Hatutan.com, (09 Outubru 2024) Díli– Parlamentu Nasionál liuhosi Komisaun F ne’ebé trata asuntu Saúde, Seguransa Sosial  no Igualdade Jeneru deskobre iha sira-nia fiskalizasaun katak postu saúde balu  iha Munisípiu Aileu ho Viquque menus rekursu umanu no laiha ambulánsia.

Lee Mós: HNGV Klarifika Kona-bá Bebé Ida Mate Tanba Deskonfia Atendimentu Ladi’ak

Edifísiu Sentru Saúde Atsabe ne’ebé ameasadu atu monu tanba rai halai (09/02/2023). Foto/dok.Cipriano Colo.

Iha semana rua bá kotuk komisaun F halo fiskalizasaun iha Munisípiu Aileu no Viqueque la’ós iha villa de’it, maibé halo mós fiskalizasaun iha área remota ne’ebé postu saúde iha para bele identifika katák problema ne’ebé mak deputadu foti iha plenária no públiku preokupa  ne’e loos duni ka lae.

Bazeia bá fiskalizaun ne’ebé komisaun F iha katák funsionamentu saúde la’o normal hela iha beze atendimentu bá pasiénte la’o hela. Armajen munisípiu Aileu husi 265 item iha stoke out 6% signifika iha 15 item mak laiha, iha fali munisípiu Viqueque husi 265 item stoke out 10,6% signifika 27 item mak laiha ne’e stoke out ho standar normal.

“Iha preokupasaun seluk mak kona-bá rekursu umanu iha sentru saúde balu n omós postu saúde balu ne’ebé falta rekursu umanu no falta mediku, no parteira sira. Ida-ne’e komisaun F rekoñese iha parte seluk tanba mediku sira barak mak applay bá fali vaga seluk entaun sira husik hela sira nian servisu entaun fatin ne’ebá mamuk,” Deputada Maria Gorumali Barreto hateten iha PN, Kuarta (09/10/2024).

Reprezente povu iha PN ne’e haktuir preokupasaun seluk mak presiza bá iha ambulansia nomós ambulansia multifunsaun ne’e sai exijensia duni liuliu bá iha Munisípiu sira ne’ebé mak ho nian postu-administrativu liu lima ne’ebé sira iha ambulansia no ambulansia multifunsaun ne’ebé limitadu.

“Kadavez programa saúde nian ne’ebé mak sira tenke bá iha área remota sira bá ho motorizada, maibé kadavez sira uza sira nia osan rasik mak enxe konvustivél uza osan privadu, maibé Governu la remoxa,” Nia hateten.

Iha parte seluk fasilidade saúde iha postu saúde iha área remota balu ne’ebé mak nian kondisaun kama partu ne’ebé ladi’ak nune’e komisaun F sei rekomenda bá Ministériu Saúde  hodi bele kompra fila-fali kama foun.

Jornalista Estájiaria: Zita Menezes