Hatutan.com, (17 Dezembru 2024)-Díli, Governu Repúblika Populár Xina iha kompromisu  boot tulun nafatin  dezenvolvimentu  Timor-Leste (TL) liu-hosi akordu kooperasaun sira ne’ebé estabelese ona.

Lee Mós: Xina iha Kompromisu Forte Hakle’an Kooperasaun ho Timor-Leste iha Área Prinsipál Haat

Vontade no kompromísu boot Xina nian hato’o hosi Vise-Ministru Negósiu Estranjeiru Repúblika Populár Xina, Sun Weidong, bainhira halo enkontru ho Primeiru-Ministru (PM), Kay Rala Xanana Gusmão, iha Palásiu Governu, Tersa (17/12/2024).

PM Xanana Gusmão simu vizita Vise-MNE Xina Sun Weidong iha Gabinete Fronteira Maritiima, Tersa (17/12/2024). Foto/Espesiál

“Vise-Ministru MNE Xina mai ko’alia kona-bá kooperasaun ho Timor-Leste. Ita agradese tebtebes tanba membru governu ida mai dala-ida tán mai para haree, aumenta tán oin-nusá maka bele koopera nafatin ho Timor-Leste. Ita agradese, sira mós dehan katak, ami mai para atu afirma nafatin ami nia vontade, hodi ajuda Timor-Leste iha dezenvolvimentu,” PM Xanana Gusmão, informa bá Jornalista sira, hafoin enkontru  iha Gabinete Fronteira no Marrítima, Palásiu Governu, Díli.

“Ami la diskute kestoens sira be dehan iha ne’ebé, iha ne’ebé, iha ne’ebé, maibé, ami hanesan fó hatene bá malu de’it. Ne’e-duni, mak ne’e de’it, depois nia sei hasoru malu ho ministru sira seluk, iha ne’e mak sira sei koalia kona-bá asuntu konkretu kooperasaun nian,” PM Xanana haktuir tan.

Iha fatin hanesan, Sun Weidong sente onrádu hodi realiza sorumutu ho Primeiru-Ministru, Xanana Gusmão atu re-afirma hikas kompromisu sira entre país rua nian.

Vise-MNE Repúblika Populár  Xina ne’e konsidera Timor-Leste ho Xina nu’udár belun di’ak no mós parseiru bá kooperasaun hosi kedas inísiu TL restaura ninia independénsia totál iha 2002 nu’udár Estadu Soberanu.

Iha 2023, Xina ho onrádu simu Primeiru-Ministru, Kay Rala Xanana Gusmão ne‘ebé partisipa iha serimónia abertura Jogu Aziátiku bá dala-19 iha Hangzhou no Prezidente Xina, Xi Jinping realiza enkontru ida ne’ebé susesu tebes ho Xanana Gusmão no konsege atualiza parseria estratéjiku ida ne’ebé kompriensivu liu.

Ho vizita Prezidente Repúblika, José Ramos Horta iha inísiu tinan 2024, sai mós onra ida bá Xina liu-hosi konkordánsia ida atu avansa hamutuk bá objetivu jerál.

Hosi ne’e mós oferese orientasaun estratéjiku bá nasaun rua, hodi hametin liu-tán relasaun ne’ebé foka bá área prinsipál sira mak hanesan indústria, infraestrutura no agrikultura.

Iha vizita ida-ne’e, Sun Weidong hakarak atu implementa liu-tán konsensu líder sira nian hodi promove  kooperasaun iha prátika.

Enkontru  Primeiru-Ministru Xanana Gusmão ho Vise-MNE Xina Sun Weidong akompaña hosi Vise-Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, Vise-Ministra Asuntu ASEAN, Milena Maria da Costa Rangel.  Enkuantu, Vise-Ministru Sun Weidong akompaña hosi Embaixadora Xina iha TL, Wang Wenli.

Sun Weidong sei hasoru-malu mós ho membru Governu sira seluk, hodi deskute detallada kona-bá asuntu konkretu sira kooperasaun nian.

Jornalista: Rogério Pereira Cárceres