Hatutan.com, (12 Dezembru 2024), Díli- Prezidente Repúblika (PR), José Ramos-Horta, kondekora órgaun komunikasaun sosiál Hatutan.com ho média nasionál 11 seluk tan ho Medalla Méritu no sertifikadu rekoñesimentu ba kontribuisaun ne’ebé fó durante halo kobertura exepsionál ba vizita Apostólika dahuluk Papa Francisco nian mai Timor-Leste husi loron 09 to’o loron 11 Fulan-Setembru 2024.

Lee Mós: Conselho de Imprénsa Preokupa Remunerasaun bá Jornalista Sira, Hatutan.com Bele Sai Ezemplu

PR Ramos-Horta, kondekora Hatutan.com ho média nasionál 11 seluk tan ho Medalla Méritu no sertifikadu rekoñesimentu iha Palasiu Prezidensiál, Kinta (12/12/2024). Foto/Elio dos Santos da Costa

Órgaun Komunikasaun Sosiál 12 ne’ebé hetan atribuisaun espesiál no onra ho Medalla Méritu no sertifikadu rekoñesimentu husi Prezidente Repúblika José Ramos-Horta mak hanesan;

1. Hatutan.com
2. Rádiu no Televizaun Timor-Leste, Empreza Públika (RTTL, E.P.)
3. Ajénsia Notisioza Tatoli, I.P.
4. Grupu Mídia Nasionál (GMN)
5. Televizaun Edukasaun Timor (TVET)
6. Suara Timor Lorosa’e (STL)
7. Diáriu Timor Post
8. Jornál Independente
9. Dili Post
10. SMNews Timor
11. Fornesedór Informasaun Vídeo (VIP TV)
12. Lafaek News

Medalla Méritu, ne’ebé estabelese tuir Dekretu Lei No. 15/2009, rekoñese kontribuisaun sira ne’ebé destakadu hodi hametin orden sosiál no promove pás no estabilidade nasionál. Mídia onrada sira hatudu profisionalizmu ezemplár iha sira-nia kobertura komprensivu kona-ba Vizita Papal, hodi fahe okaziaun importante ida-ne’e ho mundu no dokumenta fiar kle’an povu timoroan nian.

Prezidente Repúblika José Ramos-Horta iha nia diskursu hateten serimónia atribuisaun Medalla no sertifikadu rekoñesimentu ida ne’e atu hanoin hikas Papa Francisco nia vizita istóriku mai Timor-Leste, susesu boot ne’ebé mundu tomak mós rekoñese no Papa Francisco kontente loos ho nia vizita, no Primeiru-Ministru Xanana Gusmão mós kontente los tamba buat hotu-hotu la’o di’ak.

“Média nia papél ida importante tebe-tebes, liu husi imi nia servisu di’ak loos no ba mundu tomak. Ne’e duni, ami hanoin iha Prezidénsia ita tenke hanoin rekoñese, fó insentivu ba média sira ne’ebé iha,” Prezidente Repúblika José Ramos-Horta iha nia diskursu ne’ebé hala’o iha Palásiu Prezidensiál, Kinta (12/12/2024).

Ramos-Horta hatutan mós katak kobertura kle’an no profisionál ne’ebé fó hosi mídia estatál no privadu sira durante Papa Francisco nia vizita hatudu la’ós de’it signifikadu istóriku hosi okaziaun ne’e maibé mós kompeténsia no dedikasaun exepsionál husi jornalista sira iha nasaun ne’e.

Xefe Estadu subliña liután katak média sira nia serbisu garante katak eventu importante ida-ne’e prezerva ba jerasaun sira iha futuru no partilla iha nivel nasionál no internasionál. 

