Hatutan.com, (21 Novembru 2024), Díli- Primeiru-Ministru Kay Rala Xanana Gusmão, hateten Governu iha preparasaun másimu ba selebrasaun loron proklamasaun Independénsia  ba dala-XLIX, 28 Novembru 2024, iha Rejiaun Administrativa Espesiál Ambeno Oé-Cusse (RAEOA).

Lee Mós: Xanana Garante Ramos-Horta Promulga OJE 2025 Billaun $2,6 iha Semana Oin

Primeiru-Ministru Xanana Gusmão. Foto/Dok.Elio dos Santos da Costa

“Prezidente Repúblika mós husu kona-bá preparasaun iha Oé-Cusse, ohin dadeer, iha Konsellu Ministru ami halo rezolusaun ida atu halo hanesan sistema ida kooperasaun traballu entre FALINTIL-Forsa Defeza Timor-Leste (F-FDTL) ho Polísia Nasionál Timor-Leste (PNTL) atu fó seguransa hanesan mós uluk Papa mai ne’ebé ha’u informa mós ba Prezidente Repúblika,”  Primeiru-Ministru Kay Rala Xanana Gusmão informa ba jornalista sira hafoin remata enkontru semanál ho Prezidente Repúblika José Ramos-Horta iha Palásiu Prezidensiál, Kinta (21/11/2024).

Xefe Estadu hatutan Prezidente Repúblika mós konvida maluk sira uluk jenerál Indonézia ne’ebé reformadu hotu ona, se karik bele mai ne’ebé ne’e mós preparadu atu simu sira hanesan maun-alin, amigu atu balun tuir iha Oé-Cusse.

“Naran eis jenerál Indonézia sira ne’e depois mak sira dehan tanba seidauk iha, balun mai, balun seidauk responde,” tenik nia.

2025, Prezidente Repúblika Indonézia Vizita TL

Primeiru-Ministru Kay Rala Xanana Gusmão hateten Prezidente Repúblika Indonézia Prabowo Subianto sei la vizita Timor-Leste iha tinan ne’e tamba ne’e iha 28 Novembru sei iha deit reprezentante.

“Prezidente Repúblika Indonézia Prabowo Subianto mós Prezidente Repúblika José Ramos Horta konvida tiha, loron ida ha’u hasoru nia, ha’u entrega karta nia dehan 28 Novembru nia la konsege mai, só bele mai tinan mai ne’e, ne’ebé nia dala ruma haruka ema ruma mai ho ida ne’e mak sei kombina MKNEK, seguransa, migrasaun, sei kombina oin nusa mak ita fó kondisaun akollamentu ne’e di’ak ba maluk sira ne’ebé.” Hateten Primeiru-Ministru Kay Rala Xanana Gusmão.

“La’ós ha’u temi de’it ida ne’e tanba imi hotu hatene tanba Prezidente Repúblika foin daudauk ba NTT la’ós vizita ofisiál, primeira-vez mak Prezidente Repúblika hasai férias, mais sai tiha asuntu bo’ot ida ne’ebé liu tiha ona. Ne’e-duni Prezidente Repúblika husu de’it mak joven hotu-hotu komportamentu di’ak nafatin hanesan ita hatudu tiha ona bainhira Papa mai ita bele hatudu nafatin.”

Jornalista: Vito Salvadór