Hatutan.com, (18 Outubru 2024), Díli- Klube Futeból hamutuk 17 husi Munisípiu Bobonaro  submete karta pedidu ba Federasaun Futeból Timor-Leste (FFTL) hodi husu data fixu ba realizasaun kongresu estraordináriu hodi estabelese hikas estrutura foun ba lidera Asosiasaun Futeból Bobonaro (AFB) ba periodu ida tuir estatuta asosiasaun nian.

Lee Mós: Fundadór no Antigu Jogadór Selesaun Nasionál Ezije FFTL Responsabiliza Aktu Falsifikasaun Idade

Karta husi klube futeból sira iha Bobonaro bá FFTL husu realiza kongresu esrtráordinariu/ Foto/repro

Karta pedidu ne’ebé Hatutan.com asesu, Ssxta (18/10/2024), hatudu maioria husi klube sira ne’ebé eziste iha Munisípiu Bobonaro husu ba Prezidente Interinu FFTL Tenente Jenerál Domingos Raul “Falur Rate Laek”, Sekretáriu Jerál FFTL Gregório Correia no komité ezekutivu FFTL Marito da Costa atu deside data fiksu ba kongresu estraordináriu AFB nian hodi estabelese hikas estrutura foun ba mandatu períodu ida tuir estatuta Federasaun no Asosiasaun nian.

Halo tuir ba asuntu ne’ebé mensiona iha leten, maka membru husi Asosiasaun Futeból Bobonaro (AFB) ne’ebé asina iha tabela tuir mai ne’e hato’o pedidu ba ezekutivu FFTL nian atu realiza kongresu estraordináriu AFB hodi estabelese hikas estrutura foun.

Bazeia ba Estatutu AFB, artigu 23, Alinea 2, hakarak husu ba Prezidente AFB no FFTL atu termina no deside data fiksu hodi kontinua realiza kongresu estraordináriu AFB nian, ne’ebé maka pendente iha laron 26 fulan-Satembru 2024.

“Preokupasaun ne’e ami hato’o tamba ami hatene katak iha momentu ne’ebá  Asosiasaun Futeból Bobonaro vakum tiha ona, ho nune’e karik la realiza hikas kongresu refere iha tempu badak nia laran, sei afeta ba atividade desportu futeból iha Munisípiu Bobonaro iha eventu hirak tuir mai,” Hatutan.com sita karta husi klube sira-ne’e.

Komité Ezekutivu FFTL Marito da Costa hateten FFTL simu dunik pedidu husi Klube sira iha Munisípiu Bobonaro ne’ebé asina husi komite eleitorál AFB nian hamutuk ho klube balun kuaze 8 husu atu realiza konferénsia estraordináriu AFB nian no parte ezekutivu FFTL sei deside.

Karta FIFA no AFC nian mai husu atu realiza konferénsia ba Asosiasaun Futeból Munisípiu sira ne’ebé sei partisipa husi ezekutivu FFTL ida no Sekretáriu jerál FFTL mak ba abertura no iha loron 26 fulan-Setembru liu ba konferénsia AFB la’[o too klaran ona maibé para tamba iha intervensaun husi komité eleitorál AFB tamba konferénsia ne’e la diriiji husi komité eleitorál.

“Buat ne’e para tia dehan atu realiza fali iha kinta-feira semana kotuk mais muda fali too agora seidauk realiza. Mais maka ne’e osan ne’e membru asosiasaun sira mak tau rasik federasaun laiha ona.” Hateten Marito da Costa.

Komité ezekutivu ne’e hatutan liután katak pedidu husi Klube sira iha munisípiu Bobonaro ne’e husu atu iha konferénsia extraordináriu ba AFB hodi estabelese hikas estrutura foun.

Nia subliña mos katak iha klubu balun ne’ebé mantein kandidata atual Prezidente AFB Domingos Gouveia Moniz ba Prezidente iha mandatu tuir mai, tamba ne’e Prezidente atual mos prontu atu rekandidatu nia an no prontu organiza konferensia AFB hodi lori Futeból iha munisípiu Bobonaro ba oin.

Klube sira ne’ebé hatama karta petisaun ba FFTL mak hanesan FC MADIRAN, FC RIVER BULOBO, FC MARIA TAPO, FC MEMORIA, FC DEGANADORES , FC RUSA, FC USlLU, FC ABOMKASE, FC ZEBRA, FC DUABESI, FC SAHOL,  FC HUL TOPOL, FC SOBO AI, CTFJTL-M. B, COR. ARBT FUTSAL, COR.ARBT FOTEBOL no ikus liu BOBONARO LEGEND.

Jornalista: Vito Salvadór