Hatutan.com, (14 Novembru 2024), Díli— Inséndiu ka ahi han mutuk uma hamutuk 12 iha aldeia Buqui, suku Usitasae, Sub Rejiaun Oesilo, Rejiaun Administrativa Espesiál Oecusse Ambeno (RAEOA) iha kuarta loron 13 fulan Novembru 2024 tuku 15:30 otl.

Inséndiu ka ahi han mutuk uma hamutuk 12 iha aldeia Buqui, suku Usitasae, Sub Rejiaun Oesilo, Rejiaun Administrativa Espesiál Oecusse Ambeno (RAEOA) iha kuarta loron 13 fulan Novembru 2024 tuku 15:30 otl. Foto espesiál.

Ahi han mutuk uma hirak ne’e no uma na’in sira la salva buat ida hanesan hahan, osan inklui animál lubuk ida hanesan fahi iha luhan laran no seluk tán.

Lee Mós: Proposta OJE 2025 bá RAEOA Millaun $62-resin, PN Husu Rogério Lobato Dezenvolve Área Produtivu

Kauza hosi inséndiu ne’e to’o agora seidauk hatene loloos tanba akontese iha oras lorokraik bainhira ema hotu laiha fatin.

Xefe Suku Usitasae, Thomas Colo konta tuir kronolojia ne’ebé nia rona hosi komunidade katak, ahi mosu mai hosi sunu to’os ne’ebé ladún dook uma hirak ne’e.

Buat ne’ebé nia rona hosi komunidade balun katak, ahi han uluk iha uma ida hosi parte kakuluk ne’ebé iha loron ne’e mós anin boot.

“Anin boot no ahi mosu derrepente iha uma kakuluk, entaun komunidade labele halo buat ida tanba uma hirak ne’e konstrui ho duut no mós tali tahan. Iha uma 12 mak ahi han totál,” Thomas Colo hateten iha fatin akontesimentu, kinta (14/11/2024).

Iha loron ne’e kedan autoridade lokál konsege kontaktu direta bá liña kontaktu Bombeirus Rejionál maibé tanba distánsia dook no hosi Oecusse vila to’o Suku Usitasae estrada aat grave entaun bainhira to’o iha fatin ahi han mutuk ona uma hirak ne’e.

Hanesan Xefe Suku, ho inisiativa hodi halo kontaktu bá parte Autoridade RAEOA nian inklui perseiru sira seluk no konsege hetan ona apoiu emerjénsia.

Nia mós identifika ona dadus kompletu no halo ona karta pedidu atu hato’o bá parte relevante sira nune’e bele fasilita ka trata hikas vítima sira nia dokumentu importante sira mak hanesan kartaun eleitorál, billeti identidade, sertidaun Repúblika Demokrátika Timor-Leste (RDTL), diploma no seluk tán.

Autoridade lokál ne’e mós husu bá públiku ne’ebé iha sentidu solidariedade hakarak oferese apoiu ruma bá vítima sira bele oferese direta bá iha suku.

“Ita nia maluk sira ne’e presiza duni apoiu tanba sira lakon buat hotu. Sira iha ne’e ho de’it roupa ne’ebé iha isin. Buat seluk laiha no sira presiza tebes ajuda sa tán oras ne’e daudaun tama ona bá tempu udan. Tanba ne’e agradese bá maluk sira ne’ebé hakarak fó apoiu,” nia hateten.

Iha fatin hanesan vítima Vicente Metan hateten, ninia uma ahi han mutuk inklui fahi ne’ebé sulan iha luhan laran ahi han hotu.

“Ha’u lakon buat hotu. Lakleur tán udan tau la hatene atu halo oinsá. Batar no hare oitoan iha uma laran mós ahi han hotu. Roupa no sasan koziña nian mós ahi han hotu,” nia hateten ho matabeen.

Vítima hirak ne’e oras-ne’e daudaun provizorimente hela iha uma viziñu sira nian ho esperansa katak, sei iha tulun hosi parte autoridade no ema laran di’ak sira.

Jornalista Estajiáriu: Lázaro Pereira Quefi