Hatutan.com, (16 Dezembru 2024), Díli-Polísia Nasionál Timor-Leset (PNTL) Munisípiu Díli identifika tiha ona sidadaun estranjeiru ida ho nasionalidade Xina  inisiál  CH ne’ebé kondús karreta ho númeru matrikula 27.600 soke negosiante Francisco da Costa Lopes, iha área Hudi-laran, Suku Bairo Pite, Díli, Sesta (14/12/2024).

Lee Mós: Polísia Kaptura Suspeitu Na’in-lima no Detein Na’in-rua bá Kazu Konfrontu iha Feira Palásiu Prezidente

Karreta ne’ebé Xinés ida kondus hodi soke negosiante Francisco Lopes iha área Hudi-laran, Díli, asegura ona iha Polísia, Sesta (14/12/2024). Foto/Elio dos Santos da Costa

Asidente ne’ebé rezulta vítima nia ain-tohar no daudaun ne’e hetan tratamentu intensivu iha Ospitál Nasionál Guido Valadares (HNGV) konsege viral iha rede sosiál Facebook bainhira pesoál balu  publika video asidente ne’e.

Komandante Seksaun Tranzitu Munisípiu Díli, Inspetór Polisia Afonso da Silva, haktuir kronolójia akontesimentu ne’e, haleu tuku 10:00 dadeer, bainhira Xinés ho inisiál CH halai ba soke derrepente vítima ne’ebé fa’an hela sigaru, tuur iha loja ne’e ninia oin. 

“Tuir informasaun hosi investigasaun, ai-sorin karuk vítima nian tohar bá rua,” Komandante Polísia Seksaun Tranzitu Munisípiu Díli, Inspetór Polísia Afonso da Silva, informa bá Jornalista sira iha kna’ar fatin, Caicoli-Díli, Segunda (16/12/2024).

Prosesu identifikasaun hotu ona, hein de’it vítima nia kondisaun rekupera bele loke prosesu no karik vítima iha hanoin atu rezolve ho mediasaun de’it, polísia bele fasilita prosesu. Maibé, sé sira hakarak lori kazu ne’e bá Tribunál mós Polísia sei fasilita nafatin prosesu ne’e hodi kanaliza bá iha tribunál.

Kona-bá evidénsia karreta ne’ebé soke, la’o tuir prosesu baibain, katak, bainhira envolve iha asidente, Polísia rekolla evidénsia sira, inklui mós karreta ne’ebé parte suspeitu kondús.

Vítima Francisco Lopes, orijen hosi Postu Administrativu Baucau Vila, Munisípiu Baucau. Iha Díli,  vítima hela iha área Fatuhada ho profisaun loron-loron hala’o vida negósiu fa’an sigarru ho fa’an pulsa telefónika  

Jornalista: Rogério Pereira Cárceres