Kona-bá Hatutan.com

PM Xanana Gusmão konversa ho reprezentante Hatutan.com, Laurentina Pires de Jesus iha ámbitu atribuisaun kondekorasuan Medalla Méritu no sertifikadu rekoñesimentu hosi Prezidente Repúblika, José Ramos-horta iha Palasiu Prezidensiál. Foto/Elio dos Santos

Hatutan.com nu’udar meiu komunikasaun sosiál ho karater multimedia ho plataforma online ne’ebé mai hosi órgaun komunikasaun sosiál RAYA MEDIA & ENTERTAINMENT, Unipessoal, Lda. Sede : Rua. Av. de Portugal, Nú 74, Díli, Timor-Leste.

Hatutan.com eziste ofisiál ho nia publikasaun dahuluk  iha loron  20 fulan-Agostu 2021 ho karater  média investigativu ne’ebé hetan rekoñesimentu ofisiál estadu  liuhosi atribuisaun sertifikadu hosi órgaun reguladór  Komunikasaun Sosiál Conselho de Imprensa de Timor-Leste.

Durante eziste to’o mai iha 2024, Hatutan.com manan ona prémiu iha kompetisaun sira nasionál no internasionál hanesan:

• Produtu Jornalístiku di’ak liu hosi operadór telekomunikasaun Telekomcel iha loron 15 fulan-Novembru 2022  
• Manan prémiu rua hosi Conselho de Imprensa de Timor-Leste ho kategoria Francisco Borja da Costa ho prémiu Bernardino Guterres iha loron 16 fulan-Outubru 2023.
• Xefe Redasaun Hatutan.com, Francisco Belo Simões da Costa, manan prémiu anti-korrupsaun internasionál ne’ebé simu direta hosi Ministru  Negósiu Estranjeiru  Estadu Unidus Amérika, Antony John Blinken iha Washington hodi komemora loron internasionál anti-korrupsaun, 19 fulan-Dezembru 2023
• Manan Prémiu kategoria The Bast Media 2024 hosi Conselho de Imprensa de Timor-Leste iha ámbitu selebrasaun loron nasionál liberdade imprensa iha Balibo, Bobonaro, 16 fulan-Outubru 2024

 Entrega prémiu ba manan-na’in sira husi konkursu fotografia

Iha serimónia kondekorasaun ba media Nasionál sira ne’e, Prezidente Repúblika José Ramos-Horta entrega mos prémiu ba manan-na’in sira husi konkursu fotografia Vizita Papal nian mai Timor-Leste.

Manan-na’in sira mak:

1. Lirio da Fonseca, manan na’in dahuluk ho trofeu  no osan $1,250.00
2. Eugénio Pereira da Silva, manan na’indDaruak ho trofeu no osan $1,150.00
3. Antonieta Freitas Sequeira, manan na’in datoluk ho trofeu no osan $950,00
4. Eugénio Pereira da Silva, manan na’in dahaat ho trofeu no osan $850.00
5.  Lirio da Fonseca, manan na’in dalima ho trofeu  no osan $750.00

Iha diskursu Xefe Estadu subliña mós katak prémiu ne’e hanesan rekoñesimentu ida no karik la satisfás ho rezultadu bele rekorre.

“Ha’u la hola parte iha juri, ne’e dunik buat ruma sala karik bele rekorre ba ha’u, tamba iha buat ruma falta karik, haluhan karik, tamba iha ne’e laiha politizasaun, partidarizasaun, ita haree mak kualidade fotografia ne’e, hatudu saida,” Prezidente Repúblika José Ramos-Horta hateten.

Hafoin serimónia entrega prémiu, Prezidente Ramos-Horta inaugura espozisaun foto iha salaun Papa Francisco. Espozisaun ne’e dokumenta Sua Santidade Papa Francisco nia Vizita Apostóliku Dahuluk mai Timor-Leste no inklui fotografia vensedór sira. Espozisaun foto ne’e sei loke ba públiku husi loron 13 too loron 20 fulan-Dezembru 2024 iha Palásiu Prezidensiál.

Jornalista: Vito Salvadór