira prodús pasaporte rua (2) ba ninia oan rasik,” Francisco Amaro de Carvalho hateten.

Kondena Sekretáriu Jerál FFTL

Karta ofisiál AFC. Foto/Repro

Fundadór FFTL no antigu jogadór selesaun nasionál sira mós husu ba entidade sira hanesan AFF, AFC e liu-liu Governu Timor- Leste liu hosi Ministériu  Juventude, Desportu, Arte no Kultura atu hapara no fó sansaun ba Gregório Correia hosi nia kna’ar nu’udár Sekretáriu Jerál FFTL, hosi atividade hotu-hotu ne’ebe relasiona ho desportu, liu-liu ba iha futeból tamba deskonfia ninia envolvimentu direta iha falsifikasaun dokumentu ba jogadór sira iha Sentru Futeból Juvenil.

Hosi aktu ne’ebé Gregório Correia nu’udár prezidente Sentru Futebol Juvenil komete   prejudika ona labarik jogadór balun ne’ebe mak atu ba trata pasaporte hodi ba rai-liur atu kontinua sira nia eskola susar atu hetan pasaporte foun tamba iha sistema mosu naran dupla ho identidade hanesan, maibé ho tinan moris la hanesan.

Fundadór FFTL no antigu jogadór selesaun nasionál sira mós husu ba inan no aman hirak ne’ebe sira nia oan sira halibur iha Sentru Futeból Juvenil nia okos atu kuidadu didi’ak ba aktu falsifikasaun dokumentu hosi individuu sira hodi muda sira- nia oan sira nia tinan no identidade atu hetan pasaporte.

Justisa ba Aktu Falsifikasaun Dokumentu

Fundadór FFTL no antigu jogadór selesaun nasionál sira mós sei lori ema hirak ne’ebe halo aktu “krime falsifikasaun dokumentu ba alin jogadór hirak ne’e tuir prosesu legal, atu nune’e, sira ne’ebé eenvolve iha aktu refere tenke simu konsekuénsia hodi simu responsabilidade bá sira-nia aktu tuir lei ne’ebé vigora.

Antigu  jogadór  selesaun nasionál, Dukay hateten ho aktu falsifikasaun idade ne’ebé iha lori Timor-Leste nia naran fo’er iha mundu futeból no ida-ne’e hanesan krime ida tanba ne’e husu ba ezekutivu FFTL atu iha responsabilidade ba aktu ida ne’e.

“Hahalok ida ne’e ladi’ak tamba ne’e ami husu atu haree oinsá para hapara lai apoiu ba atividade futeból Juvenil nune’e bele hadi’a no evita hahalok falsifikasaun sira nune’e akontese tan iha futuru,” Dukay hateten.

Hatutan.com halo ona esforsu atu halo entrevista direita ho Sekretáriu Jerál FFTL Gregório Correia iha Kuarta (09/10/2024), parte dadeer tuku 11:30 OTL hodi rona direita pozisaun FFTL nian relasiona ho kazu falsifikasaun idade husi jogadór Jaimito António da Costa Soares, maibé parte protokolu no resepsionista iha FFTL informa tenke halo lai audiénsia ba loraik tuku 14:00 OTL , maibé iha oras tuku 15:38 Otl, simu fali konfirmasaun via telefónika husi parte resepsionista FFTL katak Sekretáriu Jerál FFTL Gregório Correia la disponivel atu entrevista tanba tempu laiha.

Jornalista: Vito Salvadór