Hatutan.com, (19 Dezembru 2024), Díli- Primeiru-Ministru (PM), Kay Rala Xanana Gusmão hateten, tinan 2025 Ministériu Saúde (MS) sei halo estudu ida di’ak kona-bá rejime ne’ebé iha Saúde.

Lee Mós: KM Fó Instrusaun ba Ministra Saúde Halo Negosiasaun ho Ospitál sira Hodi Reestrutura Dívida sira

PM Xanana Gusmão. Foto/Elio dos Santos da Costa

“Kona-bá sirkulár husi Ministériu Saúde ba profisionál saúde sira atu labele halo dupla funsaun, ha’u foin daudauk ba ospitál haree buat sira ne’e hotu. Ha’u dehan tiha ona iha ne’e katak tinan mai ne’e, ami sei halo estudu ida di’ak tebe-tebes kona-bá rejime ne’ebé iha saúde, tanba saúde hanesan horisehik ko’alia ho doutór sira iha ospitál katak imi nia servisu ne’e misaun, la’ós servisu ida atu hetan osan, ne’e misaun atu kura ema, atu evita ema mate, ne’ebé misaun boot ida,” Primeiru-Ministru Kay Rala Xanana Gusmão haktuir ba jornalista sira iha Palásiu Prezidensiál, Kinta (19/12/2024).

Primeiru-Ministru Kay Rala Xanana Gusmão  mós informa governu hahú ona halo pagamentu ba dívida sira ospitál sira iha estranjeiru nian no sei kontínua selu iha 2025.

“Kona-ba divida sira iha ospitál estranjeiru, ha’u ko’alia ona iha ne’e katak dívida ho ospitál sira iha estranjeiru ne’e ami hetan tarde ona, tanba ne’e mak ha’u dehan  ona katak ami fó hatene ba ospitál sira ne’e simu nafatin ba, ami selu saida mak bele iha 2024 ne’e no restu ne’e sei selu iha 2025,” Xanana Gusmão hateten.

Primeiru-Ministru afirma Tanba dívida ne’e ho montante millaun $18 no IX Governu Konstitusionál tama iha 01 Jullu 2023, ema komesa mate no moras no governu seluk ne’e ema moris kapás loos.

Jornalista: Vito Salvadór